Tswv Ntuj 10 Lo Lus qhia (The ten commandments)
Cov neeg ntseeg thov kom peb saib lo lus tseem ceeb uas yog ib lo lus nyob hauv ntawv Cog Lus Qub, nws yog 10 lo lus qhia nyob hauv ntawv Kev Tsiv. Thaum peb tig rov mus rau thawj qib nyob hauv fab ntsuj plig, nws yog ib qho zoo heev. Zoo ib yam li ib tug tub ncaws pob uas nws rov qab tig mus rau thaum nws nyuam qhuav pib ncaws pob. Li ntawd, raws kev ncaj ncees thiab fab ntsuj plig peb thiaj rov qab tig mus rau thaum pib. Kuv thiaj thov kom koj rov mus saib lo lus no nyob hauv ntawv Kev Tsiv. Yog koj tsis muaj 10 lo lus qhia nyob hauv koj lub siab, mas koj yuav khaws cov lus no cia, vim nws yog qhov zoo tshaj nyob hauv lub caij koj yuav lees txhaum.
Tab txawm yog thaum yuav xaus hnub, tsis kav yog xav nyeem 10 lo lus qhia koj yuav hais tias kuv yuav ua li cas nyob hauv fab ntsuj plig. Kuv thov hais luv luv txog txhua lo lus ua ntu zus ntawm peb thiab Tswv Ntuj. Thawj 3 lo lus yog hais txog neeg thiab Tswv Ntuj kev sib raug zoo. Hos 7 lo lus tom qab yog hais txog kev sib raug zoo ntawm neeg thiab neeg. Thawj lo lus yog lo lus tseem ceeb nyob hauv Ntawv Ntshiab, ces peb thiaj muab siab rau txog thawj lo lus. Peb yuav kawm Tswv Ntuj 10 lo lus ua ke li no :
Lo lus Ib : “Kuv yog koj tus Tswv Ntuj, koj yuav tsis muaj lwm tus Tswv Ntuj loj dua kuv”. Peb tsuas nyeem lo lus no luv luv xwb, vim Tswv Ntuj xav kom peb teev Tswv Ntuj tib tug xwb. Hais li no tsis yog Tswv Ntuj khib los yog siab me, vim yog tsis muaj lwm tus Tswv Ntuj twg loj dua Tswv Ntuj lawm. Tswv Ntuj tsis xav kom peb yuam kev mus teev lwm tus Tswv Ntuj uas tsis yog Tswv Ntuj. Yog koj ua li ntawd, mas koj lub neej yuav piam sij thiab tsis muaj qhov ruaj khov. Ces tsim nyog peb yuav teev Tswv Ntuj tib tug xwb.
Lo lus Ob : “Koj txhob lam tau lam tuav txog hu Tswv Ntuj lub npe yam tsis muaj txiaj ntsim qab hau.” Qhov no tsis tsim nyog koj yuav hu txog Tswv Ntuj zoo li koj tsis muaj kev hwm. Koj yuav tuav txog Tswv Ntuj lub npe thaum koj muaj kev nyuaj siab thiab muaj mob muaj nkeeg. Koj yuav saib Tswv Ntuj yog tus nyob siab thiab muaj nqis dua. Koj yuav tso siab rau Tswv Ntuj. Koj txhob sim Tswv Ntuj thiab txhob xav tias koj yuav ntxias Tswv Ntuj tau. Qee zaus Tswv Ntuj sim peb, zoo li zaj peb hnov nyob hauv Has Nplas Has lub lis piam tag los. Peb yuav tsis tuav txog Tswv Ntuj lub npe xws li cov neeg ua khawv koob.
Lo lus Peb : “Koj yuav hwm hnub Xas Npas Tos ua hnub Ntshiab”. Nov yog thawj qib ntawm cov His Xas Lais raws li Ntawv Ntshiab. Hnub Xas Npas Tos tsis yog hnub so, tab sis yog hnub teev hawm. Hnub uas peb kho peb lub neej kom muaj qab muaj quag nyob hauv kev teev hawm Tswv Ntuj. Tsis yog tias koj muaj Tswv Ntuj nyob hauv nruab siab thiab koj ntseeg, qhov ntawd nws tseem tsis tau txaus. Qhov loj tshaj ntawd, yog qhov tias Tswv Ntuj yog yam muaj nqis tshaj nyob hauv koj lub neej. Koj puas tau ua tawm thiab ua nyob hauv koj txoj kev teev hawm ? Li ntawd, yuav ua kom koj teev Tswv Ntuj tiag tiag, koj yuav tsum ua tawm nyob hauv txoj kev muaj qab muaj quag thiab xwm yeem thiab koom nrog lwm tus neeg.
