Hnub Chiv tim 2 Lub 2 Hlis Ntuj 2025
Lub lis piam 4 hauv lub Caij Nyob Nruab Xyoo
Lus Kas 2:22-32
“Txiv Tswv, nyem no koj tso koj tus tub txib mus kaj lug, raws li koj lo lus, vim kuv qhov muag tau pom koj txoj kev cawm neeg.”
Cov kwv tij zoo nyiam, hnub chiv no peb hwm txog hmoov tsuj xeeb cev Yes Xus rau Ntuj hauv lub Tuam Tsev Teev Ntuj. Raws li Mais Xes txoj cai, lawv tsis kam poj niam uas yug me nyuam tub tuav qhov ntshiab huv, thiab tsis pub kom mus lub Tuam Tsev Teev Ntuj, vim cov poj niam ntawd tsis dawb tsis huv. 40 hnub tom qab lawv yug me nyuam tub, mas lawv yuav tsum ua kab ke ntxuav kom dawb kom huv tuaj. Mab Liab thiab Yos Xes nkawd tsis yog neeg npuaj nug, nkawd thiaj muab ob tug thav nquab dawb xwb los cev rau Tswv Ntuj. Qhov tiag yog tias Mab Liab yog ib tug poj niam ntshiab, dawb thiab huv, nws tsis muaj txhaum vim Tswv Ntuj xaiv nws kom xeeb tub Tswv Ntuj Leej Tub. Nws yog Yes Xus niam; thiab Huab Tais Yes Xus yog Tswv Ntuj. Li ntawd, nws yog Tswv Ntuj Leej Niam. Txawm li cas kuj xij, txawm tias Mab Liab tsis muaj txim, tsis muaj txhaum dab tsi, tiam sim nws kuj txaus siab ua raws li Mais Xes txoj cai los yog Tswv Ntuj txoj cai, vim nws ib txwm mloog Ntuj lus. Tsis tas li ntawd, Mab Liab thiab Yos Xes ua raws li Mais Xes txoj cai uas nkawd muab nkawd me nyuam tub xub yug qee rau Tswv Ntuj. Mab Liab thiab Yos Xes yog tus piv txwv zoo rau peb tias yog peb ntseeg txog Tswv Ntuj tiag, peb yuav tsum mloog Tswv Ntuj Lo Lus, peb yuav tsum ua raws li Tswv Ntuj txoj cai zoo li Mab Liab thiab Yos Xes ua.
Hauv lub Moo Zoo peb hnov hnub no tseem muaj ob tug neeg tseem ceeb ua tus qauv zoo rau peb. Nkawd yog Xis Mes Oos thiab As Nas. Nkawd yog neeg ncaj thiab nyiam teev Ntuj. Tswv Ntuj nyiam Xis Mes Oos tshaj, Tswv Ntuj thiaj li hais rau nws tias, “Yog nws tsis tau pom Huab Tais tus Pleev, mas nws yuav tsis tuag.” Tswv Ntuj hlub nws thiab foom hmoov zoo rau nws tiag. Cov kwv tij peb puas pom, tiag tiag mas, Huab Tais Tswv Ntuj nyiam cov neeg ncaj, cov neeg teev Ntuj tsis tseg. Nej puas xav kom Tswv Ntuj nyiam nej zoo xws li Tswv Ntuj nyiam Xis Mes Oos? Li ntawd, nej yuav tsum ua neeg ncaj thiab nquag teev Ntuj mog!
Tsis tas li ntawd, cov lus tseem ceeb kuv xav caw peb sawv daws kom xav tswv yim twm txog yog Xis Mes Oos cov lus thaum nws txais tus me nyuam Yes Xus los rau hauv nws ob txhais npab, nws hais tias: “Txiv Tswv, nyem no koj tso koj tus tub txib mus kaj lug, raws li koj lo lus, vim kuv qhov muag tau pom koj txoj kev cawm neeg.” Cov lus no muaj lub ntsiab lus tob kawg. Xis Mes Oos thiab As Nas tos “tus Cawm Seej,” los “tus Pleev” ntau ntau xyoo, nkawd tos ntev ntev dhau lawm. Ces, hnub no, Tswv Ntuj tsis ua kom nkawd tu siab, nkawd tso siab rau Tswv Ntuj, mas Tswv Ntuj ua kom nkawd tsis muaj chaw khuv xim. Tswv Ntuj ib txwm ua raws li Tswv Ntuj cog lus. Xis Mes Oos cov lus yog peb zaj teev Ntuj thiab. Ua ntej peb yuav pwm, peb teev Ntuj, peb hais tias, “Huab Tais Tswv Ntuj, nyem no koj tso kuv, koj tus tub txib ntxhais txib mus kaj lug, vim kuv qhov muag tau pom koj txoj kev cawm, vim kuv qhov muag tau pom Huab Tais Yes Xus lawm, vim kuv tau muaj txoj kev ntseeg txog Huab Tais Yes Xus lawm.” Zaj teev Ntuj no ua kom peb paub tias tag kis, txawm peb yuav muaj txoj sia nyob los tsis muaj lawm, peb kuj muaj kev kaj siab lug, vim Tswv Ntuj yuav cawm peb.
Cov kwv tij, qhov no yog peb txoj kev ntseeg, qhov no yog peb txoj kev cia siab rau Tswv Ntuj tiag. Peb tso siab kom Leej Ntuj plig Ntshiab coj peb kom ua neej nyob hauv Tswv Ntuj txoj kev. Leej Ntuj Plig Ntshiab yuav coj peb mus ntsib ntau yam zoo, ntau yam tshiab, thov kom peb qhib siab kom Leej Ntuj Plig Ntshiab coj peb xws li Leej Ntuj Plig Ntshiab tau coj Xis Mes Oos thiab As Nas.
