ZAJ NYEEM HNUB TIM 18 LUB 9 HLI 2024
HNUB PLAUB LUB LIS PIAM 24 CAIJ NYOB NRUAB XYOO
COV LUS NYOB HAUV LAS KAS NTAWV MOO ZOO (LK 7: 31-35)
Kwv tij Hmoob sawv daws, thaum Zam tawm tuaj tshaj kom tsoom sid ua kab ke ntxuav thiab hloov siab tshiab mas muaj ib txhia tu siab rau lawv cov txhaum ces lawv mus thov kom Zam ua kab ke ntxuav rau lawv hauv tus dej Yos Las Das, tab sis tseem tshuav coob leej tshwj xeeb mas yog cov Fas Lis Xais thiab cov Kws Ntawv Ntshiab; lawv tsis kam hloov siab tshiab thiab txais kab ke ntxuav, lawv hais tias Zam yog ib tug neeg raug dab, nws vwm lawm mas nws thiaj yoo tshaib thiab muab tawv tsiaj los hnav zoo li ntawd. Lawv lub siab xav tias tus tsim nyog ntuas sawv daws kom hloov siab tshiab, tus tsim nyog ua Yaj Saub mas tsum yog cov neeg kawm txoj cai thiab coj rawv txoj cai xws li lawv.
Thaum Huab Tais Yes Xus tawm tuaj, nws tshaj lub Moo Zoo hais txog Tswv Ntuj lub Ceeb Tsheej, nws tsis ua nruj li Zam, nws nyiam thiab hlub cov neeg txom nyem, cov neeg muaj mob uas luag hais tias yog cov neeg txhaum. Huab Tais Yes Xus nrog cov neeg me hauv tsoom Yus Das koom ib roog qav. Cov Fas Lis Xais thiab cov Kws Ntawv Ntshiab pom mas lawv txais tsis tau, lawv hais tias Yes Xus tsuas yog tus neeg hu dab xwb nws thiaj koom nrog cov neeg me noj mov haus dej haus cawv.
Vim tej no mas hnub no Huab Tais Yes Xus thiaj hais cov lus tias “Tsoom neeg no zoo li tej pab me nyuam yaus tom tshav puam. Lawv ua si xws li yog ib rooj tshoob, tej tus hais tias ‘peb twb tshuab raj lawm, ua cas nej tsis dhia seev cev mas!’ Tej pab lawv ua si yam li tab tom yog ib lub ntees pam tuag, lawv hais tias ‘peb twb tsa suab nyiav, ua cas nej tsis quaj mas!’
Kwv tij, nyob hauv peb tiam neeg no puas muaj zoo li ntawd?
Puas muaj tej zaus Huab Tais Tswv Ntuj ua hwj huam pab peb tab sis peb hais tias ‘Ab! Twb tsis yog Tswv Ntuj pab, yog kuv rab peev ywm, yog kuv txoj kev txawj ntse rov pab kuv.’
Puas muaj tej zaus peb pom tej tus neeg txom nyem thov kev pab ntawm peb, ces peb hais tias ‘Vim nws yog neeg txhaum mas Tswv Ntuj muab txim rau nws, kav tsij cia nws txom nyem li ntawd ntag.”
Tej yam li hais no yog tej yam Huab Tais Tswv Ntuj qhia peb kom peb ntseeg txog Tswv Ntuj, kom peb qhib siab nyiam Huab Tais Tswv Ntuj nyob hauv cov neeg txom nyem.
Yog peb tsis qhib siab, ces peb yuav ua neeg dig muag thiab siab qaus xws li cov Fas Lis Xais thiab cov Kws Ntawv Ntshiab hnub no Huab Tais Yes Xus hais txog. Peb yuav zoo li cov me nyuam yaus sib nthe tias ‘kuv tshuab raj ua cas koj tsis seev cev, kuv nyiav ua cas koj tsis quaj.’
