Hnub chiv tim 11 lub 8 hli ntuj 2024
Zam 6:41-51
Lub lis piam 19th
Lub Caij Nyob Nruab Xyoo
“Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li.”
Nyob zoo…
Kwv tij hmoob sawv daws, lub Moo Zoo hnub no txuas zaj nyeem lub lis piam dhau los uas Huab Tais Yes Xus hais kom meej tias tsoom pej xeem xav yuam kev txog lub ncuav mov uas Yes Xus pub rau lawv yog lub ncuav mov ntawm lub ntiaj teb no. lawv thiaj li xav ntes nws mus tsa ua vaj. Tab sis mas, lub ncuav mov uas Huab Tais Yes Xus hais txog yog lub ncuav mov tuaj saum ntuj tuaj, yog cov mov muaj txoj sia nyob mus li los yog Huab Tais Yes Xus.
Hnub no mas, Huab Tais Yes Xus hais kom tseeb, hais kom meej ntxiv mus tias: “Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij.” Qhov uas Huab Tais Yes Xus hais hnub no, nws hais kom meej uas lawv tsis to taub yuam kev ntxiv mus. Tsis muaj cov mov ntawm ntiaj teb no twg yuav ua kom tib neeg txaus plab mus li, tsis muaj cov mov twg yuav ua kom tib neeg tsis nqhis ntxiv mus. Tsis muaj zaub mov hauv ntiaj teb tuaj yeem txaus siab rau tib neeg txoj kev tshaib kev nqhis. Tsuas yog Huab Tais Yes Xus xwb thiaj ua tau, tsuas yog Huab Tais Yes Xus xwb thiaj ua kom peb txaus plab, ua kom peb tsis tshaib plab mus li. Huab Tais Yes Xus hais tias: “Tus ntseeg, nws muaj txoj sia nyob mus li.” Nov yog Huab Tais Yes Xus cov lus tshaj tawm thiab kev cog lus rau cov neeg ntseeg sawv daws. Kwv tij hmoob sawv daws, ntawm peb mas, peb puas ntseeg li ntawd tiag?
Lub lis piam dhau los kuv nug cov lus nug no peb puas ntseeg tiag tiag tias Huab Tais Yes Xus tib leeg xwb yuav pub mov muaj txog sia nyob mus li rau peb, los peb tab tom nhriav lwm yam los pub peb txoj sia, lwm yam uas tsis yog Yes Xus? Lwm yam uas tsis pub txoj sia nyob mus li. Lwm yam uas peb txais ces peb tseem tshaib plab dua tsis txawj tsaus plab mus li? Kuv xav tias cov lus nug no tseem ceeb tshaj uas peb cov ntseeg sawv daws yuav tsum khaws cia los twm txog. Ntawm peb cov mov dab tsi tseem ceeb tshaj plaws ntawm peb lub neej: mov pub txoj sia nyob mus li uas yog Yes Xus tseem ceeb tshaj plaws, los yog cov mov hauv ntej teb no?
Kwv tij hmoob sawv daws, nyob nyob mas, peb tsis tshua xav kom tob kom tiag txog peb lub neej. Peb ib txwm ua neej nyob raws li kev vam meej, kev noj qab nyob zoo, kev muaj nyiaj muaj txiag, kev muaj hauj lwm zoo, muaj suab muaj npe hauv zej zog. Tab sis mas, thaum muaj ib tug neeg taug, tsis haiv peb kwv tij neeg tsa los peb cov phooj ywg, ntawm lawv txoj kev tuag, ntawm lawv kev pam tuag, mas peb thiaj yuav twm txog txoj sia nyob mus li. Puas yog? Li ntawd mas, thov kom Tswv Ntuj Lo Lus hnub no caw peb kom twm txog qhov no.
“Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li.”
“Tus ntseeg, nws muaj txoj sia nyob mus li.” Nyob zoo sawv daws.
