ZAJ NYEEM HNUB TIM 15 LUB 9 HLI 2025
HNUB NCO TXOG NIAM MAB LIAB LUB SIAB MOB
COV LUS NYOB HAUV ZAM NTAWV MOO ZOO (Z 19: 25-27)
Kwv tij sawv daws, niam Mab Liab yog tus piv txwv ntawm kev ua ib tug neeg ntseeg Ntuj, uas yog koom nrog Huab Tais Yes Xus, nws koom ua ib lub siab nrog Huab Tais Yes Xus tshaj lub Moo Zoo thiab txhiv lub qab ntuj neeg kev txhaum. Huab Tais Yes Xus yog niam Mab Liab leej tub uas nws hlub tshaj plaws, tiam sis niam Mab Liab tsis txwv Huab Tais Yes Xus txoj hau kev, tab yog Yes Xus txoj kev tuag.
Kev uas nws leej niam ntsia ntsoov luag coj leej tub mus tua, mas yog ib yam uas mob siab tshaj plaws. Tiam sis txawm niam Mab Liab mob siab npaum li cas, tsis kav, nws tsis cheem Huab Tais Yes Xus, vim nws paub tias Huab Tais Yes Xus txoj kev tuag no, yog txoj kev cawm neeg ntiaj teb sawv daws kom tau txais kev dim.
Li ntawd, niam Mab Liab thiaj yog ib leej niam uas muaj meej mom tshaj plaws, yog peb lees txais Huab Tais Yes Xus ua peb tus Tswv Ntuj, peb kuj yuav tsis xyeej txais niam Mab Liab ua peb Leej Niam thiab. Vim niam Mab Liab yog thawj tus neeg uas lees txais Huab Tais Yes Xus, uas yog Tswv Ntuj Leej Tub, nws paub zoo tias Huab Tais Yes Xus yog Tswv Ntuj Leej Tub, thiab nws lees txais Huab Tais Yes Xus tuaj nyob hauv nws. Nws tso siab rau Yes Xus. Nws tau coj lub neej koom nrog Huab Tais Yes Xus tshaj lub Moo Zoo rau neeg ntiaj teb sawv daws.
Li ntawd, niam Mab Liab tus piv txwv yog ib tug piv txwv qhia kom peb coj lub neej raws Huab Tais Yes Xus thiab lees txais Huab Tais Yes Xus tuaj nyob hauv peb, cia nws ua peb tus tswv. Ces peb thiaj yuav yog Yes Xus ib tug tseem thwj tim.
Nyob zoo sawv daws.
