Lis piam 28, lub Caij Nyob Nruab Xyoos. Xyoo B
Muaj ib tug txiv neej nug Yes Xus tias :
“Huab Tais, kuv yuav ua li cas kuv thiaj tau txoj sia nyob mus li ?”
Nov yog lo lus nug uas sawv daws xav tau, vim kuv xav tias qhov nej tuaj koom lub thaj txi Ntuj, yog nej xav nce mus saum ntuj. Kuv xav tias lo lus no yog ib lo lus nug uas ntxim siab tshaj lwm lo lus. Yes Xus teb rau tus txiv neej ntawd nyob hauv lo lus qhia. Peb paub lo lus qhia ntawd, yog txhob zes luag poj luag sev, txhob ua tub sab tub nyiag, hwm niam hwm txiv. Peb paub lo lus qhia, tab sis peb puas txuag lo lus qhia ntawd cia ? Puas yog peb ua raws Leej Txiv lub siab nyiam ? Nov yog kev txom nyem ntawm fab ntsuj plig uas tsim nyog peb yuav nrhiav. Peb tus ntsuj plig txom nyem yog thaum peb raug kev phem ntxias. Kev txom nyem hauv fab ntsuj plig qhov zoo yog kev ua raws Tswv Ntuj. Lees txais tias peb yuav tsum muaj Leej Ntuj Plig Ntshiab coj peb kev. Lo lus qhia yog txoj kev uas Tswv Ntuj qhia peb. Muaj qee leej uas lawv xav tias Tswv Ntuj lub Moo Zoo thiab qee lo lus qhia nws qub heev lawm. Yog cov uas lawv khav tias lawv paub tshaj.
Qhov tseeb tiag yog : “Tswv Ntuj lub Moo Zoo muaj sia thiab txi txiv.” Peb yuav thov kev pab ntawm Tswv Ntuj los pab txuag Tswv Ntuj lub Moo Zoo. Thaum peb ua li ntawd, mas ua kom pom txog kev txom nyem fab ntsuj plig hauv peb zoo tshaj.
Tus txiv neej ntawd teb Yes Xus tias : “Huab Tais, kuv tau ua tag txhua yam raws li koj hais txij thaum kuv yau los lawm.” Yog tias nws tau ua tas txhua yam li Yes Xus hais, peb yuav xav tias ua cas nws thiaj nug Yes Xus tias nws yuav ua li cas thiaj tau txoj sia nyob mus li ? Tos nws nug li ntawd, tej zaum nws xav tias nws tseem tshuav dab tsi ntxiv thiab. Yes Xus teb lo lus nug ntawd tias : “Koj tseem tshuav ib yam uas koj tsis tau ua. Koj rov mus muab koj lub cuab tam muag thiab muab faib rau cov neeg pluag, ces koj yuav tau lub cuab tam nyob saum ntuj Ceeb Tsheej.”
Yam uas tib neeg tsis muaj, yog kev pluag txom nyem hauv lub cuab tam. Kuv thiaj piav txog kev pluag txom nyem hauv fab ntsuj plig qhov zoo thiab qhov phem. Kev pluag txom nyem hauv lub cuab yeej cuab tam kuj zoo ib yam li ntawd. Kev pluag txom nyem hais txog cuab yeej cuab tam, qhov tsis zoo yog : tsis muaj yam yus ntshaw. Qhov zoo yog thaum peb tso peb lub siab ntshaw ub ntshaw no tseg, thiab peb txawj cheem peb tus kheej txoj kev ntshaw kom tsawg.
Kev ua lub neej xwm yeem tsis ntshaw ub ntshaw no, ua rau peb nyob ywj siab thiab peb txawj pab tus neeg pluag txom nyem hauv lub cuab yim neej. Peb pab luag tej, mas zoo li peb hwm luag txoj kev ntshaw. Peb pab kom lawv lub neej muaj meej mom thiab tsim nyog qhov lawv tau txais. Lo lus nug yog qhov tias peb puas zoo siab txais lub neej xwm yeem tsis ntshaw ub tsis ntshaw no, peb puas txais tau kev pluag txom nyem hauv lub cuab yim neej ? Tib neeg tiv kev txom nyem tas zog rau tej yam no xwb. Thaum Yes Xus hais tias kom tus txiv neej ntawd rov mus thiab muab nws lub cuab tam muag los faib rau cov neeg pluag, mas nws rov mus thiab ua ntsej muag ntshaus ntsho, vim nws muaj cuab tam ntau kawg. Ces txhais tias tus txiv neej ntawd nws tsis tau txais lub cuab tam uas yog txoj sia nyob mus li.
