ZAJ NYEEM HNUB TIM 13 LUB 12 HLIS: HNUB NCO TXOG LEEJ NTSHIAB LUS XIS AS
COV LUS NYOB PHAU NTAWV HIS XAIS (HX 48: 17-19)
LUB MOO ZOO RAWS LI MAS TAIS (MT 11: 16-19)
Kwv tij Hmoob sawv daws, hnub no peb hnov Huab Tais Yes Xus muab cov neeg Yus Das piv rau cov me nyuam yaus, vim cov Yus Das tsis quav ntsej mloog Tswv Ntuj lus, lawv tsis quav ntsej tias lub ntuj lub teb yuav zoo li cas. Zam Ntxuav Plig yuam nws lub cev nruj them txim, mas tas sawv daws hais tias Zam raug dab, Huab Tais Yes Xus noj mov haus cawv fim cov neeg txhaum, mas sawv daws hais tias Huab Tais Yes Xus yog neeg quav dej quav cawv. Xyov tem cov Yus Das xav tau tus neeg zoo li cas tiag!
Sawv daws zoo li cov me nyuam yaus ua si tom tshav puam; ib tug tshuab raj lom zem tab sis ib tug tsis nrog nws dhia, ib tug ua si tu siab ntso tab sis lwm tus ho zaum luag cuj caws.
Kwv tij Hmoob, muaj ntau zaus tus Txiv Plig nthuav Tswv Ntuj Lo Lus hauv lub Txoos, nws nthuav tas nws nug sawv daws tias ‘Nej puas to taub?’ Sawv daws nyob ntsiag to tsis teb dab tsi. Muaj ntau zaus tus Txiv Plig nug sawv daws tias ‘Lub caij Yes Xus yug los, nej xav kom peb lub tsev teev Ntuj ua kev lom zem dab tsi?’ Sawv daws kuj nyob ntsiag to.
Xyov tas lub Txoos, sawv daws pua to taub Txiv Plig cov lus, xyov tas sawv daws puas xav kom muaj kev lom zem nyob hauv lub caij Yes Xus yug los.
Peb muab hais li no; yog kom sawv daws to taub Huab Tais Yes Xus cov lus piv cov Yus Das zoo li cov me nyuam yaus ua si tom tshav puam.
Kwv tij, Huab Tais Yes Xus cov lus no kuj zoo hais los piv rau peb tiam neeg no thiab, vim tias lub zim txwv no peb pom nyob ib ncig peb muaj cov neeg ntsuag nos, cov neeg txom nyem, cov neeg tos kev pab cawm; tab sis zoo li sawv daws lub siab txhav ces sawv daws tsis quav ntsej nqes tes pab lawv.
Lub caij nyem no, sawv daws nyeem Ntawv Ntshiab, mloog cov tub tshaj Ntuj Lus nthuav Tswv Ntuj Lo Lus tab sis tsis khaws mus ua raws.
Kwv tij Hmoob sawv daws, hnub no peb tseem hnov tus Yaj Saub His Xais cev Huab Tais Tswv Ntuj rau cov His Xas Lais zoo li no tias “Ab! Kheev lam koj muab siab rau mloog kuv cov lus qhia, mas koj kev vam meej yuav zoo li ib tug niam dej, koj txoj kev ncaj yuav zoo li cov dej nyob hauv hiav txwv, koj tsoom xeeb ntxwv yuav coob ib yam li cov suab puam.”
Kwv tij, Huab Tais Tswv Ntuj yog tus pheej xeeb thiab txiav ncaj, Huab Tais Tswv Ntuj tau hais li cas mas nws yuav ua raws li ntawd. Yog li mas peb kav tsiji mloog Tswv Ntuj Lo Lus, tshwj xeeb mas yog cov lus Huab Tais Yes Xus qhia rau peb, ces peb thiaj yuav tau txoj koob hmoov li Huab Tais Tswv Ntuj cov lus tus Yaj Saub His Xais tau hais los ntuas cov His Xas Lais ntawd.
