ZAJ NYEEM HNUB TIM 15 LUB 3 HLIS 2025
HNUB XYA, LIS PIAM 1 CAIJ PLAUB CAUG
(TCO 26:16-19; MT 5: 43-48)
Kwv tij Hmoob, muaj ib yam nyuaj tshaj plaws nyob hauv neeg lub neej; yog nyiam yus tus yeeb ncuab los tus ntxub yus.
Muaj ib hnub thaum cov neeg ntseeg tab tom mloog Txiv Plig nthuav Tswv Ntuj Lo Lus hauv lub txoos txog Huab Tais Yes Xus lo lus qhia tias “Nej yuav nyiam nej cov yeeb ncuab” mas cov ntseeg ib txhia pib sib tham tias “Peb twb ntxub peb tus yeeb ncuab tas npaud, ua li cas peb tseem yuav nyiam nws thiab.”
Muaj ib tug poj niam Hmoob, tas nws sid mas nws txuas hais txog qhov ntxub tus ub ntxub tus no, nws pom kiag luag tej xwb mas nws tseem sid hais tias “Ua cas kuv yuav meem txom ua luaj, kuv dhuav niag ntsej muag ntawd kawg li.” Ces nws tsis muaj kev nraug zoo nrog sawv daws. Luag tej hais lus zoo rau nws los nws ua ntsej muag duab nciab tsis luag tsis ntxi kaus rau tus twg li.
Nej puas paub tus poj niam no ua lub neej nyob zoo li cas? Nws nyob kaj siab los nws nyob yam ntxhov siab?
Ib txwm nws yeej coj zoo li ntawd, ces nyob nyob muaj ib hnub xyov nws xav li cas, nws cia li mus tsham cov neeg nws ntxub nws tsis nyiam. Hnub ntawd, nws hais lus luag ntxhi, nws ua ntsej muag luag hnyav, nws hais lus zoo rau sawv daws. Ob peb hnub tom qab nws cia li tuag, tab sis nws lub ntsej muag tshiab khiv tsis zoo li thaum nws tseem ua neej nyob.
Kwv tij, ua cas kuv ho piav qhov no rau nej mloog.
Yog kuv xav kom nej pom tias tus neeg muaj lub siab nyiam lwm tus mas thaum kawg lawv zoo li cas.
Peb saib ntawm tus poj niam no xwb peb pom tias thaum nws txawj tso lub siab ntxub pov tseg tig los hnav lub siab nyiam mas nws lub siab kaj tuaj, ces thaum nws tuag nws lub ntsej muag thiaj tshiab khiv.
Tus nyiam lwm tus mas twb zoo cuag no, yog li tus nyiam tus neeg ntxub nws, tsim txom nws, ua yeeb ncuab nrog nws, mas tus ntawd yim tsis muaj lub siab kaj tshaj no lod?
Li ntawd, lub caij Plaub Caug no peb yuav thov Huab Tais Yes Xus pab peb kom peb hloov tau peb lub siab, kom peb nyiam tau tus neeg ua yeeb ncuab rau peb yam li Huab Tais Yes Xus nyiam cov neeg liam txim rau nws kom raug tuag saum Ntoo Cuam, thov Leej Txiv zam rau cov neeg thuam nws nyob saum Ntoo Cuam.
Peb thov Huab Tais Yes Xus pab peb kom peb yeej lub siab nqaim siab phem no, kom peb hnav tau Huab Tais Yes Xus lub siab nyiam lwm tus.
