Qhia txog lub Caij Tos Huab Tais 2 (Introduction to the liturgical season of Advente)

Qhia txog lub Caij Tos Huab Tais 2.

Lub Caij Tos Huab Tais tab tom los yuav txog. Lub Caij Tos Huab Tais yog Tswv Ntuj nyob. Lub Caij Tos Huab Tais yog kev tshwm sim.

Lub Caij Tos Huab Tais hauv cov kab ke zim txwv no.

Kev tsuj xeeb lub Caij Tos Huab Tais raws cov kab ke zim txwv no, muaj 4 Hnub Chiv thiab cov hnub hauv nruab lis piam. Tab txawm tias qhov tseem ceeb ntawm lub Caij Tos Huab Tais yuav nyob hauv kev tsuj xeeb lub Cim Ntshiab uas yog lub Cim Yug, tsis kav nws kuj tsis zoo ib yam tas mus li. Thaum txog hnub tim 16 lub 12 hlis, mas peb tos txog Tswv Ntuj lub koob meej. Lub Caij Tos Huab Tais zaum kawg, yog hnub ntiaj teb kawg. Txij hnub tim 17 lub 12 hlis mus, peb raws qab cov lus txhais hais txog tus Mes Xias yuav yug los mus txog thaum Yes Xus yug los ua tus me nyuam xws li neeg. Yog lub Caij Yes Xus Yug Los thiab muaj ntau lub caij nyoog sib txawv.

Cov lus qhia hais txog cov zaj nyeem nyob hauv lub thaj txi Ntuj, yog qhia txog lub caij nyoog. Cov txheej txheem hauv lub Caij Tos Huab Tais raws li Vas Tis Kas Ob teeb tseg li no : Cov zaj nyeem hauv Hnub Chiv lub Caij Tos Huab Tais, nws yog cov zaj nyeem hais txog kev tuaj ntawm Yes Xus hauv lub caij kawg. Thawj Hnub Chiv, yog hais txog tus Ntxuav Plig Zam. Hnub Chiv 2 thiab Hnub Chiv 3, yog hais txog cov xwm txheej ua ntej Yes Xus yuav yug los. Hnub Chiv 4, yog cov zaj nyob hauv Ntawv Cog Lus Qub uas hais txog tus Mes Xias thiab Mes Xias txheej neeg. Feem ntau yog nyob hauv ntawv His Xais.

Zaj nyeem cov Hauv Paus Xa Lus tej hauj lwm, yog hais txog cov lus ceeb toom uas haum rau lub caij no. Nyob hauv nruab lis piam, yuav muaj cov zaj nyeem 2 ntu. Thawj ntu yog txij thaum pib lub Caij Tos Huab Tais mus txog hnub tim 16 lub 12 hlis thiab ntu 2, yog txij hnub tim 17 mus txog hnub tim 24 lub 12 hlis.

Thawj ntu hauv lub Caij Tos Huab Tais, mas yuav nyeem ntawv His Xais ua ntu zus raws li nyob hauv phau ntawv. Cov lus tseem ceeb yog nyob hauv Hnub Chiv. Ntawv Moo Zoo hauv cov hnub li hais no, raug xaiv kom phim thawj zaj nyeem.

Zaj ntawv Moo Zoo hais txog tus Ntxuav Plig Zam, yog pib nyob hauv Hnub Tsib lub lis piam ob. Thawj zaj nyeem yog ntawv His Xais, los yog lwm zaj nyob hauv ntawv Moo Zoo. Lub lis piam kawg ua ntej yuav ua hmoov Yes Xus yug los, mas yuav nyeem Mas Tais ntawv Moo Zoo zaj ib thiab Lus Kas zaj ib. Yog hais txog tej xwm txheej ua ntej Yes Xus yuav yug los. Thawj zaj nyeem yog xaiv tej kab lus nyob hauv Ntawv Cog Lus Qub uas hais txog lub Moo Zoo, thiab hais txog qee kab lus tseem ceeb ntawm tus Mes Xias.

Thawj Hnub Chiv yog tshaj txog kev tuaj zaum kawg los yog zaum ob ntawm Yes Xus, thiab thov kom sawv daws ceev faj, nquag teev Ntuj thiab npaj siab tos txais. Hnub Chiv 2, yog hais txog kev ua tiav log raws cov lus cog ntawm tus pub lub Cim Ntxuav. Thiab thov kom npaj siab tos txais Tswv Ntuj tus Tshiab yuav tuaj. Hnub Chiv 3, yog hais txog kev zoo siab hauv kev tuaj txog ze lawm. Thov kom sawv daws muab siab rau txog yam tseem ceeb uas nyob siab. Hnub Chiv 4, yog hais txog Tswv Ntuj lo Lus nqes los ua neeg, nws yog Tswv Ntuj Leej Tub. Yog kev tuaj thawj zaug thiab thov kom ntseeg ruaj khov thiab ua neeg me.