Kuv thov qhia tias nyob hauv cov neeg sab hnub poob tej kab lis kev cai, feem coob lawv tso tseg hnub Xas Npas Tos lawm. Ua rau cov neeg sab hnub poob piam sij loj kawg nyob hauv lawv tej kab lis kev cai. Kev hwm hnub Xas Npas Tos ua hnub Ntshiab, yog thawj yam nyob hauv kev teev Tswv Ntuj, vim nws ua kom peb tau cog kev sib raug zoo nrog Tswv Ntuj. Yog koj nrog Tswv Ntuj uas muaj kev nyiam kev hlub sib txuas lus, txoj kev hlub ntawd kuj yuav txhawv nyob hauv koj. Koj yim txuas nrog Tswv Ntuj ntau npaum cas, txoj kev hlub ntawd yuav txhawv nyob hauv koj ntau tuaj npaum ntawd.
Lo lus Plaub : “Koj yuav hwm koj niam koj txiv”. Niam thiab txiv yog qhov tseeb rau koj, tab sis tseem muaj qee yam xws li, kev hwm niam hwm txiv, kev saib hlob thiab hlub koj tsev neeg. Yog koj hais tias koj ntseeg Tswv Ntuj, yog hais txog tus neeg muaj kev nyiam kev hlub. Tab sis koj tsis hlub koj tsev neeg, mas txhais tias koj yog ib tug neeg txawv txav thiab koj tsis muaj kev nyiam kev hlub tiag. Yog koj tsis hlub tus nyob ze koj thiab tsis hlub tus neeg hlub koj, mas koj yuav hlub lwm tus tau li cas ?
Li ntawd, kev hlub yog pib nyob hauv yus tsev neeg ua ntej, pib ntawm tus nyob ze yus thiab hlub yus, ces yus tsim nyog yuav hlub lawv.
Lo lus Tsib : “Koj txhob tua neeg”. Los yog koj tsis txhob tsim kev kub ntxhov thiab tua neeg. Dhau ntawm tsov rog thiab tiv thaiv tus kheej, kev tua neeg tej zaum nws yog tej qho tsim nyog thiab tsis muaj teeb meem rau peb zim txwv no. Kev ntaus me nyuam nyob hauv plab ne, puas yog kev tua neeg ? Kev muaj tub sab sib tua nyob hauv tej nroog zim txwv no ne ? Ntau zaus txoj cai kuj tsis quav ntsej txog yus thiab. Zam Paj Lug Ob tis npe rau tej yam no hu ua : “Kab lis kev cai ntawm kev tuag”. Teeb meem ntau tsav ntau yam tshwm sim, tab sis koj yuav nco ntsoov koj tsis txhob tua neeg. Kev tua neeg, yog koj hais ib lo lus txwv txiav luag, thuam luag, ua rau luag tu siab thiab tag kev cia siab, ces yog koj tua tus neeg ntawd.
Lo lus Rau : “Koj txhob zes luag poj luag sev”. Txhob xav tias lub Koom Txoos yuav to hau ntsoov rau kev ua plees ua yi sib deev, thiab tas txhua yam ntawd yuav tsis hais txog kev sib deev mus txog lo lus tim Rau. Puas muaj leej twg xav tias kev zes luag poj luag sev, kev cog lus yuam kev, kev ntxeev siab rau yus tus txij tus nkawm, yog kev piam sij loj kawg nyob hauv lub neej. Ces xav hais rau cov qhia kev ntseeg kom txhob xav tias tej yam no yog teeb meem me me. Tus sau Ntawv Ntshiab paub txog zaj no zoo. Ces hauv yus tsev neeg yuav muab qhov no los ua tus cag, kom txhob muaj cov teeb meem no tshwm sim. Ntawv Ntshiab hais tias : tso tseg, koj txhob ua li ntawd.
