ZAJ NYEEM HNUB TIM 18 LUB 7 HLI 2024
HNUB TSIB LUB LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 11: 28-30)
Kwv tij Hmoob sawv daws, hnub no Huab Tais Yes Xus hu peb kom mus so nyob hauv nws. Huab Tais Yes Xus kom peb mus so, tsis yog coj lub cev niaj hnub ua hauj lwm nrhiav noj yug lub plab lub ncauj no mus so xws li thaum peb sab sab qaug zog, ces peb mus nrhiav tej chaw pw so los siav, mus yos ua si kom lub cev rov muaj zog. Tab sis yog Huab Tais Yes Xus hais kom peb coj tus ntsuj plig mus so nyob hauv Huab Tais Yes Xus.
Peb tsis nco pom tias peb tus ntsuj plig sab thiab qaug zog npaum cas, vim peb ntsia tsis pom. Tab sis peb paub tias peb tus ntsuj plig ris ib lub nra hnyav; yog peb cov txim txhaum thiab cov hauj lwm phem. Peb paub li ntawd, vim thaum peb ua txhaum, ua cov hauj lwm tsis zoo; mas muaj ib yam ua rau peb ntxhov siab, muaj ib yam ua rau peb hnov zoo li muaj ib lub nras nyob saum peb nrob qaum.
Hnub no, Huab Tais Yes Xus thiaj hais rau peb tias “Koj txo koj lub nras mas, koj tuaj cuag kuv, los so hauv kuv tus ntxoov ntxoo mas. Kuv mam ua tus nplij koj, thiab pas ris koj lub nra.”
Huab Tais Yes Xus siab zoo npaum no, Huab Tais Yes Xus hlub peb npaum no. Phim peb yuav mloog Huab Tais Yes Xus lus thiab tso siab rau Huab Tais Yes Xus ua tus pab peb.
Niaj hnub chiv, thaum peb mus sib Txoos Txi Ntuj tas, peb lub siab los peb tus ntsuj plig puas kaj tuaj? Los leej twg thaum mus teev Ntuj tas, nws haj yam ntxhov siab?
Nej muab ua tib zoo xav mog!
