Tom qab peb tuag lawm, yuav muaj dab tsi tshwm sim ? (What happens after we die)

Tom qab peb tuag lawm, yuav muaj dab tsi tshwm sim ? (What happen after we die)

Lub lis piam no peb muaj ib co lus nyob hauv Lus Kas ntawv Moo Zoo zaj 24, yog ib co lus zoo kawg. Ntawd yog hais txog txoj kev mus txog Es Mas Ws zaj dab neeg. Nws yog qhov peb hais tias yog qhov zoo tshaj nyob hauv zaj 24, yog kev nplua nuj uas nrhiav tsis tau. Zaj nyob hauv hnub no raug nthuav tawm thaum 2 tug Thwj Tim tab tom taug kev mus rau lub zos Es Mas Ws, nkawd ntsib Yes Xus thiab tau nrog Yes Xus tham. Nkawd sawv tsees rov mus Yes Lus Xas Les thiab pom pab kaum ib nrog lawv cov npawg nyob ua ke. Nkawd hais tias Yes Xus sawv rov los lawm tiag. Thaum cov Thwj Tim tab tom sib tham txog tej xwm ntawd, mas Yes Xus sawv ntsug nyob nruab nrab hauv lawv thiab nws hais tias :

“Nej nyob kaj lug !” Li ntawd, peb twb tau pom tej yam no nyob hauv lub lis piam tag los puas yog ? Yes Xus tau sawv rov los raws li cov lus nws hais tseg. Peb txhob ua li Tos Mas uas nws hais tias : “Yog kuv txhais tes tsis tau kov nws lub qhov txhab, mas kuv tsis ntseeg.” Qhov ntawd tsis yog tus cuj pwm ntawm kev ua neeg ntseeg. Yes Xus tuag thiab nws sawv rov qab los raws li nws cov lus hais tseg. Thaum cov Thwj Tim pom Yes Xus, lawv ntshai kawg. Lawv xav tias lawv pom ib tug dab. Tab sis Yes Xus hais rau lawv tias : “Vim li cas nej poob siab ? Vim li cas tej zaj ua xyem xyav li ntawd sawv nyob hauv nej lub siab ? Nej ntsia kuv ob txhais tes thiab ob txhais taw, yog kuv tiag. Lub lis piam tag los, peb hnov Yes Xus hais tias : “Salom” thiab nws muab nws cov qhov txhab rau lawv saib. Yes Xus hais ntxiv tias : “Nej xuas kuv saib, nej ntsia mas : dab tsis muaj nqaij tsis muaj pob txha, xws li nej pom kuv muaj.”

Thaum peb hais txog Yes Xus kev sawv rov los, mas yog peb tab tom hais txog lub ntsiab ntawm kev ua neeg ntseeg thiab yog kev ntseeg tus cag. Li ntawd, kom peb to taub tias peb tab tom nyob hauv qhov tseem ceeb. Cov His Xas Lais hais tias ; thaum peb tuag, mas peb kawg mus ua ntiaj teb cov plua av. Cov plua av ntawd puas txawj cav lus zoo txog Yes Xus ? Cov Fas Lis Xais lawv hais tias : peb ntseeg tias thaum txog hnub kawg, mas peb yuav nrog Yes Xus sawv rov qab los. Kuv xav tias cov neeg ntseeg cov lus hauv ntawv Moo Zoo feem coob lawv xav txog Tswv Ntuj lub Ceeb Tsheej ntau dua. Lawv xav tias lawv tso lub cev tuag nyob tom qab, tab sis lawv tus ntsuj plig mus cuag Tswv Ntuj lawm. Yog Yes Xus tsis tuag thiab sawv rov los, mas peb tseem nyob hauv peb cov txhaum. Yog Yes Xus tsis sawv rov los, mas peb yuav phem tshaj no. Qhov no yog qhov tseeb ntawm lub Koom Txoos. Thaum Yes Xus yees tawm tuaj, cov Thwj Tim ceeb thiab ntshai, lawv xav tias lawv pom ib tug dab. Yog peb tsis muaj kev ntseeg txaus, mas peb kuj yuav ua xyem xyav thiab ntshai xws li cov Thwj Tim ntshai.

