ZAJ NYEEM HNUB TIM 12 LUB 9 HLI 2024
NIAM MAB LIAB LUB NPE NTSHIAB
COV LUS NYOB HAUV LUS KAS NTAWV MOO ZOO (LK 6: 27-38)
Kwv tij Hmoob sawv daws, yog nej mloog lub Moo Zoo nag hmo mas nej hnov cov lus hais tias peb xaiv tau saib yuav ua tus neeg tau txoj hmoov zoo los tus tau txoj hmoov phem. Huab Tais Yes Xus cov lus hauv hnub no mas peb kuj yuav muab los piav nthuav txog ob qib lus peb hais no.
Cov neeg tau txoj hmoov phem, yam li tus neeg nplua nuj, tus neeg noj tsau, tus neeg nyob luag ntxhi tsis muaj kev quaj ntsuag, tus neeg muaj luag lwm tus hwm, mas nws kuj yuav tau txais koob haum yog nws ua raws li Huab Tais Yes Xus cov lus hauv hnub no.
Nws nyiam nws cov yeeb ncuab, nws ua zoo rau cov neeg ntxub nws, nws foom lus zoo rau cov neeg foom phem rau nws, nws thov Ntuj rau cov neeg xyav nws moo.
Nws pub rau cov neeg thov ntawm nws, nws hlub lwm tus, nws tsis txiav txim rau lawv, nws zam txhaum rau cov neeg ua tsis zoo rau nws.
Cov neeg tau txoj hmoov zoo; yam li cov neeg pluag, cov neeg tshaib, co quaj ntsuag, cov raug hiam; yog lawv tsis txawj nyiam cov ua yeeb ncuab rau lawv, yog lawv tsis ua zoo rau cov neeg ntxub lawv, yog lawv tsuas muaj foom lus phem rau tus foom phem rau lawv xwb, yog lawv nyiam txiav txim rau lwm tus, yog lawv tsis txawj hlub cov neeg txom nyem dua lawv, lawv tsis txawj zam rau cov tau hiam lawv; mas lawv kuj yuav tsis tau txais koob haum loj dab tsi.
Cov kwv tij, tej zaus nej yeej yuav hnov ntau tus neeg hais tias ‘peb txom nyem cuag no, peb yuav muaj peev xwm qhov twg mus hlub tau lwm tus’, los muaj tej tus hais tias ‘kuv twb tshaib plab tas npaud, kuv yuav faib kuv pluas mov rau lwm tus noj tau li cas’.
Muaj tej tus yeej hais zoo li ntawd tiag, tab sis peb ua tib zoo xav saib txawm tias peb yog neeg txom txom nyem tas npaud, los peb tseem muaj tej yam nplua nuj dua lwm tus thiab. Peb tsis tas yuav muab qhov peb tsis muaj ntawd coj mus pub rau cov tsis muaj ib yam li peb, tab sis peb yuav muab yam peb muaj coj mus pub rau tus tsis muaj.
Piv li tus neeg tsis muaj nyiaj muas nqaij los noj, tab sis nws muaj zaub; nws coj zaub mus pub rau tus muaj nqaij, tus muaj nqaij coj nqaij mus pub rau tus muaj zaub. Nkawd ob leeg sib pub li no.
Peb rov qab los hais txog lub Moo Zoo hauv hnub no; muaj ib yam peb sawv daws yeej muaj tib yam, thiab Huab Tais Tswv Ntuj xav kom peb muab pub rau lwm tus; yam ntawd yog ‘lub siab zam’.
Kuv muaj, koj kuj muaj, peb sawv daws yeej muaj. Peb yuav rho lub siab zam ntawd los sib pub, mas peb sawv daws thiaj yuav yog tus tau txoj hmoov zoo.
