Yes Xus txoj kev nyiam kev hlub txib
Cov phooj ywg sawv daws ! Nyob hauv Lis Piam 5 lub Caij Hla no, peb muaj ib zaj ntawv Moo Zoo tshwj xeeb kawg. Zaj ntawv Moo Zoo no nws luv heev, tab sis muaj zog kawg. Vim nws yog lub plawv tseem ceeb ntawm lub Koom Txoos. Yog qhov pib ntawm Yes Xus cov lus qhuab qhia hnub kawg. Yog cov lus qhuab qhia ntev tshaj ntawm Yes Xus nyob hauv ntawv Cog Lus Tshiab. Yog cov lus qhuab qhia ntev thiab muaj lub ntsiab tob nyob hauv fab ntsuj plig, uas Yes Xus hais nyob hauv thawj hmo ua ntej nws yuav tuag thiab yog qhov pib ntawm lub Moo Zoo no.
Nov yog ib feem ntawm Yes Xus cov lus qhuab qhia tias : “Niam cov me nyuam, niam yuav nrog nej nyob tsis ntev.” Thiab ntawd yog qhov tseeb nyob hauv thawj hmo ua ntej nws yuav tuag. Li ntawd, thiaj zoo li ib yam khoom tso tseg thiab lo lus tu moo. Yog koj xav tau, Yes Xus tab tom hais rau peb nyob hauv ntu kawg ntawm nws lub neej. Kuv paub tias tej zaum koj yuav xav tias ; kuv twb tau hnov zaj no los ze ntawm 100 zaug lawm. Saib zoo li nws yog ib zaj xwm yeem tsis muaj dab tsi, tab sis tsis yog li ntawd. Yuav kom nkag siab txog Yes Xus nyob hauv no, mas peb yuav tsum nkag siab tias kev nyiam kev hlub yog yam txawv npaum cas, nyob hauv lo lus no.
Kuv nco txog lo lus tseem ceeb ntawm Dostoevsky's uas hais tias : “Kev nyiam kev hlub tseeb tiag ntawd, yog yam tsiv thiab phem kawg.” Yog koj xav txog lo lus no nyob hauv txoj kev nyiam kev hlub mos nyoos, los saib zoo li yog ib lo lus xwm yeem tsis muaj dab tsi hauv kev xav, mas koj nyeem yuam kev lawm, koj tsis nkag siab nws. Nyob tsis deb ntawm kuv lub tsev, muaj lub tsev teev Ntuj Unitarian uas kuv kheev kheev hla. Kuv mus taw los yog kuv tsav tsheb hla, thiab nyob sab nraud muaj ib daim phiaj ntawv loj loj sau tias : “Yuav nyiam koj cov txheeb ze.” Thiab ib sab ntawm koj cov txheeb ze tsev, muaj lub Cim yog lub hnub qub uas koj nyiam.
Nws sau tias : “Tus neeg txheeb ze tawv dub, tus neeg txheeb ze tawv txho, tus neeg txheeb ze txiv neej ua poj niam, tus neeg txheeb ze tsis txwm pua, tus neeg txheeb ze uas nyiam poj niam thiab txiv neej thiab nyob tas hauv no. Ces kuv thiaj siv daim ntawv ntawd txhua lub sij hawm, thiab txhua zaus kuv ua kuv kuj xav tias yog, vim kuv nkag siab lawm. Tab sis koj yog hais txog kev nyiam kev hlub li cas tiag ? Yuav nyiam tus txheeb ze thiab cov neeg uas hais ntawd tib si. Tab sis thov qhia kuv tias koj hais txog yam kev nyiam kev hlub twg ? Vim kuv xav tias kev nyiam kev hlub tej zaum yog lwm yam uas txawv yam Yes Xus tab tom hais txog kuj muaj. Nov yog qhov uas sawv daws siv kam thiab muaj qhov nyuab kawg nyob hauv xeem lus Aas Kiv hais txog tej yam me me, uas hais tias hlub los nyiam. Vim peb siv lo lus hlub los nyiam, los npog tas txhua tsav txhua yam.