Cov kws Ntawv Ntshiab kheev kheev hais tias : tus txiv neej ntawd tsis kam muag nws lub cuab tam. Tej zaum nws kuj muab nws lub cuab tam muag me ntsis thiab. Nws ntsej muag ntshaus, vim nws xav tias nws yuav tsum muab nws lub cuab tam muag. Nws txaus siab, tab sis nws kuj xav tias ua cas yuav muab nws lub cuab tam uas nws muaj muag mus. Tsis yog tias txhua yam no yog qhov tsis zoo tas mus li. Ntau yam tsis zoo thiab tsis phem. Teeb meem yog qhov peb lub siab puas khi rau tej yam peb muaj ntawd ntau dhau. Yog tias yam peb muaj ntawd yog qhov tseem ceeb tshaj, mas txhua yam ntawd yog qhov coj peb kev. Peb txiav siab thiab yoog raws tej yam peb muaj ntawd ntau dua txoj kev nyiam kev hlub uas peb muaj rau Tswv Ntuj.
Raws li Paj Lug sau tseg tias : “Kev nyiam nyiaj txiag yog tus cag ntawm txhua yam kev phem. Vim tus cag uas yug txhua hom xwv txheej, yog kev nyiam nyiaj txiag. Qee leej qaug rau nyiaj txiag, lawv thiaj yuam kev mus deb ntawm txoj kev ntseeg. Ces ntau hom kev ntxhov siab chob lawv tus plig. (1Tis Mos Tes 6 : 10)
Peb yuav tso peb lub siab ntshaw ub ntshaw no tseg, vim nov yog qhov Yes Xus tab tom hais rau peb tias : “Tus Thauj yuav chaws mus hauv lub qhov koob, tseem yooj yim dua cov neeg plua nuj yuav chaws mus hauv Tswv Ntuj lub Ceeb Tsheej.”
Tus Thauj yog hom tsiaj loj, lub qhov koob nws me heev, nws yog hais txog kev xaws paj ntaub. Dhau no lawm, lub qhov koob tseem muab piv rau tej txoj kev me me nkag mus hauv cov nroog. Yog lub caij uas tej nroog tseem muaj phab ntsa zeb xov ncig, thiab lub qhov rooj tsuas txaus ib tug neeg uas tsis nqa nra chaws mus xwb.
Nra yog tej toob xib uas peb nqa nyob ntawm tes. Dab tsi uas peb xav nqa nrog peb lub caij peb mus kev thiab yam peb xav tau, mas yog nra.
Tus sau phau ntawv Thoob Tsib hais txog kev thov Ntuj thiab lawv txoj kev thov tias : “Kuv tau thov Ntuj lawm. Kuv tau txais kev xyuam xim. Kuv thov Ntuj lawm, tus plig ntawm lub tswv yim thoob tsib los nrhiav kuv.”
Koj thov Ntuj thiab thov Ntuj pab vim dab tsi ? Puas yog vim xav muaj tej lub tsheb zoo zoo thiab xav muaj nyiaj ntau ? Koj lub cuab tam yog dab tsi ? Ntawm cov neeg sau ntawv, mas nws tsis yog ntiaj teb kev nplua nuj. Tab sis nws yog tus ntsuj plig ntawm kev thoob tsib. Lawv pom tias kev nplua nuj hauv lub ntiaj teb tsis muaj dab tsi kiag, yog muab los piv rau Tswv Ntuj lub tswv yim thoob tsib. Tej nyiaj kub yog zoo li tej xuab zeb uas muab piv rau yam Tswv Ntuj muab rau peb. Thov Tswv Ntuj txhab kev nyiam kev hlub rau peb puv npo, vim Tswv Ntuj xav txhab nws txoj kev nyiam kev hlub rau peb. Lo lus nug yog qhov tias peb puas tshuav chaw rau Tswv Ntuj txhab kev nyiam kev hlub kom puv peb lub siab. Peb yuav tso dab tsi pov tseg kom tau tseg chaw rau Tswv Ntuj ?
Tej zaum nws yog kev nplua nuj, yog kev muab hlob, yog kev chim siab rau lwm tus, yog kev quav yeeb quav tshuaj. Nws yuav nyuab heev txog qhov peb yuav ua kom yeej tej yam peb ntshaw los yog tej yam peb quav. Qhov tiag peb tus kheej ua tsis tau, tab sis peb yuav nco ntsoov thiab muab siab rau txog Yes Xus cov lus hais tias :
“Ntawm tib neeg ua tsis tau, tab sis tsis yog qhov Tswv Ntuj tsis tau.”
