Zaj nyeem hnub tim 15 lub 3 hlis 2026
Hnub Chiv, Lis Piam 4 caij Plaub Caug
Cov lus nyob hauv Zam Ntawv Moo Zoo (Z 9: 1-41)
Nyob zoo kwv tij hmoob sawv daws. Hnub no yog hnub chiv lub lis piam 4 hauv lub caij Plaub Caug. Lub Koom Txoos Kas Tov Lis caw peb kom twm txog Huab Tais Yes Xus lub Moo Zoo uas peb mloog hauv Zam lub Moo Zoo hnub no. peb hnov tias Huab Tais Yes Xus kho tus dig muag nruab thiab kom zoo tuaj. Tiam sis, Cov Fas Xais tsis txaus siab vim tias Huab Tais Yes Xus kho tus dig muag no hauv hnub Xas Npas Tos. Ntawm no peb pom dab tsi?
Huab Tais Yes Xus xais tus dig muag, nws khuv leej nws. Nws zam txim rau nws. Ntawm cov Fas Lis Xais mas, lawv tsis pom li ntawd. Lawv pom tias hnub Xas Npas Tos tseem ceeb tshaj dua ib tug neeg yuav txais kev cawm, dua ib tug neeg yuav raug kho kom huv, kom ua neej zoo li luag lwm tus. Ib txoj sia tsis muaj nqis dua txoj cai los khoom uas tsis muaj sia. Saib ntawm Huab Tais Yes Xus, nws xaiv dab tsi, khoom los tib neeg? Huab Tais Yes Xus saib ntawm tib neeg lub siab. Nws saib tias peb muaj lub siab zoo li cas? Peb pom luag tej zoo li cas? Peb puas hlub luag lwm tus?
Lub caij no yog lub caij uas peb yuav tsum saib ntawm yus lub siab, yus lub cuj pwm. Yog tseem muaj yam twg tsis yog los tsis zoo, kuj thov kom peb hloov lub siab tshiab, hloov yus cuj pwm tshiab, hloov yus lub neej tshiab. Tig los hlub luag lwm tus, pom cov nyob ib puag ncig peb muaj qis dua khoom uas tsis muaj sia los khoom uas tsis pub txoj sia.
Nyob zoo, sawv daws.
