ZAJ NYEEM HNUB TIM 16 LUB 10 HLI 2024
HNUB NCO TXOG LEEJ NTSHIAB MAB LIAB AS LOS NKOS
COV LUS NYOB HAUV LUS KAS NTAWV MOO ZOO (LK 11: 42-46)
Kwv tij Hmoob sawv daws, ua cas Huab Tais Yes Xus nyiam tsawm cov Fas Lis Xais, puas yog vim Huab Tais Yes Xus ntxub lawv? Tsis yog. Huab Tais Yes Xus yeej nyiam cov Fas Lis Xais ib yam li tsoom sid, Huab Tais Yes Xus yeej xav pab cov Fas Lis Xais hloov siab tshiab ib yam li sawv daws. Tab sis vim cov Fas Lis Xais yog cov neeg kawm txuj, yog cov neeg muaj lub tswv yim ntse mas Huab Tais Yes Xus thiaj tab meeg hais cov lus kom chob chob lawv, cov Fas Lis Xais thiaj feeb tau.
Peb ua neeg nyob mas yeej zoo li ntawd; cov neeg kawm txuj, cov neeg paub ntau, cov neeg loj; mas lawv tsis tshua nyiam mloog cov neeg me hais, lawv tsis yuav lwm tus hais tej yam lawv twb paub lawm. Cov neeg yim paub ntau, cov neeg yim nyob siab mas lawv lub siab yim qhwv thiab qauj. Tsum muaj neeg hais cov lus ntxhib thiab mob mob mas thiaj yuav pab tau lawv kom lawv siab nthuav thiab muag tau.
Kwv tij, yog Huab Tais Yes Xus tsis hlub cov Fas Lis Xais mas nws yuav tsis tab meeg hais kom ntob nkaus cov Fas Lis Xais.
Hnub no Huab Tais Yes Xus hais rau cov Fas Lis Xais tias ua cas nej muab tej yam me me xws li kev them se ntawm cov puam hub, cov zaub txhwb nyug dub, ntawm txhua yam zaub saib ua qhov loj thiab tseem ceeb, tab sis tej yam tsim nyog ua xws li rau siab saib txoj kev haum pheej thiab txoj kev nyiam Tswv Ntuj, mas nej muab cia puag tom qab.
Kwv tij, peb tig rov los soj hauv peb lub siab thiab peb cov hauj lwm, saib peb puas ua xws li cov Fas Lis Xais. Niaj hnub peb puas hais rau lwm tus tias ‘koj ua li no mas’, ‘koj txhob hla txoj cai mas’ tab sis peb tsis ua.
Peb pom lwm tus ua txhaum, peb puas hais tias ‘muab txim rau nws kom hnyav ntag, kom nws txhob ua ntxiv’.
Cov kwv tij, muaj ntau zaus peb pom tso tawm hauv Facebook hais txog lawv ntes tau tej tus me nyuam Hmoob mus ua tub sab, ces lawv muab pav tes pav taw, muab pav tis qaib daim rau sawv daws ntsia, los tej tus tseem muab tus tub sab ntaus thiab tsim txom. Nej xav li cas?
Puas tsim nyog lawv yuav ua cuag ntawd?
Tus ntes tau tus tub sab mas tej zaus nws yuav tsis xav txog, vim nws npau taws los yog vim nws xav qhia cai rau tus tub sab thiab sawv daws kom ua neeg tsim txiaj thiaj tsis poob ntsej muag. Tab sis nej muab xav saib nws ua puas yog.
Huab Tais Yes Xus hais tias qhov nej yuav ua mas yog rau siab saib txoj kev haum pheej thiab nyiam Tswv Ntuj; yog kom peb xub muab lub siab nyiam thiab hlub sawv daws ua ntej, mas peb thiaj yuav khuv leej tau sawv daws.
Kwv tij Hmoob, muaj ib zaug tus Hauv Paus Xa Lus Paj Lug sau ntawv mus ntuas cov neeg ntseeg nyob hauv lub nroog Nkas Las Tias hais tias “Cov kwv tij, nej mas nej yuav nyiam Ntuj, nej yuav zoo siab ua neeg, nej yuav nyob kaj lug, nej yuav ua siab ntev, nej yuav xyiv fab pab luag tej, nej yuav ua siab zoo rau luag, nej yuav tso siab rau luag, nej yuav hlub luag, nej yuav kav nej lub cev kom zoo.”
Tus neeg muab siab saib txoj kev haum pheej thiab nyiam Tswv Ntuj mas nws yuav ua li ntawd.
Nej sawv daws los nej kuj yuav ua li ntawd nyob hauv lub neej ua neeg ntseeg thiab mog.
