Lub hwj chim hauv kev ntseeg Kav Tos Liv. (Power in the catholic teaching)
Hnub no kuv xav rov hais txog Paj Lug tsab ntawv uas nws sau mus rau Tis Mos Tes thiab phau ntawv As Mos. Vim tias thaum peb nyeem ua ke lawm, yuav ua kom peb nkag siab txog kev ntseeg Kav Tos Liv lub hwj chim thiab kev tseev tsim lub hwj chim tau zoo. Hais txog lub Koom Txoos, nws yog qhov xyuam xim heev. Kuv xav tias kev sib tham feem ntau hauv zim txwv no, kheev kheev sib tawg ua ob sab. Raws qhov tseeb lub Koom Txoos cov lus teb muaj ob yam. Kuv xav tias koj yuav pom qhov teeb meem ntawm zaj no nyob hauv ob nqe lus uas lub Koom Txoos muab rau peb.
Ib tug kws txawj xav nyob hauv tiam 19 hais tias : “Tas txhua tsav txhua yam yog zwm rau lub hwj chim.” Yog qhov tseeb uas kuv piav yooj yim dhau, tab sis qhov tiag hauv paus yog lub hwj chim thiab kev siv lub hwj chim yuam kev. Kev siv lub hwj chim, leej twg yog tus muaj hwj chim, leej twg yog tus tau txais txiaj ntsim qab hau los ntawm lub hwj chim, leej twg yog tus raug lub hwj chim kav ? Tshwj xeeb tshaj yog zim txwv no lub ntiaj teb raug faib ua ob tog. Ib tog muaj hwj chim thiab cov raug caij tsuj tsis muaj hwm chim, ces lawv txoj kev tawm tsam tseem muaj ntxiv mus.
Txoj kev xav no los kav tas coob leej tej kev xav, ua kom ntsia pom tias lub hwj chim yog dab ntxwg nyug. Thaum koj hais tias : “Saib seb ! Pab neeg ntawd muaj hwj chim. Yog kawg ! Vim lawv xav caij tsuj lwm tus neeg. Tus neeg ntawd muaj hwj chim thiab ntawd yog qhov ua tsis yog lawm. Pab neeg no tsis muaj hwj chim thiab nws ua teeb meem.” Li ntawd, lub hwj chim feem ntau kheev kheev raug ntsia tias yog qhov tsis zoo. Hauv Ntawv Ntshiab muaj ib qho uas txawv, vim Ntawv Ntshiab tsis ntsia pom tias lub ntiaj teb faib ua ob tog. Yog cov neeg caij tsuj uas muaj hwm chim thiab cov raug caij tsuj uas tsis muaj hwj chim..
Muaj ib nqe lus tseem ceeb nyob hauv Ntawv Ntshiab, kuv xav tias yog lo lus uas Ntawv Ntshiab hais nyob hauv zaj nyeem ob ntawm peb tam sim no. Nws yog nyob hauv Paj Lug thawj tsab ntawv uas nws sau mus rau Tis Mos Tes. Nov yog yam peb tau hnov. “Kwv tij zoo nyiam ! Ua ntej no kuv thov kom nej muaj kev teev Ntuj, thov Ntuj thiab ua tsaug rau sawv daws, rau tus vaj thiab rau txhua tus uas muaj hwj chim. Kom peb tau ua lub neej sov siab puv npo hauv kev mloog lus thiab lub meej mom.”
Yog Paj Lug xav tias tus vaj yog neeg tsis ncaj ncees, mas tus vaj tsuas zoo li tus neeg siv lub hwj chim quab yuam. Vim li cas koj thiaj thov Ntuj pub rau lawv ? Tej zaum koj xav qhau lawv, koj xav tiv lawv. Tab sis tsis yog, nws tab tom teev Ntuj thiab thov Ntuj, rau tus vaj thiab tas cov neeg muaj hwm chim. Vim li cas ? Kom peb tau ua lub neej pheej xeeb thiab sov siab.
