Lub suab thov kev khuv leej thiab kev zam txim ntawm Tswv Ntuj A Cry for God’s Mercy and Forgiveness

Lub suab thov kev khuv leej thiab kev zam txim ntawm Tswv Ntuj.

Lub Caij Plaub Caug, kab ke yoo, teev Ntuj thiab sib pub txhiam xws noj.

Xyoo no lub Koom Txoos Kav Tos Liv ua cov kab ke txais tshauv hnub tim 14 lub 2 hlis. Hnub no yog hnub tseem ceeb nyob hauv lub Caij Plaub Caug, yog lub caij npaj lub siab kom huv tos txais lub Caij Hla uas yog nco txog Yes Xus txoj kev sawv rov los.

Nyob hauv cov xyoo 500 txog 600, cov neeg pib coj kab ke yoo nyob hauv Hnub Plaub kom ntseeg tau tias yog kab ke yoo tiag nyob hauv 40 hnub. 40 hnub no tsis xam cov Hnub Chiv. Hnub Plaub yog thawj hnub nyob hauv lub Caij Plaub Caug, yog kab ke ntawm thawj txheej neeg. Yog kev them txim txhaum ntawm cov neeg ua txhaum uas pib nyob hauv thawj lub lis piam hauv lub Caij Plaub Caug.

Thaum xub thawj mas yog pib nyob hauv Hnub Ob, yog tom qab thawj Hnub Chiv hauv lub Caij Plaub Caug. Tom qab no lub Koom Txoos tau muab hloov ua Hnub Plaub txais tshauv. Cov neeg rov thim xav txheej thaud lawv hnav cov khaub ncaws them txim txhaum, muab tshauv los pov rau saum lawv thiab ntiab lawv tawm ntawm lub Koom Txoos. Cov khaub ncaws thiab cov tshauv no tau txais lub zog txhawb siab los ntawm Ntawv Cog Lus Qub thiab ntawv Moo Zoo, Mas Tais zaj 11 qib 21. Tertullian tus tsim kev teev hawm sab hnub poob thiab Cyprian tus kws kev teev hawm thiab yog Txiv Plig. Nkawd kuj tau hais txog cov kab ke yoo nyob hauv nkawd tej ntawv uas sau tseg.

Cov kab ke ntiab neeg ploj nyob hauv xyoo 900 txog 1000, tab sis cov kab ke txais tshauv tseem nyob. Xyoo 1901, Vaj Qhia Urban tim II thiaj kom txhua lub tsev teev Ntuj yuav tsum ua cov kab ke no nyob hauv lub thaj txi Ntuj. Cov kab ke txais tshauv yog ua tom qab nthuav ntawv Moo Zoo tas. Yes Xus cov lus hais nyob hauv Mas Kos ntawv Moo Zoo. “Tig nrob qaum rau kev txhaum thiab ncaj ncees rau lub Moo Zoo,” thiab tus piv txwv qub yog “Yuav nco ntsoov tias koj yog plua tshauv, koj yuav rov mus ua plua tshauv”. Thaum txais tshauv, mas Txiv Plig yuav muab tshauv los pleev ntawm hauv pliaj thiab hais cov lus nyob hauv ntawv Hauv Paus zaj 3 qib 19.

“Koj yog av puab, koj yog av luaj, ces koj yuav rov mus ua av luaj.”

Kab ke txais tshauv, ua kom yus rov nco txog yus tej txhaum. Yog lub cim vam txog kev khuv leej thiab kev zam txhaum ntawm Tswv Ntuj.

Nyob hauv tsev teev Ntuj, peb rov thim xav thiab teev Ntuj nco txog Yes Xus lub suab hu peb. Nyob hauv Mas Tais ntawv Moo Zoo Yes Xus hu peb, kom peb teev Ntuj, yoo mov thiab sib pub. Thaum koj teev Ntuj, koj txhob ua li cov neeg zoo sab nraud. Thaum koj yoo mov, koj txhob nyob dub txig. Thaum koj pub rau luag, koj txhob cia koj sab tes laug paub tias koj sab tes xis ua dab tsi.

