ZAJ NYEEM HNUB TIM 1 LUB 10 HLI 2025
HNUB NCO TXOG LEEJ NTSHIAB TES LAS XAS NTAWM TUS ME NYUAM YES XUS
COV LUS NYOB HAUV MAS TAIS NTAWV MOO ZOO (MT 18: 1-5)
Kwv tij sawv daws, Huab Tais Yes Xus qhia thiab tshaj txog Tswv Ntuj lub Ceeb Tsheej rau zeej tsoom neeg sawv daws. thiab caw sawv daws tig los yuav lub siab tshiab, tos txais Tswv Ntuj lub Ceeb Tsheej, thiab los nyob rau hauv Tswv Ntuj lub Ceeb Tsheej.
Kev tig los yuav lub siab tshiab kuj yog tias hloov siab hloov ntsws, hloov yus tus yam ntxwv qub, hloov yus txoj kev xav uas zoo li neeg ntiaj teb txoj kev xav, vim qhov Tswv Ntuj xav thiab qhov neeg xav mas sib txawv deb heev. Tswv Ntuj lub Ceeb Tsheej thiab neeg lub ceeb tsheej nyob ntiaj teb no kuj tsis zoo ib yam. Piv txwv li qhov neeg xav ua tus loj nyob ntiaj teb no, mas yog nws yuav tsum muaj nyiaj, muaj hwj chim, muaj nkoj tsheb caij, muaj vaj muaj tsev zoo, muaj liaj muaj teb ntau, muaj tub mab tub qhe, thiab ua nom ua tswv.
Qhov ntawd yog neeg ntiaj teb txoj kev xav, tab sis, nyob rau ntawm Tswv Ntuj, mas Huab Tais Yes Xus qhia meej rau peb lawm tias leej twg xav ua tus loj, mas nws yuav tsum ua tus me tshaj cov nyob ntiaj teb no, nws yuav tsum ua luag tus tub txib, los tsob hwb luag, hlub luag tej, pab luag tej, qhov ntawd, mas Ntuj thiaj saib yus yog tus loj tshaj cov.
Vim Tswv Ntuj yog tus Tswv hauv txoj kev sib nyiam sib hlub, mas nws hlub peb sawv daws, tus twg ua tau li Tswv Ntuj lub siab nyiam, mas Tswv Ntuj saib tus ntawd loj dua cov, Tswv Ntuj ntsuas ntawm peb tes dej num zoo xwb, Tswv Ntuj tsis tau ntsuas ntawm peb tej cuab yeej cuab tam.
Li ntawd, leej twg muab Tswv Ntuj txoj kev nyem kev hlub los saib hlob, thiab ua li Huab Tais Yes Xus qhia, mas tus ntawd yuav yog tus loj nyob saum Ntuj, tiam sis tsis yog tus loj li neeg ntiaj teb xav.
Nyob zoo sawv daws.
