Hnub chiv tim 25 lub 8 hli ntuj 2024
Zam 6:60-69
Lub lis piam 21st
Lub Caij Nyob Nruab Xyoo
“Huab Tais peb yuav mus nrog leej twg? Koj muaj cov lus pub txoj sia nyob mus li. Peb ntseeg thiab peb paub tias koj yog Tswv Ntuj tus Ntshiab.”
Nyob zoo…
Kwv tij hmoob sawv daws, 4 lub lis piam dhau los, peb tau hnov Zam lub Moo Zoo hais txog “cov mov pub txoj sia” los “cov mov pub txoj sia yog Yes Xus.” Tsoom sid coob leej tsis nkaj siab los to taub yuam kev txog Huab Tais Yes Xus cov lus. Lawv xav tias Huab Tais Yes Xus muaj peev xwm ua hwj huam yees ntxwv muab 5 lub ncuav mov thiab 2 tug ntses los pub 5,000 leej neeg tau noj yog qhov tseeb. Yog lawv raws Yes Xus qab, lawv tsis saib plab ntxiv mus, lawv yuav muaj mov noj txhua txhia hnub. Vim tias Yes Xus yuav pub lawv kom tsaus plab. Lub Moo Zoo hauv hnub no mas, Huab Tais Yes Xus hais kom meej kom tseeb txog lub ntsiab lus nws xav hais rau lawv to taub kom raug kom meej. “Kuv yog cov mov muaj txoj sia. Tus noj kuv lub cev nqaij thiab haus kuv cov ntshav, nws muaj txoj sia nyob mus li. Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus.” Thaum cov Yus Das hnov Yes Xus hais li no, lawv sib cav zom zaws tias: tus neeg ntawd yuav lu li cas muab tau nws cev nqaij los rau peb noj? Lawv paub li no lawm, qhov kawg mas, Txij thaum ntawd los, Yes Xus ib co thwj tim coob thiaj li rov qab mus tsev, lawv tsis nrog Yes Xus mus ntxiv lawm. Lawv tso Yes Xus pov tseg vim tias lawv txais Yes Xus cov lus qhia tsis tau. Yes Xus tsis yog zoo li lawv xav. Tom qab lawv mus lawm, Yes Xus tig los hais rau Pab Kaum Ob tias: “Nej ne, nej puas xav mus thiab?”
Kwv tij zoo yiam sawv daws, ntawm peb mas, ntau zaus peb yuav tsum txiav txim siab dab tsi yog qhov tseem ceeb rau yus lub neej. Thaum yus txiav tsim siab los raws Yes Xus qab, los ntseeg Tswv Ntuj lawm, ces yus kuj yuav tsum ntseeg kom ruaj nreb, txhob ua xyem xyav. Muaj coob leej ntseeg txog Yes Xus tab sis mas thaum lawv pom tias lawv tsis tau txais raws li lawv lub siab ntshaw, lawv tsis tau txais raws li lawv tiaj thov, lawv tsis tau txais dab tsi lawm, lawv kuj “tsis nrog Yes Xus mus ntxiv lawm.” Tej tus ntseeg, tab sis thaum tsis muaj mov noj lawm, lawv tsis tsau plab lawm, lawv kuj tso Yes Xus pov tseg. Ua li ntawd, hnub no Huab Tais Yes Xus kuj hais rau peb tias: ntawm peb mas, peb puas xav mus thiab?
Kwv tij hmoob sawv daws, Huab Tais Yes Xus xav kom peb nrauj yus tus kheej niaj hnub. Tej zaus, peb tsis to taub tiag tiag tias Tswv Ntuj tab tom ua dab tsi hauv peb lub neej, peb tsis to taub tias Tswv Ntuj tab tom qhia peb dab tsi los hais dab tsi rau peb. Tab sis, thov kom tso siab rau Tswv Ntuj, tso siab rau Huab Tais Yes Xus. Nws yuav pab peb maj mam nkaj siab. Thov kom peb ntseeg nruaj nreb, thov kom peb lo lus teb rau Yes Xus yog zoo xws li Xis Moos Pob Zeb lo lus, hais tias: “Huab Tais peb yuav mus nrog leej twg? Koj muaj cov lus pub txoj sia nyob mus li. Peb ntseeg thiab peb paub tias koj yog Tswv Ntuj tus Ntshiab.”