Lo lus Xya : “Txhob ua tub sab tub nyiag”. Kuv tau hais rau coob leej neeg thiab nws tsis tau tshwm sim rau kuv, kuv thov ua Tswv Ntuj tsaug. Tab sis lwm leej lwm tus tej vaj tse raug tub sab tshawb, ces thaum lawv rov los txog, muaj qee yam raug nyiag raug ploj lawm. Koj yuav pom tias qhov tshwm sim phem kawg thiab qee yam ntawm koj ploj mus lawm, nws yog qhov tsis zoo kiag. Qhov no yog vim tsis muaj kev nyiam kev hlub. Yog kev nyiam kev hlub yog kev xav zoo ntawm lwm tus, mas kev nyiag yog kev txeeb yam zoo ntawm lwm tus. Ces qhov ntawd yog kev hla txoj cai ntawm kev nyiam kev hlub. Tam sim no muaj tub sab, muaj neeg nkag mus nyiag toob xib, peb kuj paub tias ntawd yog kev txhaum. Kev ua tub sab nws muaj ntau txoj kev, xws li nyiag yam zoo zoo, nyiag suab npe, ces zoo li txeeb luag qhov zoo zoo mus lawm. Qhov no yog kev ua tub sab.
Lo lus Yim : “Txhob ua tim khawv cuav liam txim rau luag”. Qhov no peb hu ua txhob txwm dag neeg, vim lub hom phiaj yog liam txim ua phem rau lwm tus. Vim li cas peb thiaj ua li ntawd ? Puas yog nws ua rau koj zoo tuaj, ua kom koj muaj tsim tuaj, los ua kom koj vam meej tuaj ? Peb sawv daws puav leej paub nyob hauv Online puas yog ? Tej kev cai nyob hauv Social Media ua kom muaj tej no tshwm sim ntau, ua pov thawj cuav liam lwm tus. Hais lus dag thiab liam txim txhua yam. Nyob hauv lub Caij Plaub Caug no, yog kuv xyav moo txog lwm tus nws puas yog qhov tseeb ? Ua ntej koj yuav tso dab tsi tawm mus nyob hauv Online, mas koj yuav tau xub xav txog tias puas yog tim khawv cuav, los yog lus cuav. Thov koj rov saib lo lus tim 8 kom zoo zoo.
Kuv yuav muab lo lus Cuaj thiab lo lus Kaum los sau ua ke : “Txhob tso koj lub siab ntshaw ua tub sab tub nyiag, txhob ntshaw zes luag poj luag sev.” Ntau zaus muaj ntau yam uas peb xav tau, vim lwm tus kuj xav tau. Ua cas koj thiaj xav tau thiab zoo li yam ntawd nws nqus koj lub siab tas zog, vim lwm tus kuj xav tau yam ntawd thiab. Yam uas lawv nyiam, nws ua rau koj xav tau thiab puas yog ? Txhob ntshaw zes luag poj luag sev, thiab txhob ntshaw ua tub sab tub nyiag. Xav tau tej yam kom koj kaj siab thiab nyob zoo, tab sis koj yuav cheem koj lub siab kom txhob nyob ze tej yam ntawd. Koj ntshaw dab tsi, vim li cas koj thiaj ntshaw ? Yam koj ntshaw, puas yog yam luag tej ntshaw thiab ? Yog koj paub li ntawd, txhais tias koj tab tom nyob ntawm txoj kev luv luv, kev sib txeeb thiab kev ntxhov quav niab. Tab sis kuv thov koj tias : tam sim no yog lub Caij Plaub Caug, thov koj rov mus saib nyob hauv ntawv Kev Tsiv uas hais txog lo lus no. Koj yuav kawm kom to taub lo lus no lub ntsiab thiab nco ntsoov tias : lwm zaus koj txais lub Cim Daws Txhaum, koj yuav txais nyob hauv lub Caij Plaub Caug thiaj tsim nyog. Koj yuav muab Tswv Ntuj 10 lo lus qhia coj los soj ntsuam kev ncaj ncees nyob hauv koj, kom koj txawj ua lub neej nyob hauv Tswv Ntuj cov lus qhia.
Thov Tswv Ntuj foom hmoov zoo rau koj !
