ZAJ NYEEM HNUB TIM 19 LUB 10 HLI 2024
HNUB XYA LUB LIS PIAM 28 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 8-12)
Cov kws tij Hmoob, Huab Tais Yes Xus hais tias “Leej twg lees rau tsoom neeg tias nws paub kuv, mas Neeg Leej Tub kuj yuav lees tias nws paub tus ntawd nyob ntawm Tswv Ntuj cov Tshiab xub ntiag. Leej twg hais ib lo lus cem Neeg Leej Tub, mas Ntuj yuav zam rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws.”
Kwv tij, muaj 3 los nyob hauv Huab Tais Yes Xus cov lus no:
Lo lus ib, yog lo tias ‘Kuv’; lo lus ob, yog lo tias ‘Neeg Leej Tub’; thiab lo lus peb, yog lo tias ‘Neej Ntuj Plig Ntshiab’.
Lo lus ‘kuv’ thiab ‘Neeg Leej Tub’ mas yog Huab Tais Yes Xus tab tom hais txog nws tus kheej. Lo lus ‘Leej Ntuj Plig Ntshiab’ mas yog tus Huab Tais uas Tswv Ntuj yuav xa tuaj nyob hauv cov neeg ntseeg txog Yes Xus, yuav yog tus tuaj qhib sawv daws lub tswv yim kom to taub txog Huab Tais Yes Xus cov lus, yuav yog tus los nplij cov neeg ntseeg lub siab.
Hnub no Huab Tais Yes Xus hais tias leej twg lees rau lwm tus tias nws paub Huab Tais Yes Xus, mas hnub nws tso ntiaj teb no tseg, Huab Tais Yes Xus kuj yuav lees paub nws.
Huab Tais Yes Xus yog Tswv Ntuj. Tswv Ntuj yog tus zoo txhij, Tswv Ntuj yog kev nyiam. Yog li tus neeg twg paub ua qhov zoo, tus neeg twg paub nyiam lwm tus; mas Huab Tais Yes Xus thiaj yuav paub tus neeg ntawd.
Nyob hauv lub zim txwv no, muaj kev phem kev tsis zoo ntau yam nyob ib ncig peb, neeg saib qhov zoo tsis muaj qab hau. Neeg hais tias thaum peb pom ib tug raug txom nyem, mas yus txhob cev tes pab, nyab tsam yog nws dag yus, los yus pab nws yuav tau dab tsi. Yog peb xav li ntawd, mas puas yog peb paub Huab Tais Yes Xus los tsis paub?
Muaj ib nkawm niam txiv sib cav sib ceg, tus txiv muab tus niam ntaus; peb yuav nyob twg ywm ntsia los peb yuav mus pab cheem, pab nrog ntuas nkawd? Qhov twg thiaj yog peb tab tom lees paub Huab Tais Yes Xus?
Cov kwv tij, Huab Tais Yes Xus hais tias muaj ib hnub nej cem kuv los tsis ua cas, kuv zam rau nej vim nej tsis paub; tab sis hnub twg nej cem Leej Ntuj Plig Ntshiab, mas kuv yuav tsis zam rau nej.
Tos Huab Tais Yes Xus hais li, vim tus cem Huab Tais Yes Xus mas yog nws tseem tsis tau paub Huab Tais Yes Xus xwb, tab sis tus neeg uas twb paub Huab Tais Yes Xus lawm, mas twb yog nws muaj Leej Ntuj Plig nrog nws lawm, Leej Ntuj Plig twb qhia qhov tseeb txog Huab Tais Yes Xus lawm, tab sis muaj ib hnub nws tsis kam lees qhov nws paub, nws tsis kam ua raws li Leej Ntuj Plig tshoj nws, mas yog nws tab tom cem Leej Ntuj Plig Ntshiab. Yog li mas Huab Tais Yes Xus thiaj hais tias yuav zam tsis tau rau nws.
Kwv tij, nej coj mus xav mog. Nyob zoo sawv daws.
