ZAJ NYEEM HNUB TIM 17 LUB 6 HLI 2025
HNUB PEB, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 43-48)
Kwv tij Hmoob, hnub no Huab Tais Yes Xus hais rau peb kom nyiam luag tej ob cag huv tib si, txawm luag yuav ua phem rau peb, luag yuav ntxub peb npaum cas; los peb txhob ntxub lawv, txhob xav phem rau lawv.
Yog nej nco tau, mas cov lus Huab Tais Yes Xus hais txog cov tau txoj hmoov zoo mas Huab Tais Yes Xus qhia tias “Cov tau txoj hmoov zoo yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.”
Huab Tais Yes Xus cov lus hais kom peb nyiam peb tus yeeb ncuab, thov Ntuj rau tus tsim txom peb; mas thiaj yog lo lus nthuav txog nqe lus cov tsim kev thaj yeeb.
Huab Tais Yes Xus hais tias “Nej hnov tej laus qhia tias ‘koj yuav nyiam tus nyob ze koj, koj yuav ntxub koj tus yeeb ncuab.’ Tab sis kuv hais rau nej tias nej yuav nyiam nej tus yeeb ncuab, nej yuav thov Ntuj rau cov tsim txom nej.”
Huab Tais Yes Xus hais cov lus no rau cov tuaj mloog nws, vim ib txwm cov Yus Das ntsia tias cov Yus Das xws li lawv xwb thiaj yog tus nyob ze lawv, cov Xas Mas Lias uas nyob kis nruab nrab Yus Das teb thiab Nkas Lis Lais teb mas lawv yog cov yeeb ncuab, cov Los Mas yog cov tsim txom lawv. Li ntawd, cov Yus Das thiaj ntxub cov Xas Mas Lias thiab cov Los Mas.
Kwv tij, ntawm peb cov neeg, mas tus nyob ze peb yog leej twg?
Yog peb nyob hauv peb tsev, peb tig ntsia ib ncig mas peb yuav pom tias sab ped los sab nrad, sab xis los sab laug; puav leej muaj cov tsev nyob ib ncig. Yog peb saib ntawm peb, peb yuav pom tias muaj neeg nyob ib ncig, tsis hais pem hauv ntej, nram qab, los ob sab. Cov tsev ntawd los cov neg ntawd, yog lawv thiab peb tsis muaj xaiv muaj lus, peb thiab lawv nyob ua ke sib pab sib nres, mas lawv yog tus nyob ze peb. Tab sis yog thaum twg lawv thiab peb muaj kev sib dub muag, sib ntsib tsis sib hu, sib pom tsis sib tham, ib tug ntsia tsis pom ib tug; thaum ntawd lawv thiab peb yog yeeb ncuab.
Peb tus yeeb ncuab yog tus muaj kev xav tsis thooj li peb, tus tsis nyob peb tog, tus cov nyom peb, tiv peb. Txhua hnub peb niaj hnub ntsib tus yeeb ncuab, thiab lwm tus koj saib peb yog lawv tus yeeb ncuab thiab. Tsuas yog peb tsis nco pom xwb, peb pheej xav tias tus yeeb ncuab mas yog tus yus ntxub, tus ua rog nrog yus. Peb pheej xav li no ces muaj ntau zaus peb thiaj ua ib siab nyiam tsis tau nws. Hnub no kom peb sim xyaum ua siab nyiam tus yeeb ncuab peb nco tsis txog xws li tau hais los saud; peb ua siab nyiam tus ntsib tom tog kev, peb ua siab nyiam tus hais lus cav peb, peb ua siab nyiam tus niaj hnub hais lus tiv peb. Peb xyaum li ntawd.
Muaj ntau zaus luag yog tus nyob ze peb, hos peb yog luag tus yeeb ncuab; kuj muaj ntau zaus luag yog peb tus yeeb ncuab tab sis peb yog luag tus nyob ze. Yam li ntawm tus nyob ntawm peb ib tog tsev nws tsis tau xav dab tsi phem txog peb li, tab sis ntawm peb mas tsis nyiam nws kiag; los tej yim mas peb ua zoo rau nws peb muaj noj mas peb cev rau nws tsis tseg, tab sis nws yim los cuaj yeej tsis nyiam peb.
Huab Tais Yes Xus hais tias “Nej yuav nyiam nej tus yeeb ncuab” mas yog li ntawd, txawm luag ntxub luag tsis nyiam peb, los peb ua twj ywm muaj dab tsi los nco ntsoov txog, thiab tseem muab kev nyiam kev hlub rau tsis tseg. Txhob xav tias “Kuv ua zoo cuag no rau lawv, lawv twb tsis pom li, ces kuv tsis ua ntxiv lawm.” Txhob xav li ntawd ib pliag li.