Li ntawd, thiaj tsis tshua muaj qhov tseeb thaum peb hais txog lo lus hlub los nyiam. Kuv thov ua piv txwv rau nej mloog me ntsis, peb siv tib lo lus ntawd los hais tias :
“Kuv nyiam popcorn, kuv nyiam niam tais, kuv nyiam Tswv Ntuj thiab kuv nyiam mus saib Cubs game. Tas txhua yam ntawd sib txawv heev. Thiab lub ntsiab ntawm kev paub hauv txhua txhia yam nws txawv kawg. Tab sis peb kuj siv lo lus tias nyiam los yog hlub ib yam.
Li ntawd, Yes Xus thiaj hais tias : “Thov nej sib nyiam sib hlub.” Thiab koj yuav ntaus nqi li cas ? Lus Hes Laas hauv ntawv Cog Lus Tshiab muaj lub ntsiab zoo dua no. Vim xeem lus Hes Laas hauv ntawv Cog Lus Tshiab muaj ntau lo lus, ntau yam uas lus Aas Kiv txhais tias nyiam los yog hlub. Tab sis muaj lub ntsiab sib txawv ntau heev. Ces kuv xav nrog koj tham txog zaj no, vim kuv xav tias nws pab kom nkag siab txog Yes Xus cov lus uas tseem ceeb meej dua. Nov yog 3 lo lus uas kuv tab tom hais txog nyob hauv xeem lus Hes Laas, yog Eros, Philia thiab Agape. Eros, Philia thiab Agape puav leej txhais tias kev hlub. Tab sis muaj lub ntsiab sib txawv heev. Eros txhais li cas ? Yog vim lo lus tias erotic ntawm peb los ntawm lo lus ntawd. Kuv thiaj hais tias ; nws txhais tias yog yam xav tau heev thiab nws tseem ceeb rau qee yam los qee tus neeg. Thiab koj yuav pom meej tseeb nyob hauv kev xav sib deev.
Ntawd yog kev xav tau los yog xav ua tus kav. Nws muaj zog heev, nws ua kom koj xav kav qee yam los kav qee tus neeg.
Tam sim no yuav nco cia tias kuv tsis yog hais lus saib tsis taus hais txog erotic, kuv yog hais txog tias ; lees txais tias tsis muaj leej twg nyob ntawm no kiag. Tshwj zias yuav muaj qhov zoo ib yam hauv kev xav sib deev. Tsis muaj leej twg muaj txoj sia nyob li, tshwj zias yuav muaj yam zoo ib yam hauv tej txhiam xws thiab dej haus. Nws yog lub zog txhawb uas muaj zog thiab kub lug. Ces ntawd yog eros, nws yog kev xav tau heev ntawm qee yam los yog qee tus neeg.
Tam sim no los txog lo lus ob uas yog Philia, ces yuav xav txog Philadelphia puas yog ? Lub nroog sib nyiam sib hlub hauv kwv tij, peb hu ua Philia hauv xeem lus Hes Laas, txhais tias yog phooj ywg. Yog kev nyiam kev hlub ntawm phooj ywg. Piv li tias kuv nyiam tus txiv neej ntawd, vim nws yog neeg zoo, kuv nyiam nws tiag tiag. Nws yog tus kuv xav siv sij hawm nrog. Tus txiv neej ntawd zoo li kuv tus phooj ywg, kuv nyiam siv sij hawm nrog nws nyob. Ntawd yog Philia. Tej zaum koj yuav hais tias ; koj puas paub tias nws tsis saib tus kheej loj dua zoo li eros. Eros nyiam txhia xws noj, dej haus, sib deev thiab kev kav lwm tus neeg. Tab sis Philia tsis yog li ntawd, philia yog zoo li tias koj yog kuv tus phooj ywg, kuv xav nrog koj nyob. Tsis yog tias kuv xav nrog koj tsev neeg nyob, kuv xav nrog koj nyob, kuv xav siv sij hawm nrog koj nyob.
Yes Xus tsis yog tab tom hais rau nws cov Thwj Tim tias : “Kuv xav kom nej rov sib nyiam sib hlub, los yog rov muaj Eros.”
