ZAJ NYEEM HNUB TIM 12 LUB 4 HLIS, HNUB RAU LUB LIS PIAM 2 CAIJ HLA
COV LUS NYOB HAUV ZAM NTAWV MOO ZOO (ZM 6: 1-15)
Kwv tij Hmoob sawv daws, lub Moo Zoo hnub hais txog thaum Huab Tais Yes Xus ua kom cov mov ntsu tuaj txaus yug tsib txhiab leej neeg noj. Nyob hauv zaj no mas muaj ntau tus kws nthuav Ntawv Ntshiab hais tias Huab Tais Yes Xus ua hwj huam kom cov ncuav mov ntsu tuaj tiag, muaj tej tus hais tias yog ib zag paj lug xav qhia peb tias thaum peb ib leeg qee ib yam peb muaj los pub rau tus tsis muaj, mas qhov kawg peb sawv daws yuav muaj tas txhuam yam zoo li thaum lwm tus pom tus me nyuam yaus yeem muab nws cov ncuav mov thiab ntses pub rau sawv daws, ces lawv thaum cov ncuav mov lawv muaj los koom nrog thiab, mas 5 lub ncuav mov thiaj ntsu tau ua txhiab vam lub rau sawv daws noj.
Hais li cas los yeej yog, tab sis hnub no peb xav kom sawv daws nco tias Huab Tais Yes Xus hlub cov neeg raws nws qab, Huab Tais Yes Xus tsis pub lawv ib tug raug txom nyem.
Niaj hnub no, Huab Tais Yes Xus tseem hlub peb thiab ntsia ntsoov peb, nws pab peb tsis tseg.
Nyob ntawm peb sawv daws, saib peb ntsia puas pom xam pos txog. Los peb pheej muab peb lub tswv yim los plooj peb lub siab kom txhob pom txog yam Huab Tais Yes Xus pab peb, xws li cov neeg raws Huab Tais Yes Xus hauv lub Moo Zoo hnub no, lawv tau kev pab kom txhob tshaib, lawv tau pom lub hwj huam; tab sis lawv lub tswv yim tsuas xav ntsoov tias Huab Tais Yes Xus yuav yog tus coj lawv ntawm tsam cov Los Mas, coj lawv dim hauv kev ua qhev; mas lawv lub siab thiaj xav tsa Huab Tais Yes Xus ua lawv tus vaj.
Kwv tij Hmoob, hnub no peb yuav nrhiav ib qho chaw xu kev, peb yuav nyob ib leeg twj ywm xav txog lub Moo Zoo, peb yuav thov Huab Tais Tswv Ntuj pub Leej Ntuj Pig los kaj peb lub siab, peb yuav thov Huab Tais Tswv Ntuj pub lub siab ntseeg rau peb.
