Txhua yam hauv ntiaj teb no txawj ploj mus.
Cov kwv tij zoo nyiam sawv daws ! Peb tab tom nyeem Zam ntawv Moo Zoo zaj 6, thiab peb tab tom nyob hauv ntu loj uas cav txog lub Cim Yug. Li ntawd, thiaj tseem ceeb uas peb yuav muab siab rau txog cov lus nyob hauv Zam ntawv Moo Zoo zaj 6. Vim txhua lo lus yuav qhia peb txog tej yam muaj nqis nyob hauv lub Cim Ntshiab uas tseem ceeb tshaj no.
Kuv xav faib ob peb lo lus nyob hauv zaj ntawv Moo Zoo hnub no, vim nws muaj lub ntsiab lus hais txog neeg lub neej fab ntsuj plig. Yes Xus ua kom cov ncuav mov thiab ntses ntsu tuaj. Tam sim no tas ib tsoom neeg tab tom nrhiav Yes Xus, lawv hla dej hiav txwv thiab lawv hais tias : “Las Npis, thaum twg koj tuaj ntawm no lawm ?”
Yes Xus teb lawv tias : “Kuv hais qhov tseeb tiag rau nej. Nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab. Nej txhob ua hauj lwm nrhiav cov txhiam xws txawj ploj. Nej ua cov hauj lwm nrhiav cov txhiam xws pub txoj sia nyob mus li.”
Lawv txaus siab rau lawv lub cev thiab tam sim no lawv tab tom nrhiav qhov ntawd dua. Txhob ua hauj lwm nrhiav cov txhiam xws txawj ploj, tab sis yuav nrhiav cov txhiam xws pub txoj sia nyob mus li. Peb ua lub neej nyob feem ntau yog los ntawm kev chim siab. Hais tiag tiag rau koj, kev ua lub neej nyob hauv ntiaj teb los ntawm kev chim siab yog hais txog dab tsi ?
Kuv thov nej xav txog ib daim duab txawv txawv uas kuv twb xub tau faib rau nej los dua lawm, tab sis yam no rov txhawv nyob hauv kuv nruab siab txhua zaus thaum kuv nyeem cov lus no hauv Teilhard De Chardin, uas nws yog ib tug kws txuj Kav Tos Liv neeg Fab Kis nyob hauv tiam 20. Nws rov xav txog qhov tseeb thiab cuav thaum nws muaj 4 xyoos, nws nco tau tias yog kev cai nyob rau txheej ntawd. Tab txawm yog cov me nyuam tub, tsis kav lawv kuj tseg plaub hau ntev ntev. Thaum nws muaj 4 xyoos, mas lawv txiav nws plaub hau thawj zaug. Nws nco tau tias nws niam muab nws coj mus zaum ze lub qhov cub thiab pib txiav nws plaub hau. Nws poob siab thaum nws ntsia pom nws cov plaub hau sib kauv. Muaj ib tauv plaub hau poob mus rau qhov cub thiab kub hnyiab tas. Nws ntshai heev vim nws xav tias : qhov no yog ib feem ntawm kuv, yog ib yam nyob ntawm kuv lub cev. Zoo li ib yam ntawm kuv ploj mus lawm. Tam sim no koj yuav nyeem tej yam sau los ntawm nws txoj hauj lwm theological, yog kev muab siab rau nrhiav yam uas tsis txawj ploj.
