Hnub chiv tim 20 lub 10 hli ntuj 2024
Mas Kos. 10:35-45 (10:42-45)
Lub lis piam 29th
Lub Caij Nyob Nruab Xyoo
“Leej twg xav ua tus loj nyob hauv nej, nws yuav ua nej tus tub txib. Neeg Leej Tub tsis tuaj kom luag tsob hwb nws, nws tuaj tsob hwb sawv daws thiab muab nws txoj sia los ua nqi txhiv coob leej”
Cov kwv tij hmoob sawv daws, Tswv Ntuj Lo Lus hnub no qhia kom meej txog Huab Tais Yes Xus uas yog peb tus piv ntxwv. Nws yog tus piv ntxwv ntawm kev tsob hwb luag tej. Yog yus xav ua tus thawj raws li Huab Tais Yes Xus, yus yuav tsum tsob hwb lwm tus. “Tsis yog zoo li cov uas luag saib lawv yog thawj coj hauv cov kuj cuab, mas lawv kav sawv daws xws li ib co tswv. Thiab cov loj yuam sawv daws nruj.” Peb cov ntseeg sawv daws yuav tsum ua tus loj raws li Huab Tais Yes Xus qhia, uas yog tus loj yuav tsum tsob hwb lwm tus.
Kwv tij zoo nyiam sawv daws, ntaus zaus mas, muaj neeg nug kuv tias: txiv plig, peb ntseeg txog Tswv Ntuj lawm, ua cas peb yuav tsum qee yus tus kheej ua ub ua no ua rau peb tsis muaj sij hawm rau peb tsev neeg? Lo lus nug no zoo tshaj! Yog lawm, ua cas peb yuav tsum ua ub ua no, ua cas peb yuav tsum mus teev Ntuj rau luag? Ua cas peb yuav tsum mus hais saw Mab Liab rau luag txhua hmo, peb nyob peb xwb kuj zoo lawm, puas yog? Kwv tij sawv daws, peb ua li no kuj vim rau qhov tias Huab Tais qhia peb kom ua. Huab Tais Yes Xus cov thwj tim yuav tsum ua raws li Nws qhia. Huab Tais Yes Xus Lo Lus qhia loj tshaj plaws yog tias: Koj yuav nyiam koj tus Huab Tais Tswv Ntuj tas siab tas ntsws, tas ntsuj plig, thiab koj yuav nyiam tus nyob ze koj ib yam nkaus li koj nyiam koj. Li ntawd, peb tsis ntseeg raws li peb qhov ncauj hais xwb, tab sis mas, peb ua kom tshwm sim tuaj rau sawv daws pom, peb ua kom tshwm sim rau sawv daws pom tias vim peb ntseeg Ntuj, mas peb thiaj li nyiam peb cov kwv tij neeg tsa tiag tiag. Li ntawd, peb thiaj qee yus tus kheej los tsob hwb luag tej. Peb puas paub tias qhov peb ua, tsis hais yam loj los yam me, muaj qab hau tshaj rau luag. Tej zaus, muaj peb cov kwv tij lawv tsis muaj dag tsis muaj zog lawm, lawv tsis xav nyob lawm, tab sis mas vim peb mus xyuas lawv, hais lus txawb lub siab rau lawv, kuj ua rau lawv muaj dag muaj zog, xav muaj sia nyob ntxiv mus. Li ntawd, yam zoo peb ua rau luag tsis hais loj los me muaj nqi tshaj. Yog peb hais tias peb tsis muaj sij hawm rau yus tsev neeg, tab sis Tswv Ntuj kuj pub sij hawm rau peb kom tsob hwb lwm tus, cov uas lawv xav tau peb kev pab dua peb tsev neeg, cov xav tau peb pab txhawb lub dag lub zog rau lawv, xav tau peb hais lub txhawb lub siab rau lawv.
Kwv tij sawv daws, yam uas kuv hais no yog Huab Tais Yes Xus Lo Lus Qhia hnub no tiag tiag. “Leej twg xav ua tus loj nyob hauv nej, nws yuav ua nej tus tub txib. Neeg Leej Tub tsis tuaj kom luag tsob hwb nws, nws tuaj tsob hwb sawv daws thiab muab nws txoj sia los ua nqi txhiv coob leej” Huab Tais Yes Xus kuj ua zoo ib yam li hais thiab. Nws ua piv txwv rau peb pom thiab ua raws. Thov txhawb lub siab rau cov thawj coj sawv daws uas tab tom tsob hwb luag tej, tab tom tsob hwb cov ntseeg sawv daws, nej ua zoo tiag tiag, nej yog Huab Tais Yes Xus cov thwj tim tiag tiag!