Huab Tais Yes Xus twb hais ntxiv tias tsis yog kom koj nyiam koj tus yeeb ncuab xwb, koj tseem yuav thov Ntuj rau tus tsim txom koj thiab.
Tus tsim txog peb, tsis yog tus niaj hnub ntaus peb, niaj hnub hiam peb xwb, tseem yog tus hais lus tsis zoo rau peb, tus hais lus ntsw peb, saib tsis tau peb thiab. Nws yog peb tus yeeb ncuab ntag.
Kwv tij, koj ua npaum li cas rau tus neeg twg, los lub tsev nyob ib zab koj lub tsev npaum li cas, nws tsis qauv ntsej txog koj li, twb yog nws tsim txom koj siab ntag. Kav tsij thov Ntuj rau nws.
Hnub no peb sim thov Ntuj rau nws, tag kis peb kuj yuav thov Ntuj rau nws, neeg kis. Sim thov Ntuj rau nws ib hnub, ob hnub, peb hnub, ib lis piam, ob lis piam, peb lis piam sib law. Tsis yog ib yam ceeb laj dab tsi.
Xav kom peb cov Hmoob ntseeg txog Yes Xus, sim thov Ntuj li hais, saib nej tus yeeb ncuab puas tsim txom nej lawm, saib nej lub siab puas hloov nej tus yeeb ncuab los ua nej tus phooj ywg, saib tus tsim txom nej cov lus puas yog lus tsawm nej los yuav yog ib cov lus pab thiab nej kom loj tuaj.
Kwv tij Hmoob sawv daws, peb tsa hau ntsia lub ntuj saib, Huab Tais Tswv Ntuj twb pub lub ntuj rau sawv daws ntoo, Huab Tais Tswv Ntuj twb xa lub hnub tuaj pom kev rau sawv daws, Huab Tais Tswv Ntuj twb xa lub hli tuaj ua sawv daws luag thaum hmo ntuj; tsis hais tus ntawd yuav yog neeg zoo los neeg phem. Huab Tais Yes Xus xav kom peb muaj lub siab nyiam xws li ntawd, txhob tshwj peb txoj kev nyiam rau tus nyiam peb xwb, txhob tshwj peb cov lus foom zoo rau cov txheeb peb xwb. Yog peb tsuas nyiam tus nyob ze peb xwb, peb yuav tau koob haum dab tsi? Yog peb tsuas thov Ntuj rau cov ua zoo rau peb xwb, Tswv Ntuj puas yuav mloog? Yog peb kawg hais lus zoo rau peb cov txheeb ze xwb, peb puas tau ua zoo tshaj luag tej?
Txij hnub peb ntseeg txog Yes Xus, mas peb txais Huab Tais Yes Xus ua peb tij, peb muaj Huab Tais Tswv Ntuj yog peb Txiv; peb Txiv yog tus zoo tshaj, mas peb yua ua tus neeg zoo tshaj mas peb thiaj tsim nyog ua peb Txiv Tswv Ntuj cov me nyuam. Qhov ntawd; yog nyiam tus ua tsis zoo rau peb, thov Ntuj rau tus ua phem rau peb.
Ua ntej yuav xaus cov lus nthuav lub Moo Zoo hauv hnub no, peb xav muab ib tug npawg cov lus tuaj tham pab nej xav tswv yim. Tus npawg no hais tias muaj ib tug Txiv Plig tuaj nyob hauv lawv lub zos, niaj zaus thaum tus Txiv Plig thov Ntuj mas nws nco ntsoov thov Ntuj rau cov ntxub nws, cov tsis nyiam nws.
Nws thov li ntawd tiag, txawm tias nws twb tsis paub tias nyob hauv nws lub neej, tus neeg twg yog nws tus yeeb ncuab.
Tus npawg hais ntxiv tias thaum chiv thawg mas lawv saib zoo li yog ib zaj txawv, tab sis lawv hnov tus Txiv Plig niaj hub thov Ntuj pub rau nws cov yeeb ncuab li ntawd, mas tos lawv nco ces lawv twb yoog raws li tus Txiv Plig ntawd. Thaum lawv thov Ntuj, lawv nco ntsoov thov rau cov yeeb ncuab lawv tsis paub raws li tus Txiv Plig ntawd lawm.
