ZAJ NYEEM HNUB TIM 30 LUB 11 HLIS 2025
HNUB CHIV, THAWJ LIS PIAM CAIJ TOS HUAB TAIS
COV LUS NYOB HAUV MAS TAIS NTAWV MOO ZOO (MT 24: 37-44)
Cov kwv tij hmoob sawv daws, hnub no yog thwj lis piam hauv lub caij Tos Huab Tais. Peb tab tom tos Huab Tais Yes Xus yug los nyob nruab nrab peb. Yog lub caij uas peb yuav siv lub sij hawm los saib ntawm yus tus kheej, saib ntawm yus lub neej, ib xyoo dhau los no, yus nyob li cas lawm. Yus puas loj hlob tuaj hauv txoj kev ntseeg, hauv txoj kev ua neeg zoo, ua neeg ncaj ncees, ua neeg hauv Tswv Ntuj txoj kev nyiam kev hlub? Ntawm kuv mas, kuv kuj nyiam nyiam lub caij no kawg nkaus li thiab. Vim tias peb muaj sij hawm npaj ntau tsav ntau yam hauv peb lub vaj lub tsev, peb npaj cov paj zoo nkauj hauv peb lub tsev teev Ntuj. Peb npaj sab nraud lub cev kom zoo nkauj li no, kuj yog vim tias peb xav kom sawv daws paub tias lub caij tseem ceeb ntawm tib neeg lub neej yuav los txog lawm, peb yuav tsum npaj siab npaj tsws tos tus me nyuam Yes Xus kom zoo mog.
Tsis tas li ntawd, hauv thawj lis piam caij tos Huab Tais li no, lub Koom Txoos Kas Tos Liv tseem caw peb kom muaj kev cia siab rau Tswv Ntuj. Kev cia siab los “hope” los sis ความหวัง yog ib qho tseem ceeb uas Tswv Ntuj cog lus rau tib neeg. Txawm tias peb tsis muaj kev cia siab ntawm cov nom tswv cov thawj coj nyob ntiaj teb no, tiam sis, Tswv Ntuj tseem yog peb txoj kev cia siab. Yog peb tseem muaj kev cia siab, kuj txhais tau tias txhua tsav txhua yam yuav tshwm sim tuaj tau. Tab sis, yog peb tsis muaj kev cia siab hauv peb lub neej lawm ces, kuj tsis muaj li ntawd tiag xwb nawb. Yog tsis muaj kev cia siab, kuj tsis muaj txoj sia, tsis muaj txoj kev, tsis muaj dab tsi. Yuav tsum muaj kev cia siab xwb thiaj muaj txoj sia, thiaj muaj kev nyiam ke hlub, thiaj muaj Tswv Ntuj. Peb, tib neeg, nyob ntawm ntiaj teb no tau, mas kuj vim tias peb muaj kev cia siab hauv peb lub neej, puas yog? Tiam sis, kev cia siab loj tshaj plaws, yog kev cia siab hauv Tswv Ntuj.
Li ntawd, thov kom peb ceev faj, saib xyuas peb lub neej, saib xyuas peb txoj kev ntseeg kom zoo mog, npaj peb tus kheej kom txhij txhua sij hawm. Tswv Ntuj yuav los txog peb lub siab lub sij hawm uas peb tsis paub, tsis to taub, tsis txhij. Li ntawd, qhib lub neej, qhib lub siab kom txhij txais Tswv Ntuj txhua sij hawm. Zoo li Huab Tais Yes Xus hais tias: Nej zov hmo mog, vim nej tsis paub hnub twg nej tus Huab Tais yuav los. Nej yuav sawb sim kom txhij, vim Neeg Leej Tub yuav los lub sij hawm uas nej tsis nco faj.
Nyob zoo sawv daws.
