Lub tswv yim txawj ntse thiab thoob tsib.
Nyob hauv peb thawj zaj nyeem hnub no yog nyob hauv ntawv Vaj phau ib. Yog koj xav txuas lus nrog Tswv Ntuj, mas lo lus luv luv no yuav muaj qab hau heev hauv kev txhib koj. Hauv tus vaj Xas Los Moos txoj kev kav teb chaws, nco ntsoov tias Xas Los Moos yog Das Vis thiab Npas Xes Npas tus tub. Nws tau ua vaj tom qab kev sib ntau sib tua. Thaum ntawd nws yog ib tug tub hluas. Nws tsis yog tus vaj Xas Los Moos uas muaj kev txawj ntse thiab thoob tsib. Nws pib muaj hwj chim hauv nws txoj kev ua vaj. Koj sim xav seb, yog koj ua vaj kav ib lub teb chaws, mas tas cov hauj lwm txhua yam poob rau koj ib leeg, ces koj yuav xav tias “kuv npaj tsis txhij”, koj yuav piav koj tej kev nyuab siab rau Tswv Ntuj thiab koj thov Ntuj.
Nov yog thawj yam uas Xas Los Moos tab tom ua. Nws nug Tswv Ntuj thiab hais tias : “Kuv tus Huab Tais, kuv tus Tswv Ntuj, koj tau xaiv kuv ua koj tus tub txib ua vaj. Kuv tsuas yog ib tug tus hluas xwb, kuv tsis pom qab yuav ua li cas ?” Koj sim xav tias yog koj tau ua vaj thiab muaj ntau yam koj yuav ua, koj yuav hais tias :
“Kuv tsis xav tias kuv yuav ua tau.” Tab sis Xas Los Moos hais tias :
“Tswv Ntuj, kuv yog ib tug tub hluas xwb, kuv tsis txawj ntaus thawj. Thov koj pub ib lub tswv yim thoob tsib txawj xav tom ntej tom qab zoo rau koj tus tub txib, kom nws txawj pom tias qhov twg yog zoo, qhov twg yog phem. Vim tias leej twg thiaj yuav txawj coj koj haiv neeg coob tas npaud ?”
Yog koj, mas koj yuav thov kom Tswv Ntuj muab nyiaj muab kub thiab muab cuab tam rau koj. Koj yuav thov kom Tswv Ntuj muab tej lub tsev zoo nkauj rau koj. Thov kom koj cov yeeb ncuab ntshai koj thiab thov kom koj muaj ib pab tub rog coob tshaj nyob hauv ntiaj teb, ua kom koj kav teb kav chaw tau zoo raws koj siab xav. Tab sis Xas Los Moos tsis xav li ntawd. Nws tsis ntshaw kev nplua nuj, lub meej mom, kev sov siab, kev muaj hwj chim xws li neeg ntiaj teb ntshaw. Nws tsuas thov kom Tswv Ntuj pub ib lub tswv yim thoob tsib txawj xav tom ntej tom qab zoo rau nws, ces Tswv Ntuj ua raws li Xas Los Moos thov.
Tab txawm koj muaj cuab tam, koj nplua nuj, muaj hwj chim thiab koj pab tub rog muaj zog tshaj plaws nyob ntiaj teb no, tab sis yog koj tsis muaj lub tswv yim thoob tsib txawj xav tom ntej tom qab, mas koj kuj tsis paub tias koj yuav ua li cas rau tej yam ntawd. Tej yam ntawd txawj ua rau koj txaus siab nraum cev nqaij daim tawv xwb, qhov kawg nws yuav rov los ua mob thiab tsim txom koj mus txog qhov kawg. Koj puas xav tau sob kawm ntawm fab ntsuj plig puag txheej thaud los txog tam sim no ? Cov tub ntxhais hluas lawv xav tau dab tsi hauv lub neej ? Tej yam ntawd yog kev nplua nuj, lub meej mom, kev sov siab, lub hwj chim, nyiaj kub thiab tsheb. Qhov ntawd yog qhov lawv xav tau. Tab sis yog lawv tau tej ntawd los, lawv tsis muaj lub tswv yim thoob tsib, ces tej kev nplua nuj ntawd yuav rov los tsim txom lawv.
Kuv xav tham me ntsis qhia nej txog tej lub npe tej yam zim txwv no, cov neeg no muaj dab tsi uas zoo ib yam ? Tub hu nkauj, kws kos duab lawv puav leej yog tub hluas ntxhais hluas uas tau txais cuab tam los ntawm lub ntiaj teb. Tab sis lawv tsis nco ras txog Tswv Ntuj lub ntiaj teb. Lawv tsis muaj lub tswv yim thoob tsib txhawj xav tom ntej tom qab kom txaus. Li ntawd, txhua yam uas lawv muaj khaws tseg thiaj kheev kheev rov los tsim txom lawv. Peb tig rov mus rau zaj hais txog tus kws txuj Faustu. Nws xav tau kev txawj ntse, xav kom tas txhua yam kev txawj ntse yog nws li.