Lub hom phiaj hauv kev tseev tsim lub hwj chim yog dab tsi ? Sim saib ma ! Txhob ua kom lub hwj chim yog dab ntxwg nyug. Vim qhov tseeb tiag Tswv Ntuj yog tus muaj hwj chim loj kawg. Li ntawd, lub hwj chim thiaj tsis yog teeb meem. Yog tias Tswv Ntuj muaj hwj chim, tus uas muaj feem cuam hauv Tswv Ntuj, tus uas ua raws Tswv Ntuj hauv kev siv nws lub hwj chim tab tom ua yam zoo tiag tiag. Ntawd yog qhov peb tau hnov, kom peb ua lub neej pheej xeeb thiab sov siab hauv kev mloog lus thiab lub meej mom. Lo lus piav luv kuj tsis phem luaj twg hais txog tseem hwm lub hom phiaj. Lub hom phiaj tseeb tiag, yog saib xyuas kev thaj yeeb nyab xeeb, kom peb tau ua lub neej zoo. Hauv fab kev lag luam, kev phooj ywg thiab kev sib raug zoo. Yog tias peb ua lub neej ntxhov quav niab, peb kuj yuav tsis vam meej hauv tib neeg tau. Li ntawd, peb thiaj xav tau tus muaj hwj chim uas tuaj yeem muab kev sov siab no tau. Kuv nyiam rov hais txog “kev mloog lus thiab lub meej mom” ib yam. Ib qho uas tseem ceeb hauv cov neeg ntseeg Kav Tos Liv, yog lub meej mom ntawm tib neeg ntiag tug.
Tseem hwv lub hom phiaj yog dab tsi ? Ib feem ntawm tseem hwv lub hom phiaj, yog kev txuag tsoom pej xeem lub meej mom. Peb hais txog tib neeg kev ncaj ncees thiab tseem hwv yog tus teeb tawm los kom tau txuag txoj cai ntawd. Tsis yog kev tsim, tab sis yog kev txuag pov hwm. Peb yuav los mloog txog kev sov siab, kev thaj yeeb thiab lub meej mom. Thaum Paj Lug tab tom hais txog, nws ntxiv lwm yam nrog thiab. Qhov no yog qhov zoo thiab yog qhov Tswv Ntuj txaus siab. Peb tus cawm seej thov Ntuj rau cov muaj hwj chim. Vim li cas ne ? Leej twg uas xav kom peb txhua tus tau txais kev cawm thiab nkag mus txog kev txawj ntse tseeb tiag ? Nws tau hais nyob hauv fab kev ntseeg tseeb kawg. Ib lub hom phiaj ntawm lub hwj chim hauv kev tseev tsim, yog pub lub sij hawm kom kev cawm tshwm sim, uas yog npaj cov hauj lwm hauv kev ntseeg uas vam meej. Peb yuav los hais txog kev ywj pheej hauv kev ntseeg kom raug. Qhov ntawd yog kev qhia kev ntseeg ywj pheej. Ib lub hom phiaj ntawm tseem hwv, yog pub lub sij hawm rau kev ntseeg vam meej. Kom txhua tus tau txais kev cawm thiab nkag mus txog kev txawj ntse tseeb tiag. Kom kev txawj ntse raug faib thiab muaj lwm yam ua kom paub txog qhov tseeb uas yuav mus tau.
Txhob saib lub hwj chim tias yog dab ntxwg nyug zoo li nws yog qhov phem heev. Nws tsuas yog kev caij tsuj xwb. Tsis yog li ntawd, peb yuav thov Ntuj rau cov muaj hwj chim hauv txhua yam laij thawj no, kom peb muaj kev sov siab hauv kev loj hlob. Kom peb muaj kev ywj pheej hauv kev teev Tswv Ntuj tiag tiag. Kom peb tau txais lub meej mom thiab peb txoj cai. Txhua yam no puav leej yog qhov zoo thiab tseem ceeb. Yog qhov laij thawj tias vim li cas kev ntseeg thiaj zeem tseeb tias tseem hwv yog tus teeb tsa kom muaj feem cuam nrog Tswv Ntuj lub hwj chim. Rov hais dua thiab peb tsis tau txhais tias : “Lawv tsis muaj chaw tib thiab peb tsis tsim nyog teeb tej lo lus nug hais txog lawv.” Tsis tau txhais tias lub hwj chim hauv kev tseev tsim uas ncaj ncees, muaj feem cuam hauv Tswv Ntuj txoj kev kav lub ntiaj teb. Li ntawd, hauv cov Kav Tos Liv tej kab ke, peb thiaj tau txais kev txhawb nqa zoo. Ces tsim nyog peb yuav thov Ntuj pub rau cov neeg muaj hwj chim.
