ZAJ NYEEM HNUB TIM 21 LUB 9 HLI 2025
HNUB CHIV LIS PIAM 25 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 16: 1-13)
Nyob zoo os kwv tij hmoob sawv daws hnub no peb hnov ib zaj paj lug Huab Tais Yes Xus piav rau tsoom siv paub txog qhov tseem ceeb tshaj plaws ntawm cov neeg ntseeg lub neej yog Tswv Ntuj, tsis yog nyiaj txiag. Peb siv nyiaj txiag los pab kom peb muaj sij hawm teev Ntuj, muaj kev vam meej, muaj kev noj qab nyob zoo. Peb tsis muab nyiaj txiag ua peb tus tswv ntuj.
Hauv zaj paj lug, nej paub zoo lawm tias tus tim xyoob xaiv nyiaj txiag, nws pom nyiam txiag tseem ceeb tshaj plaws ntawm nws lub neej. Nws muab nws tej nyiaj txiag siv lwj siv liam. Nws saib tsis pom lwm tus. Thaum nws paub meej lawm tias tus tswv yuav tshem txoj hauj lwm xam txiaj ntawm, qhov nws ua yog tias nws mus nhriav cov neeg tshuav nqi ntawm tus tswv ua nws tus phooj ywg. Nws vam thiab cia siab tias thaum nws tsis muaj nyiaj txiag ntau lawm, cov phooj ywg no yuav pab, nws vam tias thaum nws muaj teem meem dab tsi, cov phooj ywg no yuav cev tes pab nws.
Kwv tij sawv daws, nej puas pom thaum lub sij hawm muaj kev ntxhov siab li no, tus pab tau yus tsis yog nyiaj txiag, tiam sis yog yus tus phooj twg xwb thiaj pab tus tau. Piv txog Tswv Ntuj kuj zoo li ntawd thiab. Nyiaj txiag tsis pab yus kom dim ntawm kev txhaum, Tswv Ntuj xwb thiaj dim tau. nyiaj txiag tsis kho yus lub siab, Tswv Ntuj xwb thiaj yog chaw vam khom rau yus, nyiaj txiag tsis pab yus kom txais txoj sia nyob mus, Tswv Ntuj xwb thiaj pub yus txoj sia, thiaj muab yus kom muaj txoj sia nyob mus li. Huab Tais Yes Xus qhia li no kom peb pom kom meej hauv peb lub siab tias yam dab tsi tseem ceeb tshaj plaws ntawm peb lub neej. Tsis muaj ib tug tub txib tsob hwb ob tug tswv tau. Nws yeej yuav ntxub ib tug, nyiam lwm tus. Nws yuav npuab ib tug, thuam lwm tus. Nej yuav ua Tswv Ntuj tub txib thiab nyiaj txiag tub txib tsis tau.
Nyob zoo sawv daws.