Li ntawd, yam uas nws tau txais kuj tig los ua phem rau nws. Vim nws muaj kev txawj ntse, tab sis nws tsis muaj lub tswv yim thoob tsib. Los yog zaj hais txog tus vaj Midas, nws xav tau kub. Nws hais tias Tswv Ntuj, thov kom txhua yam kuv tau kov rais ua kub kom tas. Ces nws kuj muaj li ntawd tuaj. Txog qhov kawg, nws mus kov cov neeg nws nyiam nws hlub, ces lawv khov ua tej tus neeg kub nyob ntawm nws xub ntiag tas.
Yog koj tau tas ntiaj teb lub cuab tam, tab sis koj tsis muaj lub tswv yim ntse thoob tsib, mas nws yuav zoo dab tsi rau koj ? Qhov kawg tej yam ntawd yuav rov los tsim txom koj xwb. Tab sis Xas Los Moos tsis thov tej ntawd. Tswv Ntuj thiaj hais tias : “Vim koj thov yam no, tsis yog txoj sia ntev, tsis yog kev nplua nuj, tsis yog ntiaj teb lub cuab tam, tsis yog ua kom koj muaj ib pab tug rog loj. Ces Tswv Ntuj thiaj pub yam uas Xas Los Moos thov.
Nov yog qhov tseeb los ntawm Ntawv Ntshiab. Tswv Ntuj tsis tib koj cov lus thov Ntuj li no. Yog koj hais tias : “Tswv Ntuj, thov koj pub ib lub tsheb zoo nkauj tshaj plaws rau kuv, kuv vam txog Yes Xus los thov Koj.” Lo lus no mas yog ib lo lus ruam kawg.
Tab sis yog koj hais tias : “Tswv Ntuj, thov koj pub ib lub tswv yim ntse thoob tsib rau kuv, thov koj pub kuv pom lub ntiaj teb xws li koj pom. Kuv vam txog Yes Xus Pleev los thov koj.” Nov yog lo lus thov Ntuj zoo kawg thiab Tswv Ntuj yuav tsis tib koj cov lus thov. Thov nco ntsoov tias Tswv Ntuj tsis tib tus ntsuj plig ntawm tus neeg thov.
Li ntawd, yog thov txhua yam hauv lub ntiaj teb no, mas Tswv Ntuj yuav hais tias tej ntawd tsis zoo rau koj. Yog li yam twg thiaj zoo rau peb ? Vam txog Leej Ntuj Plig Ntshiab thov Tswv Ntuj, ces Tswv Ntuj yuav tsis tib koj lo lus thov. Kuv tau hais rau cov neeg raws kuv qab dhau los lawm, thiab nws yog ib lo lus nyob rawv hauv kuv lub siab uas kuv yog ib tug Tswv Qhia. Kuv tau txais los ntawm Tos Mas As Khis Nas uas Tswv Ntuj hais lus rau nws nyob saum Ntoo Cuam tias : “Tos Mas, koj sau tej yam hais txog kuv tau zoo heev. Koj xav tau dab tsi ua paj tshab ?” Tos Mas xav thov dab tsi kuj tau. Tos Mas puas hais tias “ Tswv Ntuj, thov kom kuv tau ua ib tug kws txuj nto npe tshaj plaws nyob ntiab teb no. Thov koj pab ua kom tib neeg nkag siab thiab nyiam yam uas kuv sau. Tswv Ntuj, thov koj pub lub cuab tam rau kuv.” Tab sis Tos Mas tsis hais li ntawd, nws hais tias : “Kuv tsis xav tau dab tsi kiag. Dhau ntawm kuv tus Tswv Ntuj, mas kuv tsis muaj dab tsi hlo li. Tswv Ntuj tib leeg xwb, thiaj yog yam kuv xav tau. Thov koj pub lub tswv yim ntse thoob tsib rau kuv, thov koj nyob nrog kuv.” Tswv Ntuj teb tias : “Kuv yuav muab yam koj thov rau koj.” Yam Tswv Ntuj muab yog lub tswv yim thoob tsib. Yog tias koj muaj lub tswv yim ntse thoob tsib lawm, koj yuav txawj ua li cas rau koj lub cuab tam. Koj yuav txawj ua li cas rau kev nplua nuj thiab yuav txawj ua li cas rau cov neeg hwm koj qhuas koj.
