Hnub Chiv tim 9 Lub 2 Hlis Ntuj 2025
Lub lis piam 5 hauv lub Caij Nyob Nruab Xyoo
Lus Kas 5:1-11
“Koj txhob ntshai, txij no mus, koj yuav puav neeg.”
Cov kwv tij zoo nyiam, hauv lub Moo Zoo hnub no peb hnov Lus Kas qhia peb txog Huab Tais Yes Xus hu thawj pab thwj tim uas yog Xis Moos Pob Zeb, Yos Kos thiab Zam. Hauv Mas Kos thiab Mas Tais Ntawv Moo Zoo zoo ib yam li thiab, Mas Tais thiab Mas Kos qhia tias Huab Tais Yes Xus hu Pob Zeb thiab lwm cov thwj tim, thaum lawv tab tom pov vas rau hauv dej ntuj. Thaum Yes Xus hu lawv, lawv kuj tso plhuav cov vas puav ntses tseg thiab raws Yes Xus mus. Hauv Zam Ntawv Moo Zoo, As Nres, Pob Zeb tus kwv, yog tus hu Pob Zeb kom ntsib Yes Xus, Pob Zeb thiaj raws Yes Xus mus. Tiam sim, nyob hauv Lus Kas Ntawv Moo Zoo uas peb mloog hnub no txawv Mas Kos, Mas Tais thiab Zam cov, vim tias hauv Lus Kas phau Ntawv, Huab Tais Yes Xus hu Pob Zeb zoo ib yam li Tswv Ntuj hu yaj saub His Xais. Yaj Saub His Xais pom Huab Tais Tswv Ntuj nyob lub Tuam Tsev Teev Ntuj, nws xav tias nws hmoov phem, nws yog ib tug neeg di ncauj tsis huv. Nws yuav tsum ntxuav nws tus kheej kom dawb kom huv, nws thiaj li tsim nyog ua Tswv Ntuj tus yaj saub. Li ntawd, raws li Yaj Saub His Xais zaj, Lus Kas piav tias Pob Zeb kuj ua zoo li ntawd thiab. Thaum Pob Zeb pom Huab Tais Yes Xus lub hwj chim, nws txhos caug ntua pe Yes Xus, nws thov kom Yes Xus txav mus deb nws, vim nws yog ib tug neeg txhaum. Nws tsis tsim nyog ua Yes Xus thwj tim. Tab sis mas, Huab Tais Yes Xus hais rau nws kom txhob ntshai. Ces, Huab Tais Yes Xus tsa nws ua Yes Xus thwj tim. Txij no mus, nws yuav puav neeg. Pob Zeb, Yas Kos thiab Zam hnov li ntawd, lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.
Cov kwv tij hmoob, kev ua neej raws Huab Tais Yes Xus qab, kev ua Yes Xus cov thwj tim kuj zoo li ntawd thiab. Huab Tais Yes Xus hu peb kom lawv nws qab, Huab Tais Yes Xus hu peb kom ua nws cov thwj tim. Huab Tais Yes Xus tsis saib ntawm peb cov txhaum, nws tsis saib ntawm qhov tsis zoo peb tau ua, tiam sim Huab Tais Yes Xus saib ntawm peb lub siab, peb lub siab puas nyiam nws, peb lub siab puas xav kom ua raws li Tswv Ntuj Lo Lus, peb lub siab puas ntseeg txog nws tiag, peb lub siab puas tso siab rau nws coj peb lub neej? Yaj Saub His Xais thiab Pob Zeb kuj zoo xws li peb sawv daws thiab. Peb paub tias peb yog ib tug neeg txhaum, ntau zaus peb ua txhaum, peb lub siab xav txhaum, peb lub ncauj hais txhaum, peb lub cev ua txhaum, peb tsis tsim nyog ua Yes Xus thwj tim. Tab sis mas, hnub no Tswv Ntuj xaiv nws cov thwj tim, Tswv Ntuj hu neeg zoo li Yaj Saub His Xais, Tswv Ntuj hu neeg zoo li Pob Zeb, thiab Tswv Ntuj hu neeg zoo li peb sawv daws thiab kom ntseeg txog Huab Tais Yes Xus, kom tsob hwb Huab Tais Tswv Ntuj. Huab Tais Tswv Ntuj hu peb los ua Nws cov thwj tim, Tswv Ntuj yeej pab peb, Tswv Ntuj yeej foom koob hmoov rau peb kom raws nws qab ruaj ruaj. Thov kom peb txhob ntshai, txhob txhawj siab, Tswv Ntuj yuav saib xyuas peb kom peb pab ua Tswv Ntuj txoj hauj lwm puav neeg, yog tias Tswv Ntuj txoj hauj lwm tshaj Ntuj lus. Peb pab Tswv Ntuj puav neeg yog tias peb ua neej zoo, lub neej ua piv txwv zoo rau luag pom, ua tim khawv txog Tswv Ntuj Lo Lus tseem ceeb “nyiam Tswv Ntuj tas siab tas ntsws, thiab nyiam luag tej zoo li yus nyiam yus tus kheej.” Kwv tij sawv daws, nco ntsoov tias hnub no Huab Tais Yes Xus hais rau peb ib leeg ib leeg tias “Koj txhob ntshai, txij no mus, koj yuav puav neeg.”
