Hnub Chiv Tim 2 lub 6 Hlis 2024
Lub caij nyob nruab xyoo
Cav txog Yes Xus lub siab lub plawv/ hwm lub cim ntshiab
Mas Kos 14:12-16, 22-26
“Nej txais, qhov no yog kuv lub cev, qhov no yog kuv cov ntshav.”
Hnub chiv no yog hnub nyoos hwm lub Cim yug, los cav txog Yes Xus lub siab
lub plawv lus Latin hu uas Corpus Christi. Lub Koom Txoos Kas Tos Liv caw peb
kom xav tswv yim txog Huab Tais Yes Xus cov lus uas nws hais rau nws cov thwj
tim nyob hauv ib kem tsev hais tias: “Nej txais, qhov no yog kuv lub cev, qhov no
yog kuv cov ntshav, yog cov ntshav cog lus, cov ntshav no yuav ntws mus cawm
coob leej.” Lub ncuav mov yog Yes Xus lub cev, cov cawv yog Yes Xus cov
ntshav. Huab Tais Yes Xus foom hmoov zoo ces pub rau nws cov thwj tim kom
noj kom haus.
Niaj hnub nyem no mas, peb tseem txais Huab Tais Yes Xus lub cev thiab cov
ntshav hauv thaj txi Ntuj. Lub thaj txi Ntuj thiaj yog ib qho tseem ceeb tshaj plaws
hauv lub Koom Txoos txoj cai. Tswv Ntuj lub txiaj ntsim txhawv hauv ntawm thaj
txi Ntuj los rau cov neeg ntseeg sawv daws. Lub thaj txi Ntuj no yog Huab Tais
Yes Xus, nws muab nws tus kheej cev rau Tswv Ntuj. Vim tias Tswv Ntuj nyiam
peb kawg, nws thiaj li muab nws tus kheej ua thaj txi Ntuj. Vim li ntawd, thaum
peb txais Huab Tais Yes Xus lub cev thiab cov ntshav hauv thaj txi Ntuj, thov kom
peb paub tias qhov no yog txoj kev nyiam ntawm Tswv Ntuj. Lub Cim Yug los lub
Cim Ntshiab thiaj yog paj tshab ntawm txoj kev nyiam uas Huab Tais Yes Xus
muab rau peb mus txog niaj hnub no.
Yog peb ntseeg tiag itag tias lub ncuav mov thiab txiv cawv hloov ua Huab Tais
Yes Xus lub cev thiab cov ntshav vim txoj kev nyiam, peb cov ntseeg sawv daws
kuj ntseeg tiag tiag tias vim peb ua neej hauv txoj kev nyiam kev hlub, peb kuj
hloov ua Tswv Ntuj cov tub cov ntxhais tau.
Kwv tij zoo nyiam sawv daws, ua ntej Huab Tais Yes Xus yuav nce mus saum ntuj
lawm, nws xa nws cov thwj tim mus tshaj lub Moo Zoo. Ces nws hais rau nws cov
thwj tim tias “hos kuv, mas kuv niaj hnub nrog nej nyob mus txog lub zim txwv
ntiaj teb kawg.” (Mt.28:20). Huab Tais Yes Xus cog lus no yog qhov tseeb lawm.
Qhov tiag mas, Huab Tais Yes Xus tsis mus qhov, nws nyob ze peb, peb txais nws
lub cev txhua hnub chiv. Yog maj, Huab Tais Yes Xus nyob hauv lub thaj txi Ntuj.
Huab Tais Yes Xus nrog peb nyob niaj hnub no hauv thaj txi Ntuj, hauv lub Cim
Yug uas peb txais txhua hnub chiv.
Kwv tij hmoob sawv daws, qhov no yog peb txoj kev ntseeg. Peb hu peb tus kheej
Kas Tos Liv los Catholic kuj vim li no. luag tej lawv tsis ntseeg tiag tias lub Cim
Yug yog Yes Xus lub cev thiab cov ntshav tiag. Tab sis mas, peb cov Kas Tos Liv
ntseeg tias yog Huab Tais Yes Xus tiag.
Vim li ntawd, lub thaj txi Ntuj yog kab ke tseem ceeb tshaj plaws. Peb yuav tsum
tuaj koom kab ke txi Ntuj, tuaj mloog Ntuj lo lus, txais Yes Xus lub cev thiab cov
ntshav. Yog tsis muaj dej num tseem ceeb, thov caw nej sawv daws tuaj koom thaj
txi Ntuj niaj hnub chiv. Thiab kev mus koom thaj txi Ntuj hnub chiv yog lub Koom
Txoos Catholic txoj cai uas cov ntseeg yuav tsum ua.
Thov nej sawv daws tuaj koom lub thaj txi Ntuj, tuaj txais lub Cim yug, thiab thov
nej sawv daws noj qab nyob zoo mog.
