ZAJ NYEEM HNUB TIM 31 LUB 3 HLIS, HNUB CHIV HLA
COV LUS NYOB HAUV ZAM NTAWV MOO ZOO (Z 20: 1-9)
Hnub Chiv Tim 31 Lub 3 Hlis Ntuj 2024
Lub Caij Hla
Zam 20:1-9
“Ces lwm tus thwj tim uas xub mus txog ntawm lub ntxa mam li chaws mus hauv. Nws pom, ces nws ntseeg.”
Alleluia alleluia rau kwv tij zoo nyiam txhua leej txhua tus, Peb tus Huab Tais Yes Xus Pleev sawv rov los lawm! Qhov no yog peb txoj kev ntseeg, qhov no yog peb txoj kev kaj siab lug!
Ntawv Moo hnub no muaj lub ntsiab lus tob tshaj. Kuv xav caw peb sawv daws ras txog lub Moo Zoo 2 yam no. Qhov tim 1 thov caw peb sawv daws ras txog lub ntxa qhuav, lub qhov ntxa khoob lug, tsis pom Yes Xus tus qauv lawm. Kwv tij sawv daws, peb txoj kev ntseeg txog Huab Tais Yes Xus nyob ntawm no. Yes Xus mus tshaj Ntuj lus, kho cov mob, ntiab dab phem, ua hwj huam yees ntxwv ntau yam, ua lub cim ntau yam, nws taug hauv txoj kev txom nyem, ces, nws tuag. Kwv tij sawv daws, hnub no, lub qhov ntxa khoob lug. Peb txoj kev ntseeg yog qhov tseeb lawm, Huab Tais Yes Xus sawv rov los ntawm kev tuag muaj txoj sia tshiab lawm. Yes Xus sawv rov los yog peb kev ntseeg thiab kev cia siab tias peb yuav sawv rov los raws li nws. Peb vam thiab cia siab tias kev tuag tsis yog qhov chaw uas peb txoj sia tas. Cov thwj tim tsis pom Yes Xus lub cev. Lawv xav tias muaj qee leej coj nws lub cev mus tso lawm. Hauv lub ntxa tsis muaj Huab Tais Yes Xus. Qho tseeb qhia dab tsis rau peb? Xws li yav tas los, lub ntxa muaj lub ntsiab hais tias peb tsis muaj txoj sia nyob mus li. Lub qhov ntxa yog tib neeg qhov kawg. Txhua leej txhua tus yuav tuag. Tab sis lub ntxa no uas tsis muaj Huab Tais Yes Yus lub cev lawm muaj lub cim tias kev tuag tsis yog qho chaw uas nws txoj sia tas. Tswv Ntuj muaj hwj chim ua nws sawv rov los, Tswv Ntuj muaj hwj chim tshaj dua kev tuag. Lub qhov ntxa khoob lug thiaj yog peb kev vam thiab kev cia siab rau Tswv Ntuj.
Qhov tim 2 yog Tswv Ntuj lo lus hauv Zam Ntawv Moo Zoo hais tias “nws pom, ces nws ntseeg.” Cov lus no hais txog “lwm tus thwj tim” hauv Zam Ntawv Moo Zoo hnub no. lwm tus thwj tim no, nws tsis muaj npe, peb tsis nws lub npe hu li cas. Tab sis mas peb paub tias Yes Xub hlub nws kawg.
Qhov uas Mab Lias Mas Ntas Las thiab Xis Moos Pob Zeb pom tab sis tsis to taub, tus thwj tim no pom, to taub, thiab ntseeg. Nws ntseeg kuj vim rau qhov hais tias nws pom lub ntxa qhuav, nws pom cov hlab ntaub nyob ntawd, nws pom daim ntaub qhwv taub hau kauv cia nyob lwm qhov. Nws nco tau cov Lus uas Yes Xus qhia rau nws. Cov no yog lub cim tseem ceeb txhais tias Yes Xus sawv rov los ib yam li nws hais lawm. Peb txoj kev ntseeg muaj lub ntsiab lawm. Cov hauj lwm zoo peb ua, Ntuj cov lus peb tshaj raws li Yes Xus qhia muaj qab hau, muaj nqis loj tshaj lawm, vim rau qhov hais tias Huab Tais Yes Xus sawv rov los ntawm kev tuag, Huab Tais Yes Xus yeej kev tuag.
Ntawm peb mas, “lwm tus thwj tim” yog peb tus piv ntxwv ntawm lub neej hauv txoj kev ntseeg. Raws li cov thwj tim, tej zaus peb tseem tsis to taub txhua yam uas tshwm sim tuaj, peb tseem tsis tau to taub tias Tswv Ntuj hlub peb zoo li cas. tab sis thov peb ntseeg, ces peb yuav to taub zuj zus. Vim tias Tswv tsis tso peb tseg. Nws nrog peb nyob. Vim nws sawv rov los, peb thiaj tso siab tias nws pub txoj sia rau peb tau. Nws sawv rov los huav peb lub neej, hauv peb txoj sia lawm. Thov sawv daws muaj kev siab kaj lug noj qab nyob zoo nyob mus li.
Hnub no Huab Tais Yes Xus sawv rov los hauv peb lub siab kom peb muaj kev kaj siab lug lawm. Alleluia, alleluia!