Kuv hais ncaj tias txhua yam nyob ntiaj teb no txawj ploj mus, tsis muaj ib yam yuav zam dhau. Txhua yam nyob ntiaj teb no nws zoo li ib txoj plaub hau uas raug kub hnyiab. Yam uas peb niaj hnub ua rau, yog dab tsi ? Peb siv sij hawm ntau ntau los ua hauj lwm rau yam uas ploj mus lawm. Tab txawm yog txhua yam nyob ntiaj teb no, nws kuj yuav txawj maj mam ploj mus. Yog hais txog qhov no mas peb pib ntxhov siab. Kuv xav muab ob peb yam los hais ua piv txwv : peb yuav xub xav txog daim duab noj mov, uas lawv twb noj mov tsau lawm. Tab sis lawv tseem nrhiav dua lwm yam txhiam xws noj kom lawv txaus siab thiab. Yuav xav txog pluas mov qab tshaj uas koj twb tau noj los lawm. Koj mus hauv khw thiab koj noj cov zaub mov qab tshaj uas koj nyiam noj. Thaum koj noj tsau lawm koj yuav hais tias : “Kuv yuav tsis noj ntxiv lawm, txawm tias kuv yuav tshaib thiab tsis tshaib. Tsis hais lwm pluas yuav qab npaum cas kuj xij.” Hais tau tias hauv ntiaj teb no tsis muaj ib yam dab tsi uas koj noj es yuav txaus siab li. Peb ua hauj lwm vim peb lub tsev, peb siv nyiaj ntau ntau rau peb lub tsev, vim yog lub tsev hauv peb tus npau suav. Yog lub tsev uas peb xav tau xav nyob. Peb nyiam, vim nws muaj txhua yam uas peb xav tau thiab yog peb qhov kev lom zem uas txaus siab.
Tab sis yam uas peb khiav tsis dhau, yog qhov txhua tus txiv tsev yuav hais tias : peb lub tsev pib piam, pib po thiab yuav tsum pleev dua tsos tshiab. Ru tsev los yuav tau hloov kho dua. Hluav taws xob los kuj khiav tsis zoo. Yuav tsum them nqi yuav tsev thiab koj txawm yuav muab siab rau maj mam kho npaum cas, tsis kav koj lub tsev kuj piam zuj zus. Txog qhov kawg, koj kawg muab lub tsev ntawd muag tawm mus. Qhov kawg cov neeg nyob hauv yog lwm cov neeg. Qhov kawg nws kuj raug rhuav tshem. Qhov kuv hais li no yog hais tias : txawm koj lub tsev yuav zoo npaum cas thiab tsis zoo, muaj ib hnub twg nws yeej yuav ploj mus, nws yuav nyob tsis ntev.
Xav txog kev lom zem. Peb coob leej nyiam nrhiav kev lom zem, vim peb qaug rau ntau yam kev lom zem. Kuv nyiam saib lawv ncaws pob, vim kuv nyiam qhov cov duab pom tseeb thiab suab nrov meej. Kuv nyiam thaum lawv sib tw yuav yeej tsis yeej, kuv nyiam sau cim txog tus zauv txhua zaus kuv saib lawv ncaws pob. Ces kuv muab siab rau ua tib zoo saib thiab sau cim tseg tias yog pes tsawg zaus. Zoo li kuv muaj feem cuam koom nrog lawv nyob ua ke, nws lom zem heev. Yog koj pab yeej, mas zoo kawg. Tom qab neeg rov mus tsev tas, mas lub tshav ncaws pob raug tso tseg nrog ntau yam khib nyiab. Yog koj pab swb, mas nyias khiav nyias tas.
Sim xav txog kev sib raug zoo ntawm peb seb ! Hauv peb tsev neeg thiab peb kev ntaus phooj ywg. Tus neeg uas tseem ceeb tshaj rau peb, nws yog tus zoo tshaj. Nws yuav nyob nrog peb mus ib txhis. Tab sis muaj ib yam uas yog kev muaj mob thiab ib hnub twg tus neeg peb nyiam thiab hlub tshaj yuav ncaim peb mus. Nws mob thiab txawj tuag, peb puav leej txawj mob thiab txawj tuag, tsis muaj ib tug khiav dhau.
