Hnub Chiv Tim 16 lub 6 Hlis 2024
Lub caij nyob nruab xyoo
Mas Kos 4:26-34
Nyob zoo.
Kwv tij zoo nyiam sawv daws, lub Moo Zoo hauv hnub no peb hnov Yes Xus piav txog Tswv Ntuj lub Ceeb Tsheej zoo xws li ib tug neeg pov ib co noob rau nruab a: nws txwm pw los nws sawv, hmo ntuj los nruab hnub, lub noob tuaj kaus thiab
hlob, nws tsis paub tias lub noob hlob zoo li cas. Thiab Huab Tais Yes Xus piav ntxiv mus tias Ntuj lub Ceeb Tsheej zoo xws li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. tab sis thaum tseb tas lawd, lub noob hlob nws siab dua lwm cov zaub huv si; nws ncau ceg deb, ces tej noog ya saum ntuj tau kev los nkaum hauv nws qhov ntxoov. Yes Xus ob zaj paj lug no hais txog Tswv Ntuj lub Ceeb Tsheej, kwv tij sawv daws nej mloog tas lawm ces nej xav li cas? Nej puas saib hais tias Tswv Ntuj lub Ceeb Tsheej loj hlob tuaj, tsis hais tib neeg paub los tsis paub, tsis hais tib neeg pom los tsis pom, tsis hais tib neeg yuav muab siab rau los tsis quav ntseg, Ntuj lub Ceeb Tsheej loj hlob tuaj. Vim tias tsis yog tib neeg uas yog tus saib xyuas, tab sis yog Tswv Ntuj, yog Leej Ntuj Plig Ntshiab yog tus saib xyuas Ntuj lub Ceeb Tsheej.
Tib neeg yog tus pab Tswv Ntuj ua hauj lwm xwb, tib neeg yog tus nrog Tswv Ntuj ua hauj lwm tshaj Ntuj Lus uas kom Yes Xus lub Moo Zoo mus txog txhua haiv neeg, ua kom lawv paub txog Tswv Ntuj txoj kev nyiam kev hlub, peb yog tus ua tim khawv txog Tswv Ntuj lub Ceeb Tsheej uas Yes Xus yog tus tshaj tawm rau sawv daws paub. Nyob hauv Mas Kos Ntawv Moo Zoo, thaum Yes Xus pib qhuab qhia tsoom pej xeem, nws thawj cov lus hais yog tias “txoj lub caij teem lawm, Tswv Ntuj lub Ceeb Tsheej los txog ze lawm: nej hloov siab, nej ntseeg txog lub Moo Zoo mog.” Kwv tij sawv daws, nej puas pom, Tswv Ntuj lub Ceeb Tsheej nyob ze lawm, peb paub los tsis paub kuj xij, Tswv Ntuj lub Ceeb Tsheej loj hlob tuaj, qhov peb ua tau mas yog tias “peb yuav tsum hloov siab thiab ntseeg txog Tswv Ntuj lub Moo Zoo.”
Ntau zaus mas, peb xav tias kev hloov siab tshiab, kev yuav lub siab tshiab tig los nhriav Tswv Ntuj yog qhov peb ua hauv lub caij Plaub Caug xwb. Qhov tiag mas, peb yuav tsum hloov siab tshiab txhua txhia hnub. Kwv tij sawv daws, peb tsis hais txog Ntuj lub Ceeb Tsheej los peb tsis tshaj tawm Ntuj lub Ceeb Tsheej ntawm peb qhov ncauj xwb, tab sis mas, peb yuav tsum ua kom Ntuj lub Ceeb Tsheej tawg paj txi txiv hauv peb lub neej, yog tias peb mloog lub Moo Zoo, yuav lub siab tshiab, yuav lub neej tshiab, ces peb ua raws kom txi txiv tau zoo xws li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. tab sis thaum tseb tas lawd, lub noob hlob nws siab dua lwm cov zaub huv si; nws ncau ceg deb, ces tej noog ya saum ntuj tau kev los nkaum hauv nws qhov ntxoov. Yog peb mloog lub Moo Zoo thiab yuav lub siab tshiab txhua hnub, ces peb yuav pom tias peb txoj kev ntseeg loj hlob tuaj zoo xws li ib lub noob zaub roj thiab.