Kev teev Ntuj yog kev mloog thiab teb Tswv Ntuj lub suab hu hauv txhua txhia hnub, kom tau txhawb thiab yug kev sib raug zoo ntawm peb thiab Tswv Ntuj raws li Leej Ntshiab Tes Les Xas As Vis Las cov lus. Kev teev Ntuj yog kev nrog yus tej phooj ywg sib faib, yam li siv sij hawm nyob ib leeg nrog tus peb paub thiab tus hlub peb. Yog peb tsis muaj kev teev Ntuj, tsis hais nyob ib leeg los yog nrog sawv daws sib koom ua ke, mas peb txoj kev sib raug zoo yuav tsuag zuj zus. Tej zaum kuj yuav mus txog qhov ntsiag to ntawm peb. Nyob hauv Vaj Qhia Fas Ntshis Kus tsab ntawv xyoo 2018, nws hais tias : kev muab lub sij hawm los teev Ntuj kom ntau, yuav pab kom peb lub siab yeej tej lus dag nyob hauv peb kom txhob dag peb tus kheej. Ces peb yuav ntsib kev nplij siab uas yog qhov Tswv Ntuj muab rau peb.   

Kev yoo mov yog kev them txim txhaum uas tshwj xeeb kawg, thiab yog kev hu zaum ob ntawm Yes Xus nyob hauv cov kab ke Kav Tos Liv. Peb sawv daws yuav tsum paub txog txhua txhia fab, tsis hais kev haus luam yeeb los yog haus dej haus cawv, kev twv txiaj yuam pov uas txwv txiav tsis tau, kev dai tuag hauv lub siab ntsws, kev muab hlob hauv fab ntsuj plig, kev siv tshuaj kom muaj zog, kev siv Internet tsis raug cai, kev saib TV ntau dhau los yog qaug rau tej kev lom zem, kev xyav moo, kev yoo mov thiab tsis lees txais tus kheej. Ua lub neej nyob nrog txoj kev txaus siab rau yam peb muaj, mas peb lub siab yuav muaj zog tuaj nyob hauv tej hauj lwm peb ua uas yog Tswv Ntuj lub hom phiaj. Peb yuav txawj hwm tus kheej thiab txawj nco txog lwm tus neeg ntau dua tuaj.

Kev pub txhiam xws noj, yog Tswv Ntuj lub suab hu zaum peb, yog kev pub. Yes Xus khuv leej cov neeg pluag txom nyem tas mus li. Nws txaus siab rau tus poj ntsuam uas muab tag nws lub neej coj los pub rau luag.

“Kuv hais qhov tseeb rau nej tias : tus poj ntsuam no pluag, tab sis nws tso nyiaj ntau tshaj sawv daws huv tib si. Vim tas cov neeg ntawd, lawv rho lawv cov nyiaj seem los pub ua paj tshab. Tab sis tus poj ntsuam ntawd rho nyiaj hauv nws txoj kev pluag. Nws muab tas nws lub cuab tam los tso rau hauv.”

Vaj Qhia Fas Ntshis Kus xav kom peb cov neeg ntseeg ua raws Yes Xus cov Thwj Tim tus piv txwv, thiab kom peb txoj kev sib faib zeem tseeb txog kev muaj feem cuam sib koom nyob hauv tsev teev Ntuj. Kev ua Yes Xus thwj tim yog hais txog kev ua lub neej muaj lub siab pab luag tej. Peb txhua tus raug hu kom muaj feem cuam tshaj lub Moo Zoo thiab hloov peb lub ntiaj teb.

Nyob hauv lub caij yoo 40 hnub, lub Koom Txoos saib zoo li nrog Yes Xus nyob hauv teb chaws suab puam. Peb yuav nquag teev Ntuj, tsim koob hmoov thiab ua kom fab ntsuj plig ruaj khov. Lub caij no yog lub caij npaj peb lub siab kom muaj feem cuam koom nrog lub Caij Hla, thiab muab siab rau ua lub neej mus raws kev ntseeg nyob hauv peb lub neej niaj hnub.