Yes Xus tau hais ib co lus qhia txog cov neeg muaj hwj chim hauv fab ntsuj plig. Peb sawv daws xav tau kev sov siab thiab xav nyob kaj siab lug. Li ntawd, peb thiaj nrhiav txhua txoj kev sov siab kom tau nyob kaj lug tas mus li. Ib qhov ntxiv, kuv xav hais txog lub meej mom uas peb sawv daws nrhiav thiab xav tau. Vim xav kom muaj neeg lees txais thiab qhuas txog peb. Qee yam uas koj tau txais nyob hauv lub neej los sis tej ntawv pov thawj ntau daim uas koj tau txais. Muaj neeg qhuas thiab hais lus zoo cav txog. Muaj neeg zoo siab npuaj teg thiab qhuas kawg. Yog ib lub sij hawm zoo zoo nyob hauv koj. Koj coj mus khuam los dai rau ntawm phab ntsa, ces nws yuav maj mam ploj mus. Tsuas tshuav qhov zoo zoo ua kev nco cia lawm xwb. Tab sis dhau ntawd, koj tseem nrhiav dua lwm yam ntxiv. Ces zoo li txhua yam nyob hauv ntiaj teb no muaj ntxiv mus tas li nyob hauv koj txoj kev ntshaw.
Nov yog daim duab uas tshwm nyob hauv kuv lub paj hlwb tas mus li, thaum kuv hais txog zaj no. Cov plav ntawv hlawv cig saum ntuj yav hmo ntuj thiab nws tawg cig liab ntsuab, pom tias ci tau zoo nkauj heev. Thaum lub plav ntawv tawg cig nyob saum ntuj, pom kev thiab zoo nkauj ua rau peb txhua tus nyiam. Nws tawg tau zoo nkauj xws li cov paj ntshua nplaim nyob saum ntuj, tab sis ib pliag ntshis xwb ploj tag.
Kuv tsis paub tias koj puas pom li ntawd ? Tab sis kuv yeej ib txwm nyiam cov plav ntawv uas tawg zoo nkauj li ntawd. Kuv kuj muaj qhov khuv xim, vim nws tawg ci ntsa ib pliag xwb ploj mus lawm. Peb ua lub neej nyob ntiaj teb, kuj zoo ib yam li cov plav ntawv uas tawg nyob saum ntuj zoo nkauj, tab sis ib pliag xwb ploj tas.
Peb kev sib raug zoo, kev phooj ywg, lub meej mom, kev sov siab, pluas mov qab uas peb tau noj, kev lom zem thiab txhua yam puav leej yog zoo li hlawv plav ntawv tawg nyob saum ntuj.
Lo lus teb yog dab tsi ? Hais txog ntawm kuv, nws yog lub meej mom. Nws yog kev noj qab nyob zoo thiab kev sov siab ntawm lub cev ntaj ntsug. Nws yog qhov yus ua tiav. Nws yog yus lub zog. Tab sis tsis txhob qaug quav rau tej yam uas hais no, vim nws nyob tsis ntev thiab yuav ploj mus, ces koj yuav tu siab tag kev cia siab. Thov koj mus xyaum tus cuj pwm nyob ntsiag to thiab xyaum tso txhua yam tseg. Txhais tias koj nyiam thiab koj ntshaw tej yam li hais no tau, tab sis txhob qaug quav thiab txhob muab koj lub siab npuab rau ib yam twg li. Koj saib lub plav ntawv uas tawg nyob saum ntuj, nws tsuas yog ci ntsa zoo nkauj ib pliag xwb ploj lawm. Lub ntuj rov qab dub nciab thiab tsaus nti li qhov qub. Koj yuav ua hauj lwm nrhiav cov txhiam xws muaj txoj sia nyob mus li, qhov ntawd yog nrhiav Yes Xus. Yes Xus tau pub dab tsi rau lawv ? Thaum peb nyeem Zam ntawv Moo Zoo zaj 6, mas Yes Xus hais tias :
“Kuv yog cov mov muaj txoj sia. Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li.”
Thov kom nej paub tias cov txhiam xws nyob hauv ntiaj teb no, nws yuav tsis txawj lwj tas. Tab sis Yes Xus xav pub cov mov poob saum ntuj los rau koj, kom tau yug koj nyob hauv Yes Xus thiab nws yuav tsis txawj ploj. Nag hmo, hnub no thiab tag kis mus ib txhis. Thiab nyob hauv lub teeb ci ntawm kev nyiam kev hlub, koj yuav nquag txhib kev nyiam kev hlub thiab tas txhua yam kev ntxim siab nyob hauv koj lub neej !
