ZAJ NYEEM HNUB TIM 12 LUB 3 HLIS 2025
HNUB PLAUB, LIS PIAM 1 CAIJ PLAUB CAUG
(YN 3:1-10; LK 11:29-32)
Kwv tij Hmoob, hnub no peb hnov Huab Tais Yes Xus hais tias tiam neeg no yog ib tiam neeg phem, lawv taij ib lub cim tab sis lub cim lawv yuav pom kawg yog Yos Nas lub cim xwb.
Yos Nas lub cim yog dab tsi?
Nyob hauv phau ntawv Yos Nas piav tias Tswv Ntuj lub suab nrov tuaj rau Yos Nas kom nws ceeb toom Tswv Ntuj cov lus rau lub tuam tsheej Nis Nis Vas. Yos Nas tsis mloog Tswv Ntuj lus ces nws khiav mus rau Tas Xis kom nws tau nyob deb ntawm Tswv Ntuj. Thaum Yos Nas nyob saum lub nkoj, Tswv Ntuj tso cua hlob tuaj ntsawj lub hiav txwv ua lub nkoj yuav luag tawg tas. Cov tub nquam nkoj ntshai. Lawv nyias thov nyias tus dab tuaj pab thiab lawv ntaus kuam saib yog leej twg coj xwv txheej tuaj rau lawv. Lawv txawm ntaus kuam, ces raug Yos Nas. Lawv nug Yos Nas tias yuav ua li cas rau kom lub hiav txwv rov tus yees. Yos Nas thiaj hais kom lawv muab nws pov rau hauv lub hiav txwv, mas dej thiaj yuav tus.
Lawv muab Yos Nas pov rau hauv lub hiav txwv. Tswv Ntuj ua kom ib tug ntses loj loj tawm tuaj nqos Yos Nas. Yos Nas nyob hauv tus ntses plab peb hnub peb hmos. Nws teev Ntuj, ces Tswv Ntuj hais rau tus ntses kom mus ntuav Yos Nas rau tim ntug dej. Yos Nas hnov Tswv Ntuj lub suab txhib nws yog zaum ob, ces nws mloog Tswv Ntuj lus, nws sawv kev tsees mus lawm Nis Nis Vas. Yos Nas ceeb toom Tswv Ntuj cov lus rau lub tsheej ces tas cov neeg ntseeg Tswv Ntuj cov lus, lawv them txim thiab tso txoj kev txhaum tseg, ces Tswv Ntuj thiaj tsis nplua lub tsheej Nis Nis Vas.
Yog li mas Yos Nas lub cim thiaj yog ‘tu siab rau kev txhaum thiab hloov siab tshiab’. Tab sis Huab Tais Yes Xus ua ntau lub cim rau lawv pom, tsis kav lawv tsis hloov siab tshiab los ntseeg txog nws.
Huab Tais Yes Xus hais ntxiv tias lub caij Xas Los Moos ua vaj mas tus poj vaj nyob Naj Fab xav hnov Xas Los Moos cov lus thoob tsib mas nws tuaj puag tim npoo ntiaj teb tuaj rau His Xas Lais teb kom tau mloog Xas Los Moos cov lus thoob tsib. Tab sis cov Yus Das muaj Huab Tais Yes Xus tus yog Kev Thoob Tsib nyob nruab nrab lawv, tsis kav lawv tsis muab siab rau mloog.
Huab Tais Yes Xus tseem hais tias vim cov Yus Das tsis ntseeg thiab tsis mloog nws mas hnub txiav txim cov neeg nyob Nis Nis Vas thiab tus poj vaj Naj Fab yuav muab txim rau lawv.
Kwv tij Hmoob sawv daws, peb tig los ntsia peb lub neej niaj hnub no, muaj ntau zaus peb hais tias “Huab Tais Tswv Ntuj, thov koj pab kuv” tab sis thaum Tswv Ntuj pab peb mas peb tsis nco pom txog Tswv Ntuj, peb tsis ntseeg txog Tswv Ntuj. Tsim nyog peb tau txais kev pab lawm, peb tsum ntseeg txog Tswv Ntuj ces peb hloov siab ua tus neeg tshiab nyiam Tswv Ntuj thiab hlub lwm tus.
Muaj ntau zaus peb hais tias “Txij thaum kuv los ntseeg Ntuj mas ua cas Tswv Ntuj tsis teb kuv lus thov li” los hais tias “Ua cas Tswv Ntuj tsis pub ib lub cim rau kuv pom kom kuv ntseeg ruaj.” Puas yog peb tab tom ua li cov neeg Yus Das taij ib lub cim ntawm Huab Tais Yes Xus?
Kwv tij, tsis muaj lub cim twg loj dua Yes Xus lub cim lawm? Puas muaj ib yam dab tsi loj dua qhov tias Tswv Ntuj pub nws Leej Tub Yes Xus rau peb?
Yeej tsis muaj ib lub cim twg yuav loj dua Yes Xus, yeej tsis muaj ib yam twg yuav loj dua Tswv Ntuj kev hlub peb txog qhov nws yeem muab nws Leej Tub los txhiv peb hauv kev tuag npo peb hauv kev txhaum.
Peb pom Huab Tais Yes Xus lub cim thaum peb mloog thiab nyeem Yes Xus lub Moo Zoo. Peb pom qhov Tswv Ntuj pub rau peb thaum peb ntsia Huab Tais Yes Xus dai saum tus Ntoo Cuam. Li ntawd, thaum peb mloog Yes Xus cov lus thiab ntsia Yes Xus saum Ntoo Cuam, mas peb kav tsij tu siab rau peb cov txhaum, peb hloov siab tshiab los ua xis Tswv Ntuj siab, peb ntseeg txog Huab Tais Yes Xus mog.