Lub Caij Tos Huab Tais, peb yuav pib dua tshiab nyob hauv qhov kawg.

Ntu xaus rov qab los rau ntu pib dua tshiab, thiab ntu pib yuav tiav log nyob hauv ntu xaus. Qhov xaus thiab rov pib dua tshiab hauv lub xyoo raws tej kab ke. Hnub Chiv kawg hauv lub xyoo, lub thaj txi Ntuj pib muaj kev cia siab txog kev rov tuaj ntau dua qub. Thiab txhua yam yuav rov zoo tuaj nyob hauv lub Caij Tos Huab Tais dua ib zaug ntxiv. Tas txhua yam no yog coj peb mus rau kev ua tiav log ntu kawg los yog hnub ntiaj teb kawg.

Tsis tas li ntawd, yog vim peb tsis muaj hnub nkag siab thiab lees txais tiag tiag. Ces Yes Xus kev sawv rov los thiaj yog qhov pib thiab qhov xaus. Tom qab ntawd peb tsuas tos kom Yes Xus tuaj thiab pib ua yam nws npaj tseg kom tiav nyob hauv peb xwb. Qhov tseeb tiag qhov zais ntshis ntawm Yes Xus tus raug ntsia saum Ntoo Cuam thiab sawv rov qab los ntawd, nws nkag mus thiab txhawb tus ntsuj plig ua qhov chaw nruab nrab ntawm cov kab ke kav tas lub xyoo. Thiab txhawb lub thaj txi Ntuj nyob hauv txhua Hnub Chiv kom tiav. Tsis li ntawd, kev sib sau ua hmoov tsuj xeeb tsis muaj qab hauv dab tsi yuav zeem tseeb txog peb txoj kev ntseeg. Peb tshaj txog Yes Xus kev sawv rov los thiab peb tos txog lub caij nws yuav rov tuaj.

Peb yuav teev Ntuj thiab hais tias : “Tswv Ntuj lub Ceeb Tsheej tuaj txog ze lawm.”

Tam sim no kev cia siab uas lub thaj txi Ntuj hais txog, yog kev muab siab rau txog peb cov hauj lwm nyob hauv lub ntiaj teb no. Tsis txhob swb rau kev piam sij los yog kev ua tsis tiav, tab sis yuav yug peb txoj kev ntseeg nyob hauv kev cia siab tsis muaj tag. Qhov tseeb tiag cov kab ke no qhia txog yam no tias : “Ceev faj thiab nquag teev Ntuj, zoo siab cav txog thiab ua nyob hauv kev nyiam kev hlub.” Tshwj xeeb tshaj yog cov zaj nyeem nyob hauv Kav Tos Liv tej kab ke ua kom pom tias : cov caij nyoog hauv tej kab ke zoo ib yam li kev tawm rooj hauv lub neej, qhov kawg nws yuav xaus mus. Ntawd yog Yes Xus kev sawv rov los, thiab ua kom pom txog qhov pib dua tshiab uas tshwm sim los ntawm qhov kawg. Vim qhov pib ntawm cov kab ke no, nws yog qhov xaus raws li peb nyeem nyob hauv ntawv Qhib Yav Tom Ntej zaj 1, qib 7 thiab qib 8.

Qhov tseeb tiag thawj Hnub Chiv hauv lub Caij Tos Huab Tais hauv 3 lub xyoo, xws li xyoo A, xyoo B thiab xyoo C, puav leej hais txog kev rov tuaj zaum kawg ntawm Yes Xus thiab kev npaj siab tos txais. Txhua zaus hauv cov kab ke, yog qhia txog kev ua lub neej ntawm tib neeg. Nyob hauv 3 lub xyoo uas yog A/B/C, yog pib los ntawm qhov kawg. Hauv kev tshaj lub Moo Zoo hais txog Yes Xus tuaj thiab nto koob meej hauv lub caij kawg. Tab sis thov kom tso siab tias nov tsis yog hnub ntiaj teb kawg. Yog kev tshaj txog Yes Xus kev daws tso uas tob tshaj qhov peb xav. Kev tshaj tawm txog qhov kawg ntawd, tsis yog ua kom muaj kev ntxhov siab los nyuaj siab ib yam li txoj hlab ntsha txhaws. Tab sis yog ua kom ras txog thiab nquag teev Ntuj, zoo siab hauv kev cia siab thiab muab siab rau hauv kev nyiam kev hlub. Tos txog hnub kev cia siab tsheej xeeb thiab kev rov tuaj ntawm peb tus Huab Tais Yes Xus.