Thaum peb sau cov lus thov thaj txi Ntuj, lub Koom Txoos qhia kom peb thov Ntuj thawj zaug rau Vaj Qhia thiab cov Tswv Qhia, tus uas coj peb hauv fab ntsuj plig. Dhau ntawd kuj thov Ntuj zaum ob, yog qhov uas kuv kheev kheev ua zoo li no tas mus li thaum thov Ntuj hauv lub thaj txi Ntuj niaj hnub. Thov Ntuj zaum ob, mas yuav thov Ntuj pub rau cov muaj hwj chim thiab cov muaj hwj chim hauv kev tseev tsim. Peb thov Ntuj rau tus Txoov Tim Tswv, cov pwm tsav, cov nom sawv pej xeem cev thiab peb tus thawj tswj xeev. Lub hwj chim tsis txhob saib tias yog dab ntxwg nyug. Peb yuav xav txog lub hom phiaj hauv kev ua, kev ncaj ncees thiab lub hwj chim ntawm fab ntsuj plig tiag tiag. Tam sim no kev ntseeg Kav Tos Liv muaj ib feem uas qhia kom pom meej tseeb nyob hauv Paj Lug tsab ntawv uas sau mus rau Tis Mos Tes. Tab sis zaum no peb los saib dua lwm fab thiab vim lub hom phiaj ntawd, kuv thiaj muab ntxeev mus phau ntawv As Mos. Tus Yaj Saub uas muaj hluav taws. As Mos yog ib tug Yaj Saub loj nyob hauv cov Yaj Saub txheej nrab. Txhais tias nws phau ntawv luv dua lwm cov Yaj Saub. Tab sis As Mos kheev kheev raug hais nyob hauv cov thawj coj tiam 20. Vim As Mos yog ib tug hauv tsoom pej xeem lub suab thov kev ncaj ncees, thiab lub suab ntawm cov neeg pluag txom nyem.
Tam sim no peb los mloog lub suab uas nrov tawm los kom tau tiv lub hwj chim yuam kev. Tom qab tau hais txog yam zoo zoo hais txog lub hwj chim hauv kev tseev tsim no lawm, tsis txhob muaj lus sib cav txog dab tsi. Kuv thov hais txog tus Yaj Saub As Mos. Nws hais tias : “Yuav mloog yam no, koj tus uas caij tsuj cov neeg pluag thiab rhuav tshem daim av cov neeg pluag. Thaum twg lub hli tshiab mam xaus. Nej thov muab nplej muag thiab caiv hnub Xas Npas Tos. Thawj yam nws meej tseeb kawg. Koj muaj hwj chim caij tsuj cov neeg pluag. Koj tsis tau txuag lawv lub meej mom. Koj tsis tau txuag lawv kev sov siab. Koj tab som siv koj lub hwj chim caij tsuj lawv. Kom rhuav tshem cov neeg pluag, tsis yog txhawb nqa lawv. Piv txwv li fab kev lag luam uas ua kom haum, yog ua kom neeg tau dim ntawm kev pluag txom nyem. Tab sis koj tsis tau txhawb nqa lawv, koj tab tom caij tsuj cov neeg pluag.
Cov neeg muaj hwj chim hauv kev tseev tsim lawv puas ua li no ? Peb pom lawv nyob hauv txhua tiam txhua txheej. Niaj hnub no peb pom lawv nyob ib ncig peb thiab lub Koom Txoos kuj qw suab tawm tsam lawv. Feem ob kuj ua rau peb ua xyem xyav me ntsis, tab sis kuj yog hais txog qhov tseem ceeb. Koj yuav nug tias : “Hnub tshiab yuav xaus rau thaum twg ? Kom peb muag nplej thiab caiv hnub Xas Npas Tos. Qhov uas lawv hais txog, yog lub caij ua thaj txi Ntuj thiab qee lub caij hauv nruab xyoos. Lawv tsis tso lus kheev kom ua hauj lwm. Tos tsis taus lawm, tos kom tsis muaj kev ntseeg, kom tau rov qab los ua hauj lwm huab noj huab haus. Ntawd yog qhov lawv tab tom hais txog. Yuav saib nyob hauv Tis Mos Tes tsab Ib. Ib qho hom phiaj ntawm tseem hwv uas ua tau zoo, yog tsim kev vam meej hauv kev ntseeg. Tab sis nyem no cov muaj hwj chim hais tias : “Kev ntseeg tab som tav kuv txoj kev huab noj huab haus. Tos tsis taus lawm, uas yuav tos tej kab ke no xaus. Ntawd yog qhov hla tseem hwv txoj cai thiab lub hwj chim heev kawg.
