ZAJ NYEEM HNUB TIM 10 LUB 4 HLIS, HNUB PLAUB LUB LIS PIAM 2 CAIJ HLA
COV LUS NYOB HAUV ZAM NTAWV MOO ZOO (ZM 3: 16-21)
Kwv tij Hmoob Hmoob, hnub no Huab Tais Yes Xus hais meej kawg tias Huab Tais Tswv Ntuj nyiam peb sawv daws mas nws thiaj muab nws Leej Tub rau sawv daws. Tab sis Huab Tais Tswv Ntuj tsis yuam ib tug neeg twg, nws cia neeg xaiv saib puas yuav ntseeg los tsis ntseeg txog nws Leej Tub. Tus twg ntseeg txog Leej Tub mas nws yuav muaj txoj sia nyob mus li.
Kwv tij, lo lus tias ‘ntseeg txog Leej Tub’, yog tso siab thiaj ruaj siab rau Huab Tais Yes Xus. Yog peb ntseeg tias Huab Tais Yes Xus yog Tswv Ntuj Leej tab sis peb tsis tso siab rau Huab Tais Yes Xus, mas peb yuav tsis muaj txoj sia nyob mus li. Vim tias thaum peb tsis tso siab thiab ruaj siab rau Huab Tais Yes Xus ua tus cawm peb, mas peb thiaj tig mus nrhiav tej yam cuav.
Piv li peb cov neeg ntseeg Ntuj ib txhia; lawv hais tias lawv ntseeg Ntuj tab sis thaum lawv muaj mob los raug xwv txheej, lawv hu txog Tswv Ntuj pab tab sis lawv ho tseem mus ua neeb, fiv yeem, los yog hu plig. Lawv tsis tso siab rau Tswv Ntuj, lawv lub siab tsis ruaj rau lawv txoj kev ntseeg.
Muaj tej tus thaum raug luag hem los yog raug hiam, ces nws cia li ntshai, nws tsis nco tias nws muaj Huab Tais Tswv Ntuj pov hwm nws, nws tsis nco Huab Tais Yes Xus lo lus tias “Txhob ntshai, kuv nrog nraim nej”, ces nws cia li mus vam txog lwm yam los pov hwm nws thiab cawm nws.
Kwv tij Hmoob, tus neeg zoo li hais mas nws lam ntseeg tab sis nws tsis ntseeg txog Huab Tais Yes Xus tiag.
Tus neeg zoo li ntawd, nws ntshai tsam qhov nws ua tshwm tuaj rau sawv daws pom, mas nws thiaj npog thiab zais ntshis ua. Nws tab tom nyob hauv qhov tsaus ntuj.
Hnub no, yog peb ntseeg Ntuj thiab ntseeg txog Huab Tais Yes Xus, mas peb kav tsij tso siab rau Huab Tais Yes Xus, ces peb ua tej yam tseeb nyob hauv qhov pom kev kom sawv daws pom tias peb tab tom ua hauj lwm nyob hauv Tswv Ntuj mog.
Nyob zoo sawv daws.