Kuv vam tias nws yuav meej tseeb. Yes Xus tsis yog tab tom txhib lawv tias :
“Nej yuav tsum sib nyiam sib hlub, txhais tias txhib kom nej sib nyiam sib hlub zoo li ntawd. Thiab Yes Xus tsis yog tab tom hais ua lus Hes Laas tias : “Kuv xav kom nej rov muaj philia.” Ntawd yog hais txog tias ; kuv xav kom nej sawv daws yog phooj ywg. Li ntawd, Pob Zeb, Yas Kos, Zam thiab nej sawv daws huv tib si. Kuv xav kom nej ua phooj ywg. Kuv xav tias muaj zoo sij hawm uas qee tus Thwj Tim tsis nkag siab lwm tus Thwj Tim. Lawv sawv daws raws Yes Xus, lawv raug Tswv Ntuj xaiv. Tab sis txhais tias lawv puas rov sib nyiam sib hlub ? Lawv sawv daws puas zoo siab yuav siv sij hawm nyob ua ke ? Tsis tas yuav nyob ua ke thiab Yes Xus tsis tau hais li ntawd. Kuv xav kom nej sawv daws ua phooj ywg. Thiab nws tsis tau hais kom cov raws nws ntau caum xyoo tias : koj yuav tsum ua phooj ywg nrog txhua tus. Tsis yog li ntawd, Yes Xus tsis hais li ntawd. Lo lus uas siv thiab tam sim no kuv hais tias qhov txawv nws meej tseeb dua tuaj.
Tsis yog Eros, tsis yog Philia. Lo lus uas siv nyob hauv no, nws yog lo lus hais txog npe ntau dua. Yog Agape txhais tias kev nyiam kev hlub, ib yam li lwm lo lus.
Tab sis nws yog hais txog dab tsi ? Tej zaum koj tau hnov kuv kheev kheev hais txog tus yam ntxwv nto npe ntawm Tos Mas Aquinas's, tej zaum nws yuav hu ua Caritas hauv nws xeem lus Latin. Txhais tias xav zoo rau lwm tus. Xav zoo rau lwm tus, ntawd yog Agape thiab yog Yes Xus cov lus uas nws muab rau nws cov Thwj Tim thiab muab rau peb. Ntawd yog qhov neeg paub tias koj yog tus raws kuv. Koj rov muaj kev nyiam kev hlub xws li Agape. Koj xav tau txiaj ntsim qab hau ntawm ib tug rau ib tug. Thov kom paub tias nov tsis yog kev xav tau uas xav ua tus kav. Vim qhov ntawd yog kev xav tau raws li Eros. Tsis yog kev xav siv sij hawm nyob ua ke, vim ntawd yog kev xav tau raws li Philia. Nws yog kev xav tau txiaj ntsim qab hau vim lwm tus.
Li ntawd, nws thiaj yog kev muab tus kheej los ua hauj lwm. Tej zaum lub tswv yim no yuav yog kev muab siab rau txog lwm tus. Ntawd yog kev nyiam kev hlub raws li Agape. Peb yog neeg txhaum uas zoo kawg hauv kev zam txhua yam no. Peb kheev kheev hais dab tsi tas li, peb ua dab tsi tas li ? Kuv lam ua txuj ua kom pom tias kuv txaus siab ua yam zoo zoo rau koj. Tab sis qhov tseeb tiag kuv tab tom xav tau yam zoo zoo ntawm koj, kom koj muab yam zoo zoo ntawd rau kuv. Kuv ncaj ncees los yog siab zoo rau koj, kom koj ncaj ncees thiab ua siab zoo rau kuv. Ntawd tsis yog kev nyiam kev hlub raws li Agape. Ntawd tsis yog kev xav tau txiaj ntsim qab hau rau lwm tus. Ntawd tsuas yog kev siv lwm yam kom tau txiaj ntsim qab hau rau tus kheej.
Kev nyiam kev hlub raws li Agape uas Yes Xus hais tseg, yog kev daws tso tus kheej ntawm qhov dub uas muab tus kheej saib hlob. Phooj ywg muaj txhaum ? Ntawd yog muab tas ntiaj teb neeg los rau kuv thiab kuv tej kev ntxhov siab. Yes Xus tab tom hais tias : “Kuv xav kom koj muaj qhov zoo no, uas yuav daws tso tus kheej ntawm tej yam ntawd. Ntawd yog kev nyiam kev hlub uas Yes Xus hais tseg.