Tam sim no peb yuav los xav txog tus neeg nplua nuj thiab muaj hwj chim uas nws hais tias : “Kuv yuav txo tus nqi nyiaj Ifa nce ua nyiaj shekel, thiab teeb dua rab teev kom tau kev nyiag noj nyiaj.” Nws yog dab tsi ? Tshwj zias kev huab noj huab haus hauv kev lag luam. Peb tab tom tham txog kev luj thiab ntsuas toob xib, thiab peev nyiaj txiag yog dab tsi ? Tiag tiag mas tsim nyog yuav ua kom ncaj ncees. Kuv yuav daws kho txoj cai, kuv yuav ua kom tau yam uas kuv xav tau. Tab sis txheej thaud txhua yam nws yog zoo li ntxhib kawg, tsuas muaj tib txog kev ntsuas xwb. Zim txwv no puas tseem muaj ua li ntawd ? Zim txwv no tsuas yog siv lub tswv yim ntxhov dua thiab nws muaj qee yam zais nyob hauv. Niaj hnub no cov neeg ua lag luam tab tom nrhiav kev ua kom tau txiaj ntsim qab hau rau tus kheej. Lawv puas quav ntsej txog cov neeg pluag txom nyem ? Qhov tiag, puas yog lawv siv cov neeg pluag los ua lawv qhov chaw kev vam meej ? Lub hom phiaj ntawm kev lag luam lub hwj chim yog dab tsi ? Tsis yog txhawb nqa tus kheej xwb, tab sis yog siv lub hwj chim hauv kev lag luam kom tau txhawb nqa lwm tus. Muaj kev ntseeg nyob hauv cov Kav Tos Liv zeem tseeb txog kev lag luam fab kiab khw. Kav Tos Liv tsis nyiam kev lag luam uas yog ntiag tug thiab tus kheej kav, tab sis lawv nyiam kev lag luam uas yog kiab khw. Xav kom neeg muaj feem cuam hauv fab kev lag luam kiab khw coob zuj zus. Kom lawv muaj feem hauv kev txhawb nqa nyias tus kheej. Kav Tos Liv xav tau kev nqis peev uas tsis yog nrhiav txiaj ntsim qab hau rau tus nqis peev xwb, tab sis lawv xav tau kev nqis peev uas txhawb nqa lwm tus. Ua kom sawv daws muaj lub caij thiab muaj hauj lwm ntau tuaj. Peb xav li cas hais txog lub neej hauv kev ua lag luam ntawm peb ? Peb xav li cas hais txog lub hwj chim hauv kev lag luam uas qee tus neeg muaj ? Puas yog ua kom kuv nplua nuj tuaj ? Vaj Qhia puas tau qhia li no rau peb nyob hauv Kav Tos Liv kev ntseeg ? “Thaum xav tau kev cheem tsum thiab qhov tsim nyog hauv koj lub neej, mas koj tau txais lawm. Txhua yam uas koj yog tus tswv, kuj yog cov neeg pluag li.”
Ntawd yog Vaj Qhia Leo 13 tus teeb txoj kev ntseeg hauv Kav Tos Liv txheej tshiab. Ntawd yog lo lus uas nkag siab nyuab. Peb siv lub hwj chim hauv kev lag luam thiab lub hwj chim hauv kev tseev tsim ntawm peb li cas ? Kev ntseeg Kav Tos Liv tsis tau ua kom lub hwj chim yog dab ntxwg nyug. Tsis tau ua kom lub hwj chim hauv kev lag luam los yog lub sij hawm yog dab ntxwg nyug. Tab sis xav kom paub tseeb tias lub hwj chim hauv kev tseev tsim thiab lub hwj chim hauv kev lag luam ntawd, qhov kawg yog ua nyob hauv kev nyiam kev hlub.
Kuv xaus zaj no nyob hauv Tswv Ntuj. Yam twg los sib sau ua ke ? Yog lub hwj chim thiab kev nyiam kev hlub tseeb tiag. Tswv Ntuj yog tus muaj hwj chim tshaj txhua yam, tsis muaj ib yam twg rhuav tshem nws lub peev xwm tau. Tab sis lub hwj chim ntawm Tswv Ntuj ntawd, nws zoo li Tswv Ntuj txoj kev nyiam kev hlub. Tam sim no peb pom tus yawm sij hauv kev ntseeg Kav Tos Liv lawm, thov kom lub hwj chim uas koj siv ntawd muab siv nyob hauv kev nyiam kev hlub mus li.
Kwv tij Hmoob sawv daws ! Hnub no peb tham txog lub hwj chim hauv kev ntseeg Kav Tos Liv los xaus li no xwb. Thov nej cov uas muaj hwj chim hauv txhua fab, siv nej lub hwj chim nyob hauv Tswv Ntuj kev nyiam kev hlub mog !
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug.
Lwm zaus peb mam sib ntsib dua, nej sawv daws nyob zoo !
