ZAJ NYEEM HNUB TIM 16 LUB 6 HLI 2025
HNUB OB, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 38-42)
Nyob ntiaj teb no peb pom neeg tsim ntau txoj cai los kav neeg, los tswj neeg kom ua tau ib tug neeg tsim txiaj, kom neeg muaj tsim sib luag, kom ib tug txhob hla ib tug cai, kom ntiaj teb neeg nyob hauv txoj kev ncaj. Neeg tsim tej cai ntawd los mas yeej zoo rau neeg kawg, tab sis vim neeg tsim raws li neeg lub tswv yim, neeg tsa txoj cai raws li neeg xav.
Thaud, Mais Xes tsa txoj cai los tswj cov His Xas Lais xws li lwm haiv neeg nyob ntiaj teb no. txog lub caij Huab Tais Yes Xus tuaj, nws thija qhia Mais Xes txoj cai kom thoob, kom ntxaws ntxaws, kom sawv daws tsom txog lub ntsiab hauv txoj cai. Vim Huab Tais Yes Xus txoj cai yog tuaj ntawm Tswv Ntuj tuaj, yog tsa raws li Tswv Ntuj lub siab nyiam.
Cov kwv tij, Huab Tais Yes Xus cov lus hnub no, lub ntsiab yog kom peb tsis txhob sib pauj kua zaub ntsuab, tiam sis kom peb sib zam txim, sib pab thiab txaus siab tsob hwb lwm tus.
Kwv tij Hmoob sawv daws, nyob hauv peb kev ua neej mas nej yuav hnov lo lus tias ‘ib pauj ib’; yam li luag ua cas rau koj ces koj ua li ntawd rau luag. Nyob hauv cov Yus Das txoj cai muaj li ntawd. Cov Yus Das hais tias ‘qhov muag pauj qhov muag, kaus hniav pauj kaus hniav.’ Yog tias ib tug twg ua koj ib sab qhov muag puas, tus ntawd kuj tsum raug dawj ib sab qhov muag pov tseg; tus twg ua koj ib tug kaus hniav lov, tus ntawd kuj yuav raug lub txim kom ib tug kaus hniav ploj. Yog li mas thaum koj txo ib tug neeg twg txoj sia, koj thiaj yuav tau txais lub txim tuag.
Peb hnov tej lus hais tias luag ua txhaum rau koj, mas luag yuav tsum raug ib lub txim hnyav los sib raws li yam luag ua txhaum rau koj. Peb hnov hais tias yog ib tug neeg nyiag lwm tus lub cuab tam mus, mas nws yuav pauj rov rau.
Tsis yog cov Yus Das xwb, tab sis cov tiam neeg txheej thaud lawv puav leej coj zoo li ntawd. Lawv hais tias qhov ntawd yog ‘qhov ncaj’, yog tsis ua li mas nyob tsam cia li muaj tej tus ua ib pauj ob; yam li luag ua koj dig muag, koj cia li mus muab lawv tua pov tseg. Ntawm Tswv Ntuj tsis yog li ntawd. Luag ua phem rau koj, mas koj txhob ua pauj rau luag. Qhov no yog Tswv Ntuj qhov ncaj. Hnub no, peb thiaj hnov Huab Tais Yes Xus cov lus hais tias “Leej twg ib ncuav pias rau koj sab plhu xis, koj tig sab plhu laug rau nws thiab. Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. Leej twg thov koj xa nws mus ib ncuas kev, koj nrog nws mu sob ncuas. Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.”
Nyob rau lub zim txwv no, tseem muaj tej lub teb chaws coj txoj cai qhov muag pauj qhov muag, kaus hniav pauj kaus hniav zoo li ntawd, los muaj tej tus hais tias tsim nyog yuav rov siv txoj cai no kom lub teb chaws thiaj nyob tau nyab xeeb, yog tsis li mas cov neeg phem yuav tsis paub ntshai txoj cai. Los nyob hauv peb lub neej, yog nyob nyob muaj ib tug ua phem rau yus, mas yus yeej xav ua kiag pauj rau nws; yog muaj ib tug ua rau cov txheeb ze yus nqaij ntuag ntshav nrog, mws yus yeej xav ua kom tus ntawd ntxeev tiaj hlo. Qhov tiag mas qhov ntawd tsis yog qhov ncaj, yog xav pauj ‘kev chim siab’ xwb.
