Hnub Chiv tim 18 Lub 8 Hli Ntuj 2024
Lus Kas 1:39-56
Lub lis piam 20th
Lub Caij Nyob Nruab Xyoo
“Kuv tus plig cav txog Huab Tais lub hwj chim, kuv lub tswv yim hom khaj nyob hauv Tswv Ntuj, tus Cawm kuv, vim nws dauv muag ntsia nws tus ntxhais txib hauv txheej qis.”
Nyob zoo…
Kwv tij hmoob sawv daws, hnub no, peb ua hmoov txog Niam Mab Liab Mus Lawm Saum Ntuj raws li lub Koom Txoos Kas Tos Liv nyob Thaib teb. Hnub no kuv thiaj li siv zaj nyeem hnub hwm Niam Mab Liab Mus Lawm Saum Ntuj los nthuav thiab caw peb sawv daws kom twm txog peb txoj kev hwm Niam Mab Liab.
Hnub tim 1 lub 11 hli Ntuj xyoo 1950, Vaj Qhia Pius XII tshaj tawm tias Leej Niam Mab Liab, Tswv Ntuj Leej Niam, tau ua nws txoj hauj lwm tiav lawm, ces Tswv Ntuj txais nws lub cev ntaj ntsug thiab tus plig mus nyob saum ntuj. Huab Tais Tswv Ntuj tsa Niam Mab Liab ua Poj Huab Tais. Niam Mab Liab tsis muaj lub keeb txhaum vim tias nws yog Tswv Ntuj leej niam. Tswv Ntuj tau npaj niam Mab Liab rau nws Leej Tub, Yes Xus. Kwv tij zoo nyiam sawv daws, qhov no yog peb txoj kev ntseeg tseem ceeb kawg uas hais txog Niam Mab Laib. “Tswv Ntuj txais nws lub cev ntaj ntsug thiab tus plig mus nyob saum ntuj.”
Ua li ntawd, mas kev hwm Niam Mab Liab Mus Lawm Saum Ntuj thiaj ua rau peb nco txog peb lub hom phiaj ntawm yus lub neej, yog tias muaj ib hnub, thaum peb ncaim lub ntiaj teb no mus lawm, ces Tswv Ntuj yuav txais pe blub cev ntaj ntsug thiab tus plig mus nyob saum ntuj thiab. Tej zaum, peb tsis hnov qab tias peb kuj muaj lub cev ntaj ntsug nyob saum ntuj thiab, tab sis mas, lub cev ntawd tsis yog zoo li lub cev nyob ntiaj teb no, tab sis yog lub cev ntsuj plig.
Ib txhia nug tias: cov neeg tuag yuav sawv rov los zoo li cas? Lawv yuav muaj ib lub cev zoo li cas thaum lawv sawv los? Leej Ntshaib Paj Lug teb cov lus nug no, nws piv lub cev ua ntej tuag li ib lub noob. Thiab nws piv lub cev tom qab kev tuag li ib tsob ntoo los cov nroj tsuag uas loj hlob los ntawm cov noob.
Leej Ntshiab Paj Lug hais tias: yam koj tseb, yog nws tsis tuag, mas nws tsis rov muaj txoj sia. Yam koj tseb, tsis tau yog lub cev yav tom ntej. Koj tsuas tseb ib lub noob ntawd; nyias hom noob tau nyias lub cev sib txawv…
Thaum cov tuag yuav sawv rov los kuj yuav yog zoo li ntawd: leej tib neeg tseb ib lub cev nqaij txawj lwj, tab sis ib lub cev tsis txawj lwj yuav sawv rov los. Leej tib neeg tseb lub cev nyob hauv txoj kev txaj muag, tab sis ib lub cev muaj hwj chim yuav sawv rov los. Leej tib neeg tseb ib lub cev tsis muaj zog; ib lub cev muaj zog yuav sawv rov los.
Leej tib neeg tseb ib lub cev nqaij, tab sis ib lub cev ntsuj plig yuav sawv rov los. Yog muaj ib lub cev nqaij tiag, mas kuj yuav muaj ib lub cev ntsuj plig thiab.
Tsis tas li ntawd, kev hwm Niam Mab Liab Mus Lawm Saum Ntuj tseem ua rau peb nco tsoom tias Niam Mab Liab tsis nyob twj ywm saum ntuj xwb. Nws tsis nyob twj ywm saum ntuj tos peb tuaj nrog nws nyob xwb. Ntawm qhov tsis sib xws, (tsis tas li ntawd), Niam Mab Liab nyiam peb kawg. Nws pab thov Ntuj rau peb cov tseem nyob hauv ntiaj teb no. Nws xav pab peb ntawm peb tus kheej kev tawm tsam kom mus txog Tswv Ntuj lub ceeb tsheej.
Kwv tij sawv daws, peb yuav tsum nquag thov Niam Mab Laib kom pab peb, yog peb muaj teeb meem los kev nyuab siab, kev ntxhov siab dab tsi, txhob tsis nco qab thov Niam Mab Liab kom pab peb. Nyob zoo sawv daws.
