Zaj nyeem hnub tim 17 lub 2 hlis 2026
Nco txog 7 tus Leej Ntshiab txhim tsa lub haum xeeb Mab Liab cov tub txib
Cov lus nyob hauv Mas Kos Ntawv Moo Zoo (MK 8: 14-21)
Kwv tij sawv daws, tus kab mob nyob rau hauv neeg muaj ob yam, thawj yam yog kab mob hauv neeg lub cev, hos yam ob yog tus kab mob hauv neeg sab ntsuj plig. Yog yuav muab nug tias tus kab mob twg txaus ntshai dua, tej zaum peb ib txhia yuav teb tias, yog kab mob hauv lub cev, vim nws sib kis tau. Yam li tus kab mob Covid 19 no, uas rau ntau lub teb chaws ntsib kev puas tsuaj, ua rau neeg ntiaj teb sawv daws ntshai tas nrho. Hnub no Huab Tais Yes Xus txhib cov thwj tim kom xyuam xim, kom ceev faj cov poov xab Fas Lis Xais thiab ceev faj poov xav Hes Los, uas yog neeg zoo sab nrauv, tiam sis siab nkhaus, lawv lam coj Mais Xes txoj cai ntawm tus ntaub ntawv xwb, tiam sis, lawv lub siab nkhaus, lawv tsis hwm Ntuj, lawv lub siab nrug deb Tswv Ntuj, lawv ntshaw neeg ntiaj teb lub hwj chim, lawv ntshaw kom muaj neeg hwm lawv thiab qhuas lawv, qhov no ntag thiaj yog ib tug kab mob sib kis yooj yim tshaj, uas yuav ua kev puas tsuaj loj tshaj dua tus kab mob Corona Covid 19 no thiab, vim ib txhia tsis nco faj, lawv tsis paub tias lawv twb kis tus kab mob no lawm, vim lawv ntshaw neeg ntiaj teb lub hwj chim, lawv ntshaw lub suab npe, lawv ntshaw nyiaj txiag. Thaum tus neeg twg kis tus kab mob Fas Lis Xais no lawm, nws yuav zoo nyuaj, tsuas muaj Huab Tais Yes Xus twb leeg xwb thiaj yuav pab tau kom nws dim.