Hnub no, Huab Tais Yes Xus hais rau cov tuaj mloog nws tias “Kuv hais rau nej, nej tsis txhob nrog tus neeg phem sib cav.” Ces Huab Tais Yes Xus hais ntxiv tias “Leej twg ib ncuav pias rau koj sab plhu xis, tig sab plhu laug rau nws thiab. Leej twg xav txeeb koj lub tsho, mas koj muab koj lub tsho tshaj sab ntxiv rau nws thiab.” Huab Tais Yes Xus hais cov lus no, yog nws ntsia pom tias tus twg ua ib yam tsis zoo rau lwm tus, mas tus ntawd yog tus neeg phem nws thiaj ua tej yam phem. Tsis tsim nyog peb yuav ua tej yam phem rov rau tus neeg phem. Peb yim ua pauj mas yim ua rau peb muaj plaub, yim ua rau peb muaj txhaum loj.
Cov lus no yog ib co lus hais yooj yim tab sis ua tau tsis yooj yim. Cov lus no thiaj yog ib co lus twv peb saib peb puas yog Huab Tais Yes Xus tseem thwj tim tiag.
Kwv tij, kev pauj kua zaub ntsuab, pauj kev chim siab yog txhawv hauv kev npau taws muaj kev ntxub ntxaug xyaw. Qhov no yog ib txoj kev hauv xya txoj kev coj neeg mus poob hauv qhov txhaum. Yam li yog luag ua rau peb chim siab, ces peb ua kiag tej yam tsis zoo pauj, ces thaum ntawd peb poob rau hauv lub qhov txhaum kiag. Huab Tais Yes Xus tsis xav kom cov thwj tim poob rau lub qhov txhaum, Huab Tais Yes Xus thiaj hais kom cov thwj tim txhob pauj, tab sis yog luag xav tau ces muab kiag rau; yog kom cov thwj tim nyiam thiab zam rau tus ua tsis zoo rau lawv.
Huab Tais Yes Xus tsis yog qhia xwb, pom tias thaum Huab Tais Yes Xus nyob saum tus ntoo cuam, nws thov Leej Txiv tias “Txiv, koj zam rau lawv, lawv tsis paub tias lawv ua dab tsi.”
Peb cov ntseeg txog Yes Xus, peb yog Huab Tais Yes Xus cov thwj tim, mas peb thiaj yuav xyaum yoog raws li Huab Tais Yes Xus. Yog ib yam nyuaj, ib yam peb tsum ua tiag thiaj yuav ua tau, raws li puag ta tau hais tias qhov no yog qhov twv tias saib peb puas yog tseem thwj tim, tseem neeg ntseeg.
Peb ua peb xwb, mas tsis tau, peb yuav thov Huab Tais Tswv Ntuj pub nws lub txiaj ntsim tuaj pab peb, kom peb muaj ib lub siab txawj zam, ib lub siab nyiam cov ua tsis zoo, cov ua phem rau peb. Peb thov Huab Tais Tswv Ntuj pab kom peb nco ntsoov txog lo lus peb hais rau peb Txiv Tswv ntuj tias “Thov koj zam txhaum rau peb, zoo li peb zam rau luag.”
Huab Tais Yes Xus tsis xav kom lub tswv yim phem tshwm tuaj nyob hauv peb, mas Huab Tais Yes Xus thiaj ntuas kom peb tsuas saib qhov zoo ua. Yog peb ua zoo rau lwm tus, ces lawv yuav ua zoo pauj rov rau peb. Huab Tais Yes Xus thiaj hais tias “Nej txhob nrog tus neeg phem sib cav, nej txhob ntaus tus tau ntaus nej, nej txhob ua plaub rau tus kom nej, nej pab tus tuaj thov nej.” Thaum peb ua zoo li no mas lub tswv yim phem thiaj yuav tsis xeeb tuaj nyob hauv peb lub tswv yim.
