ZAJ NYEEM HNUB TIM 12 LUB 8 HLI 2025
HNUB NCO TXOG LEEJ NTSHIAB ZUAM FOOS XUAS
COV LUS NYOB HAUV MAS TAIS NTAWV MOO ZOO (MT 18:1-5, 10, 12-14)
Kwv tij Hmoob sawv daws, hnub no peb hnov Huab Tais Yes Xus hais txog 2 lo lus. Thawj lo lus yog Huab Tais Yes Xus ntuas kom peb ua neeg me xws li cov me nyuam. Lo lus tim 2 yog Huab Tais Yes Xus hais txog tus tswv zov yaj nrhiav tau tus yaj poob zoo, mas nws muaj kev zoo siab loj.
Huab Tais Yes Xus hais tias “Yog nej tsis hloov rov los ua xws li ib co me nyuam mas nej yuav mus tsis tau hauv Ntuj lub Ceeb Tsheej.”
Huab Tais Yes Xus lo lus no tseem ceeb kawg, yog tias peb ua neej nyob ua ib npoj, ua ib pawg. Vim tias thaum muaj neeg coob coob tuaj sib sau nyob ua tej npoj tej pawg, mas yog sawv daws muab hlob, ib tug tsis yuav ib tug, lawv yuav nyob ua ke sib haum xeeb puas tau?
Hnub no nyob hauv Huab Tais Yes Xus 12 tug thwj tim kuj muaj zoo li ntawd, lawv sib cav tias nyob hauv lawv 12 tug ntawd, tus twg yuav yog tus loj, yog tus coj sawv daws.
Huab Tais Yes Xus pom qhov ntawd, nws thiaj coj ib tug me nyuam los sawv nyob nruab nrab hauv lawv, thiab ntuas lawv kom hloov los ua xws li ib co me nyuam.
Hloov los ua xws li ib co me nyuam, yog zoo li cas?
Cov me nyuam yog cov lub siab nyob kaj lug, lub ntsej muag luag ntxhi, lub tswv yim dawb paug xws li daim ntaub dawb tsis tsuas ib qho tsaus. Cov me nyuam lawv nyob ib leeg tsis tau, lawv thov kev pab ntawm lwm tus.
Huab Tais Yes Xus xav kom peb ua zoo li ntawd, ua lub siab kaj lug, luag ntxhi rau sawv daws, muab siab dai dhuam rau Tswv Ntuj xws li cov me nyuam dai dhuam rau leej niam thiab leej txiv, txawj tso lub hwj chim los thov kev pab ntawm sawv daws.
Nyob hauv cov Yus Das, lawv saib cov me nyuam yog cov neeg tsis muaj tsim tsis muaj qab hau rau lawv, mas Huab Tais Yes Xus xav kom cov thwj tim saib lawv zoo li ntawd. Cov thwj tim tsis txhob xav tias lawv raws Huab Tais Yes Xus kom tau ua tus loj, kom tau lus qhuas, kom tau ua tus tswh sawv daws.
Kwv tij Hmoob, peb yeej pom tias tus neeg twg muab hlob, mas tsis muaj leej twg xav mloog nws, pab nws. Tus neeg twg ua ib tug me tsis ua tub qaug luag tej, mas sawv daws nyiam thiab pab nws ntau. Li ntawd, peb yuav ua zoo li cov me nyuam.
Huab Tais Yes Xus hais tias “Tus twg txais ib tug me nyuam vim kuv lub npe, mas yog nws txais kuv”, yog txhais tias thaum peb pom ib tug neeg tsis muab hlob mas peb yuav hwm tus neeg ntawd thiab saib nws muaj tsim, ces peb yuav nyiam yuav hlub tus neeg tsis muab hlob.
Huab Tais Yes Xus tseem ntuas peb kom tsis txhob thuam cov neeg tsis paub dab tsi, xws li cov kwv tij tseem coj kev cai dab qhuas uas lawv tsis tau paub txog Tswv Ntuj. Huab Tais Yes Xus qhia kom peb mus nrhiav lawv thiab coj lub Moo Zoo mus txog lawv, mas muaj ib hnub lawv yuav to taub txog Tswv Ntuj, ces lawv yuav tig los nyob hauv txoj kev ntseeg; Huab Tais Yes Xus thiaj hais tias “Nej Txiv nyob saum ntuj kuj yuav zoo siab thaum nws nrhiav tau ib tug yaj poob zoo, vim nej Txiv tsis xav kom nws ib tug yaj ncaim npoj mus.
Kwv tij Hmoob sawv daws, hnub no nej yuav nco ntsoov ua tus neeg me, nej yuav npuab Tswv Ntuj, vam txog Tswv Ntuj, nej yuav tsob hwb luag tej thiab coj lub Moo Zoo mus kom txog nej cov kwv tij tseem tsis tau paub txog Tswv Ntuj.
Nyob zoo sawv daws.
