ZAJ NYEEM HNUB TIM 19 LUB 6 HLI 2025
HNUB NCO TXOG LEEJ NTSHIAB LOS MUS AS DOS
COV LUS NYOB HAUV MAS TAIS NTAWV MOO ZOO (MT 6: 7-15)
Thaum cov thwj tim hais kom Huab Tais Yes Xus qhia lawv teev Ntuj, mas Huab Tais Yes Xus hais tias “Thaum nej teev Ntuj, nej txhob ntuas mus ntuas los ntau ntau. Nej yuav xub cav txog Tswv Ntuj zoo li no tias “Peb Txiv nyob saum ntuj, koj lub npe ntshiab nto moo lug, koj lub Ceeb Tsheej los txog.”
Ces nej yuav thov kom muaj raws li Tswv Ntuj siab nyiam tias “Kom muaj raws li koj nyiam nyob ntiaj teb no li nyob saum ntuj.”
Tag mas nej mam thov yam nej xav tau tias “Thov koj pub mov txaus peb noj hnub no, koj zam peb cov nuj nqis zoo li peb zam rau cov tshuav nuj nqi ntawm peb. Koj txhob tso peb raug kev ntxias, thov koj npo peb dim ntawm kev phem.”
Kwv tij Hmoob, ‘kev teev Ntuj’ yog tsa peb lub siab kom siab mus cuag Tswv Ntuj. Yog li mas thaum peb teev Ntuj, mas peb yuav hais tawm hauv nruab siab tuaj. Peb hais mas peb yuav xav raws li lo lus peb hais ntawd. Thaum peb thov yam twg ntawm Tswv Ntuj mas peb yuav ua yam ntawd rau lwm tus thiab.
Kwv tij, thaum peb hais zaj ‘Peb Txiv’ raws li Huab Tais Yes Xus qhia, mas yog peb tab tom hu Tswv Ntuj ua ‘Txiv’ ces txhais tias Tswv Ntuj hlub peb thiab yuav pub txhua yam zoo rau peb xws li ib leej txiv pub qhov zoo rau nws cov me nyuam.
Peb hais tias “Koj lub Ceeb Tsheej los txog, kom muaj raws li koj nyiam nyob ntiaj teb no li nyob saum ntuj”, mas yog peb tab tom xav kom tas lub ntiaj teb muaj kev thaj yeeb, peb yuav yog tus tsim kev thaj yeeb mas Tswv Ntuj lub Ceeb Tsheej thiaj los txog.
Peb hais tias “Thov koj pub mov txaus peb noj hnub no”, mas peb kuj yuav rov ntuas peb kom txhob muaj lub siab ntshaw ntau dhau, peb yuav pub yam peb muaj rau tus tsis muaj.
Peb hais tias “Koj zam txhaum rau peb zoo li peb zam rau luag”, mas yog peb tab tom hais rau Tswv Ntuj tias yog peb zam rau lwm tus, mas thov Tswv Ntuj zam rau peb thiab; yog peb tsis zam, mas thov Tswv Ntuj tsis txhob zam rau peb thiab.
Peb hais tias “Koj txhob tso peb raug kev ntxias, koj npo peb dim ntawm kev phem”, mas yog peb thov Huab Tais Tswv Ntuj pab peb kom niaj hnub peb txhob poob rau kev ua phem ua tsis zoo.
Zaj teev Ntuj Huab Tais Yes Xus qhia no thiaj yog zaj tseem ceeb tshaj plaws, thiab xis Tswv Ntuj siab kawg kiag. Yog nej hais tias nej tsis paub yuav hais dab tsi rau Tswv Ntuj, ces nej hais zaj ‘Peb Txiv’ no xwb ces txaus lawm.
Kwv tij, lub Koom Txoos kuj tau qhia peb sawv daws tias thaum peb teev Ntuj mas peb yuav ua raws 4 yam no:
1. Cav txog Tswv Ntuj lub koob meej, lub hwj chim.
2. Ua Tswv Ntuj tsaug rau txhua yam txiaj ntsim paj tshab Tswv Ntuj pub rau peb; tshwj xeeb mas yog lub siab ntseeg, chaw vam khom, kev nyiam.
3. Thov txim Tswv Ntuj, vim tias niaj hnub peb tau ua ntau yam hla Tswv Ntuj, peb tau ua ntau yam tsis xis Tswv Ntuj siab. Peb tu siab rau tej yam tsis zoo peb tau ua, peb thov Tswv Ntuj zam rau peb, kom peb rov tau nrog Tswv Ntuj sib haum xeeb.
4. Thov Tswv Ntuj pub tej yam Tswv Ntuj pom zoo pub rau peb, kom tau pab peb nyob ruaj hauv kev ntseeg, pab peb hla lub neej nyob ntiaj teb no.
Kwv tij, Huab Tais Yes Xus qhia peb teev Ntuj lawm, lub Koom Txoos kuj tau qhia lawm thiab. Li ntawd, vam tias hnub no mus, peb cov neeg ntseeg yuav nyiam teev Ntuj txhua lub caij nyoog mog.
