ZAJ NYEEM HNUB TIM 15 LUB 4 HLIS, HNUB OB LUB LIS PIAM 3 CAIJ HLA
COV LUS NYOB HAUV ZAM NTAWV MOO ZOO (Z 6: 22-29)
Cov kwv tij, nyob hauv Huab Tais Yes Xus lub neej mas nws tau ua ntau yam hwj huam rau tsoom sid pom, tab sis lawv tsis to taub tias nws yog tus cawm lawv hauv txoj kev txhaum. Lawv tsuas xav tias thaum lawv raws Huab Tais Yes Xus mus mas lawv yuav tau noj tsau plab, lawv yuav tau raws li lawv lub siab ntshaw.
Nyob hauv peb, mas peb txhob xav zoo li ntawd, peb txhob xav tias peb tig los ntseeg Ntuj mas yog kom peb tau raws li peb txoj kev vam kev ntshaw, peb tig los ntseeg Ntuj kom peb tau txais kev pab ntawm tsoom ntseeg, peb tig los ntseeg Ntuj kom peb lub neej dim kev txom nyem.
Yog peb xav li no, mas muaj ib hnub twg peb tsis tau raws li peb txoj kev xav kev ntshaw, ces peb yuav thim txoj kev ntseeg Ntuj.
Kwv tij Hmoob sawv daws, Ntawv Moo Zoo hauv hnub no mas Huab Tais Yes Xus hais kom peb txhob ua cov hauj lwm nrhiav tej yam txawj lwj txawj ploj, tiam sis yog kom peb ua cov hauj lwm nrhiav cov txhiam xws pub txoj sia nyob mus li; yog ntseeg txog Huab Tais Yes Xus, txawm tias peb yuav ntsib kev txom nyem, raug iab hiam, tsis tau raws lub siab ntshaw; los peb yuav tsis tso txoj kev ntseeg pov tseg xws li thawj tug neeg tuag ua Yes Xus tim khawv nyob hauv Yes Lus Xas Les hu ua Tes Fas Nos, thiab tus Leej Ntshiab peb nco txog hauv hnub no, yog Leej Ntshiab Fis Des Lis.
Kwv tij, kuv thov piav me ntsis yog Leej Ntshiab Fis Des Lis lub neej ua hauj lwm nrhiav txhiam xws nyob mus li, rau nej mloog li no tias Leej Ntshiab Fis Des Lis yog ib tug Txiv Plig yug xyoo 1578. Thaum nws muaj 24 xyoos, nws txiav siab txais lub Cim Tiag Tes, ces nws ua lub neej Leej Choj nruj, nws niaj tag kis sawv ntxov ntxov los teev Ntuj tsis tseg.
Xyoo 1622 thaum nws muaj 34 xyoos, Txiv Plig Fis Des Lis raug ib pab neeg siab phem siab lim hiam ntes mus tsim txom kom nws thim kev ntseeg txog Yes Xus, tab sis Txiv Plig Fis Des Lis yeem tuag zoo dua tso nws txoj kev ntseeg txog Yes Xus pov tseg, ces lawv thiaj muab nws tua tuag ua tim khawv.
Kwv tij Hmoob, txawm Txiv Plig Fis Des Lis lub cev tuag lawm, tsis kav nws tus plig tau txais txoj sia nyob mus li lawm tiag, nws tau ua ib tug Leej Ntshiab nyob ze ntawm Huab Tais Yes Xus pem Tswv Ntuj lub Ceeb Tsheej lawm.
Peb yuav xyaum kawm ntawm nws thiab ib tsoom Leej Ntshiab lawv lub neej mog.