Thov koj mus saib ntawv Moo Zoo me ntsis, vim peb tseem yuav nyeem Mas Tais ntawv Moo Zoo txuas ntxiv. Tab sis koj yuav nco ntsoov Xas Los Moos cia. Nco yam peb nyuam qhuav hais tas cia. Yes Xus hais tias : “Tswv Ntuj lub Ceeb Tsheej yog zoo li ib nras nyiaj faus nyob hauv ib daim liaj.” Thaum muaj neeg pom, mas nws yuav muab nws lub cuab tam muag thiab mus yuav daim liaj ntawd los. Zoo li cov laus txheej thaud thaum lawv khiav tsov rog, mas lawv muab lawv tej nyiaj coj mus faus av cia. Ces lawv tsis tau rov los khawb lawv cov nyiaj lawm. Ntev mus lawv kuj tuag tas, thiab tsis muaj leej twg paub tias lawv cov nyiaj faus nyob rau qhov twg. Dhau mus ntau tiam neeg, muaj neeg mus laij teb thiab lawv pom cov nyiaj ntawd.
Thov koj nyeem zaj no thiab koj xav txog ib daim duab nyob hauv cov lus piav no, ces koj yuav paub tias Tswv Ntuj lub Ceeb Tsheej yog zoo li ntawd. Yog koj pom lub cuab tam faus nyob hauv thaj av ntawd, mas koj yuav muab tas txhua yam koj muaj muag kom tas thiab mus yuav kom tau thaj av ntawd los. Lub cuab tam ntawd yog dab tsi ? Yog lub tswv yim ntse thiab txawj xav tom ntej tom qab. Lub cuab tam zais ntshis ntawd yog dab tsi ? Yog Yes Xus nyob hauv koj lub siab. Kuv tsis muaj dab tsi kiag li, yog dhau ntawm Tswv Ntuj lawm. Qhov no yog lub cuab tam uas zais ntshis.
Ib lo lus ntxiv, Tswv Ntuj lub Ceeb Tsheej yog zoo li ib tug los pav nrhiav lub hlaws npliag deg. Thaum nws nrhiav pom lawm, nws yuav muab tas txhua yam nws muaj muag thiab mus yuav kom tau lub hlaws npliag deg ntawd los. Qhov ntawd yog qhov peb sawv daws xav. Kev ua lub neej nyob, peb tsuas nrhiav yam uas ua kom peb muaj kev sov siab xwb. Nws yog kev nplua nuj, kev sov siab thiab lub meej mom. Tab sis thaum koj nrhiav pom yam muaj nqis dua ntawd, uas yog lub tswv yim thoob tsib thiab txawj xav tom ntej tom qab, yog Yes Xus tus uas nyob hauv koj. Thaum koj pom tej yam ntawd lawm, koj kuj yuav muab tas txhua yam muag mus, vim tej ntawd tsis yog lub cuab tam uas koj xav tau. Leej twg thiaj xav tau lub hlaws npliag deg ntawd ? Cov xav tau yog tas peb sawv daws. Vim hauv peb lub neej mas peb lub siab muag thiab qaug rau tej yam ntawd. Txhais tias peb puav leej xav tau lub cuab tam yuam kev.
Hos lub cuab tam faus nyob hauv nras liaj, peb tsis nco qab txog. Thov peb txhob hnov qab, vim peb lub neej nyob tsis ntev. Thaum koj nrhiav pom lub hlaws npliag deg ntawd lawm, nws yog Tswv Ntuj. Yog tus Tswv Ntuj uas koj nyeem nyob hauv hnub no. Yog koj muaj pob ntseg mloog thiab muaj qhov muag pom, koj yuav ntsib nws nyob hauv cov zaj nyeem uas peb niaj hnub nyeem. Yog koj ntsib lawm, koj yuav muag tas txhua yam, vim Tswv Ntuj lub txiaj ntsim thiab koj txoj kev sov siab. Koj kav tsij yuav kom tau mog !
Kwv tij Hmoob sawv daws ! Hnub no peb tau hnov hais txog tus vaj Xas Los Moos thov lub tswv yim txawj ntse thiab kev thoob tsib ntawm Tswv Ntuj. Peb yuav xyaum ua li tus vaj Xas Los Moos uas txawj thov yam zoo ntawm Tswv Ntuj. Peb txhob thov kev nplua nuj, lub meej mom thiab ntiaj teb lub cuab tam.
Peb thov yam xis Tswv Ntuj siab, ces Tswv Ntuj yuav pub yam ntawd rau peb.
Thov peb tus Huab Tais Yes Xus Pleev lub txiaj ntsim nrog nej nyob, ua nej siab kaj lug. Peb mam sib ntsib dua, nej sawv daws nyob zoo !