Kuv thov piav ib tug piv txwv muaj qab muaj quag rau nej mloog puas tau ? Muaj ib tug Leej Ntshiab uas nto npe hauv tiam 20, nws yog Maximilian Kolbe. Tus txiv neej uas nto npe ntawd muab nws tus kheej pauv ib tug txiv neej uas cov Nas Ntxis tab tom yuav muab tua, nws hais tias : “Muab kuv hloov nws mas ! Kuv yog ib tug Txiv Plig Kav Tos Liv, thov muab kuv los hloov nws.” Ces cov Nas Ntxis kuj ua li nws hais, lawv cia nws yoo tshaib tuag. Qhov ntawd yog ib txoj kev tsim txom neeg uas phem kawg. Maximilian Kolbe puas paub tus txiv neej ntawd ? Kuv tsis xav li ntawd. Tus txiv neej ntawd puas yog nws ib tug phooj ywg ? Los nws xav siv sij hawm nrog tus txiv neej ntawd nyob ? Tsis muaj ib yam dab tsi ua pov thawj zeem tseeb txog.
Tab sis Maximilian Kolbe ua kom pom meej tseeb txog kev nyiam kev hlub raws li Agape. Kev hnov qab tus kheej, kev muab tus kheej los pauv thiab kev xav zoo rau lwm tus, yog qhov Yes Xus tab tom hais txog. Tsis yog raws li Eros thiab tsis yog raws li Philia. Tsis muaj dab tsi txhaum txog ob yam no, tab sis tsis yog qhov uas Yes Xus tab tom hais txog. Nws tab tom hais txog kev nyiam kev hlub uas hlub tus kheej zoo li no. Koj puas paub tias yog qhov zoo heev nyob hauv Ntawv Ntshiab uas yuav tshawb nrhiav ? Yog koj xav raws qab cov lus qhuab qhia no, koj yuav mus saib nyob hauv Kos Lis Nthos tsab ntawv ib zaj 13. Ces koj yuav hnov txog zaj no. Vim Paj Lug tsis tau hais txog kev nyiam kev hlub raws li Eros los yog Philia. Nws tab tom hais txog kev nyiam kev hlub raws li Agape thiab kev nyiam kev hlub uas ua tawm. Kev nyiam kev hlub raws li Agape, yog ua tiag nyiaj los uv. Vim li cas thiaj yuav tsum uv ? Vim nws tsis quav ntsej txog qhov zoo ntawm tus kheej, nws quav ntsej txog qhov zoo ntawm lwm tus. Li ntawd, nws thiaj ua tiag uv txais txhua yam. Nws lees txais txhua yam, vim nws xav kom muaj qhov zoo zoo rau lwm tus. Kev nyiam kev hlub uas tsis xam khib los tsis khav theeb thiab tsis muab hlob. Vim li cas ne ? Vim nws ua kom koj dim ntawm tus kheej thiab nws txoj kev ntxhov siab. Nws xav tau yam zoo zoo rau koj tiag tiag. Ntawd yog lub Cim ntawm kev saib tus kheej loj dua. Tej zaum koj yuav hais tias nws yog lub Cim ntawm kev nyiam kev hlub raws li Erotic thiab. Kuv xav tau yam no rau tus kheej, kuv xav ua tus kav. Kev nyiam kev hlub uas tsis yog raws li Agape, tsis yog ua li ntawd. Nws tsis zeem tseeb txog nws tus yam ntxwv. Nws tsis zoo siab txog qhov yuam kev, tab sis nws zoo siab txog qhov tseeb. Yog koj tsuas muab siab rau txog tus kheej, koj kuj yuav zoo siab nrog qhov yuam kev. Vim kev ua yam yuam kev nws muaj txiaj ntsim qab hau rau koj, puas yog ? Tab sis kev nyiam kev hlub tseeb tiag ntawd, nws yog txhawj xeeb txog lwm tus qhov zoo.
Li ntawd, nws tsis quav ntsej txog qhov yuam kev, nws zoo siab txog qhov tseeb thiab nws ua tiag uv tas txhua yam, ntseeg txhua yam thiab vam txhua yam. Kev ua tiag uv txhua yam, nws tsis yog kev nyiam kev hlub raws li Eros thiab raws li Philia. Nws yog kev nyiam kev hlub uas muab tus kheej thiab hnov qab tus kheej vim lwm tus. Nws txaus siab ua yam zoo vim lwm tus. Qhov no yog qhov Yes Xus muab rau txhua tus ua ntej hmo nws yuav tuag. Nov ua kom neeg paub tias peb yog Yes Xus cov Thwj Tim.
