ZAJ NYEEM HNUB TIM 16 LUB 1 HLIS 2025
HNUB TSIB THAWJ LUB LIS PIAM, CAIJ NYOB NRUAB XYOO
HN 3: 7-14, MK 1: 40-45
Kwv tij Hmoob zoo nyiam, hnub no peb hnov hais txog 2 lo lus: Lo lus tim ib yog lo lus tias “Hnub no, yog nej hnov Huab Tais lub suab, mas nej tsis txhob ua nej lub siab txhav xws li thaum ub, thiab xws li hnub uas nej raug sim siab nyob teb chaws suab puam. Nyob ntawd, nej cov yawg koob twb pom kuv cov hauj lwm, tsis kav lawv tseem sim kuv plaub caug xyoo. Kuv thiaj npau taws rau tiam neeg ntawd, kuv hais tias ‘Lawv lub siab niaj hnub yuam kev, lawv tsis paub kuv tej kev.’ Ces kuv npau taws, kuv cog lus tias lawv yuav tsis tau mus nyob hauv kuv lub chaw so.” Lo lus tim ob yog lo lus tias “Yes Xus hais rau nws tias ‘Koj ua twj ywm, txhob qhia dab tsi rau leej twg li’ tab sis tus neeg ntawd tawm plaws mus, nws pib tshaj tej ntawd thiab mus hais rau txhua qhov, ces Yes Xus tsis tau kev tab meeg mus hauv ib lub nroog li.”
Muaj tej zaus mas peb xav tias peb yuav tshaj txog Huab Tais Yes Xus kev cawm neej rau luag tej tau paub, ces peb cia li tab meeg piav txog Huab Tais Yes Xus rau lawv. Muaj tej zuas mas peb xav tias Huab Tais Tswv Ntuj qhia kom peb sib nyiam sib hlub, tab sis ua cas lub Koom Txoos hos muaj tej tsab cai txwv peb ua yam ub yam no. Piv li muaj ib tug neeg nws txo nws txoj sia, mas cov ntseeg sib cav tias puas yuav phim cia coj nws tus qauv mus ua lub Txoos nyob hauv lub tsev teev Ntuj los tsis kheev cia vim tias muaj tej tus Txiv Plig kam hos tej tus Txiv Plig tsis tso cai ces qhov no ua rau sawv daws sib faib ua 2 pab tsis sib haum. Tsoom ntseeg tsis nco lawm tias Huab Tais Yes Xus xaiv cov Txiv Plig los leg txoj kab xwm Leej Choj mas nyob ntawm tus Txiv Plig yuav hais li cas ces yog li ntawd.
Piv txwv li muaj ib yim neeg muaj niam hlob niam yau lawv xav los txais kev ntseeg mas lub Koom Txoos kom tus txiv xaiv yuav ib tug tseg ib tug, mas muaj ib txhia ntseeg hais tias ua cas Huab Tais Yes Xus qhia kom sib nyiam sib hlub es lub Koom Txoos ho yuav muab lawv sib cais li ntawd.
Peb tsis paub tias xyov yam twg yog ua xis Tswv Ntuj siab, yam twg peb ua xis peb siab.
Hnub no Huab Tais Yes Xus txwv tus muab ruas nruj nruj tias kom nws tsis txhob qhia rau leej twg paub tias yog Yes Xus ua kom nws rov huv tuaj. Tus mob ruas zoo siab dhau nws tsis mloog Huab Tais Yes Xus cov lus, nws xav tias kuv yuav tsum qhia sawv daws kom paub tias leej twg yog tus cawm kuv, ces nws hais qhia sawv daws paub ua rau Huab Tais Yes Xus tsis tau kev tab meeg mus hauv lub nroog.
Muaj ntau zaus peb zoo li ntawd, peb lub siab kub lug xav tshaj Yes Xus kev cawm peb rau luag tej, peb xav qhia lawv txog txoj kev ntseeg, tab sis ua cas lub Koom Txoos txwv tias txhob maj tsis tau txog caij.
Peb yuav muab ua tib zoo xav saib yog peb xav ua xis peb siab, los yog peb ua kom xis Tswv Ntuj siab; yog peb lub siab txhib peb, los yog Leej Ntuj Plig Ntshiab tshoj peb.
Muaj ib zag nyob hauv phau ntawv Vaj (1V 13: 1-30) hais txog lub zim txwv Yes Los Npuag txhim lub thaj txi Ntuj nyob Npes Thes, mas Huab Tais Tswv Ntuj tshoj ib tug neeg tuaj ntuas Yes Los Npuag. Huab Tais Tswv Ntuj tseem hais rau tus neeg ntawd kom txhob noj mov los yog haus dej nyob hauv His Xas Lais teb chaws. Tus neeg ntawd ua raws li Huab Tais Tswv Ntuj hais, tab sis muaj ib tug Yaj Saub caum tus neeg ntawd qab mus thiab hais rau tus neeg ntawd tias “Koj yog Tswv Ntuj tus neeg tuaj Yus Das teb tuaj puas yog?” Tus neeg ntawd teb tias “Yog mas.” Ces tus Yaj Saub caw kom tus neeg ntawd mus so thiab noj hais hauv nws tsev tab sis tus neeg ntawd hais tias Huab Tais Tswv Ntuj txwv tsis kheev nws noj mov thiab haus dej nyob hauv His Xas Lais teb. Tus Yaj Saub hais lus sim tus neeg ntawd siab tias “Kuv yog Yaj Saub ib yam li koj, Huab Tais Tswv Ntuj txhib nws cov Tshiab los hais lus rau kuv kom coj koj mus so hauv kuv tsev thiab ua ib pluag hmo txais koj.” Tus neeg ntawd xav tias ntshai muaj tseeb li tus Yaj Saub hais, ces nws mus so thiab noj haus tom tus Yaj Saub tsev.
Thaum nkawd tab tom noj mov, Huab Tais Tswv Ntuj tshoj tus Yaj Saub siab ces nws hais rau tus neeg tuaj Yus Das teb tuaj tias “Huab Tais Tswv Ntuj his li no; hnub no koj tsis mloog Huab Tais Tswv Ntuj lo lus, koj tsis ua raws lu Huab Tais Tswv Ntuj qhia, mas koj yuav rov mus tsis txog koj lub teb chaws.”
Ces muaj li ntawd tiag, tus neeg ntawd sawv kev los txog tom tog kev, txawm muaj ib tug tsov ntxhuav muab nws tom tuag.