Cov xwm no tshwm sim nyob hauv xyoo 30 thiab nyob hauv cov teb chaws uas peb paub tseeb tias muaj tiag. Tus Yes Xus uas lawv paub thiab yog tus lawv pom nws raug ntsia nyob saum ntoo cuam. Nws yees tawm tuaj rau cov Thwj Tim pom, nws yog neeg tsis yog dab. Vim dab tsis muaj nqaij thiab tsis muaj pob txha zoo li Yes Xus.

Thaum Yes Xus hais cov lus no tas, nws muab nws ob txhais tes thiab ob txhais taw rau lawv saib. Lawv zoo siab dhau, lawv tseem tsis tau xav ntseeg, lawv yoob tas.

Yes Xus hais rau lawv tias : “Nyob ntawm no, nej puas muaj dab tsi noj ?”

Lawv muab ib ya ntses txhiab rau Yes Xus. Yes Xus tuav, nws noj yav ntses ntawd nyob ntawm lawv xub ntiag.

Peb yuav nco ntsoov Leej Ntshiab Pob Zeb lo lus tias : “Peb yog cov uas tau noj haus nrog Yes Xus, tom qab nws sawv rov los.” Nws yog ib lo lus raug siab thiab muaj tseeb tiag. Koj xav tias yog koj tau nrog ib tug neeg sawv hauv cov tuag los noj haus ua ke, koj puas zoo siab los koj yuav ntshai ? Thaum cov Thwj Tim tab tom sib tham txog tej xwm ntawd, mas Yes Xus sawv ntsug nyob nruab nrab hauv lawv. Nyob ntawm txoj kev mus hauv lub zos Es Mas Ws, Yes Xus tau nrog ob tug Thwj Tim taug kev, nws nrog nkawd nyob. Thaum lawv zaum ntawm lub rooj mov, Yes Xus tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. Ces nkawd qhov muag qhib plho, nkawd zeem tau Yes Xus. Tab sis Yes Xus ploj ntais ntawm nkawd xub ntiag lawm. Qhov no yog ib qho txawv heev thiab to taub nyuab, vim ob tug Thwj Tim zeem tsis tau Yes Xus. Tus Yes Xus uas lawv paub nws sawv rov qab los thiab nws lub cev ci ntsa iab, nws sawv saum cov huab. Peb kuj ntseeg tias cov neeg tuag lawm, txog hnub kawg lawv yuav sawv rov qab los. Lawv yuav muaj ib lub cev tsis zoo li lub cev nyob ntiaj teb no nyob saum ntuj.

Thaum xav txog zaj no, mas peb yuav tau tig rov mus ntawm lub hauv paus hauv Ntawv Ntshiab, peb muaj Tswv Ntuj ua tus tsim tag ib puas tsav yam zoo txhij txhua. Nyias muaj nyias qhov zoo thiab sib txawv. Koj puas xav tias Tswv Ntuj xav kom tej ntawd ploj mus ? Tswv Ntuj tsim tag txhua tsav puas yam thiab nws tsis muaj qab hau li lod ? Tsis yog li ntawd. Tswv Ntuj tsim tas txhua tsav puas yam tshiab, nws xav kom tas txhua yam ntawd nyob mus li. Tas txhua yam no yog nyob hauv Yes Xus kev sawv rov los. Leej Ntshiab Paj Lug tau hais txog lub cev fab ntsuj plig txog hnub nws tau ntsib Yes Xus. Paj Lug yog kev ntseeg tus yeeb ncuab, nws hiam kev ntseeg. Tab sis thaum Paj Lug ntsib Yes Xus nyob ntawm txoj kev mus Das Mas, ces txhua yam ntawm nws hloov tas. Qhov no yog qhov peb tab tom hais txog, thiab Yes Xus yog tus ris tas ntiaj teb neeg cov txhaum. Qhov no thiaj yog qhov peb tsuj xeeb nyob hauv lub Caij Hla. Yam uas Tswv Ntuj npaj tseg rau peb, tsis yog tsis muaj dab tsi li. Nws tsis yog qhov peb rov mus ua plua av, tsis yog tus ntsuj pliag tso lub cev tuag nyob tom qab. Peb qhov muag tsis pom, peb pob ntseg tsis tau hnov txog yam uas Tswv Ntuj npaj tseg rau cov neeg nyiam Tswv Ntuj. Qhov no yog qhov tseem ceeb ntawm kev cia siab hauv cov neeg ntseeg, thiab yog lub plawv ntawm peb txoj kev ua hmoov Hla.

Thov Tswv Ntuj foom hmoov zoo pub rau nej !