Hnub Rau tim 10 Lub 1 Hlis Ntuj 2025
Thaum Huab Tais Yes Xus pib ua Tswv Ntuj txoj hauj lwm tshaj Ntuj Lus lawm, nws mus tshaj Ntuj Lus hauv zej zos nyob ib puag ncig, nws ua hwj huam yees ntxwv pab neeg coob leej. Hauv Ntawv Moo Zoo peb hnov hnub no kuj zoo ib yam li thiab. Thaum Yes Xus nyob hauv ib lub nroog, muaj ib tug neeg mob ruas tuaj thov kom Yes Xus kho nws kom huv. Ntawm Yes Xus xub ntiag, nws pe, nws khoov ntseg muag tiav, nws thov Yes Xus. Tus neeg mob ruas cov lus thov muaj lub ntsiab lus tshaj tsim nyog uas peb yuav twm txog. Tus neeg mob ruas hais tias: “Huab Tais, yog koj xav, mas koj ua tau kom kuv rov huv.” Kwv tij sawv daws, cov lus no, peb muab los ua peb zaj thov Ntuj kuj tau. Thaum peb thov Ntuj, peb hais “Huab Tais Tswv Ntuj, yog koj xav, mas thov koj pab kuv.” Ua li no, peb tab tom thov Tswv Ntuj khuv leej peb raws li Tswv Ntuj lub siab nyiam. Peb txhob yuam Tswv Ntuj kom ua raws li peb lub siab nyiam.
Thiab muaj ib yam uas Huab Tais Yes Xus hais rau peb hnub no, yog tias nws cov lus hais rau tus neeg mob ruas tias: “Koj yuav mus thws koj lub cev rau tus Leej Choj saib, thiab koj yuav cev tej yam raws li Mais Xes qhia los ua pov thawj rau luag pom tias koj huv lawm.”
Kwv tij zoo nyiam sawv daws, yog peb tau txais Tswv Ntuj lub txiaj ntsim hauv peb lub neej, yog Tswv Ntuj foom hmoov zoo rau peb tsev neeg, yog Tswv Ntuj pab peb raws li peb thov, txhob tsis nco qab ua Tswv Ntuj tsaug, txhob tsis nco qab teev Ntuj, txhob tsis nco qab rov qab los ua Tswv Ntuj tsaug rau tej yam zoo, rau lub txiaj ntsim uas Tswv Ntuj pub rau peb.
