Hnub Chiv Tim 11 Lub 5 Hlis 2025
Lub lis piam 4 hauv Lub Caij Hla
Zam 10:27-30
“Kuv cov yaj mloog kuv lub suab, kuv paub lawv, lawv raws nraim kuv.”
Nyob zoo.
Kwv tij zoo nyiam sawv daws, hauv Ntawv Moo Zoo hnub no, Huab Tais Yes Xus piv cov neeg ntseeg txog nws li cov yaj uas mloog Huab Tais Yes Xus lub suab lib leeg xwb. Lawv yuav tsis mloog lwm tus lub suab; lawv yuav tsis mloog cov yaj saub cuav lub suab. Yog cov neeg ntseeg mloog Yes Xus lub suab xwb, lawv yuav tsum raws nraim Yes Xus thiab.
Huab Tais Yes Xus cov lus hauv hnub no yug peb lub siab lub tswv yim, yug peb txoj sia kom muaj zag kawg nkaus li, vim Huab Tais Yes Xus zeem tseeb rau peb cov neeg ntseeg sawv daws tias yog peb mloog nws lub suab thiab raws nraim nws, peb yuav tau txais paj tshaj muaj qab hau tshaj plaws, uas yog txoj sia nyob mus li.
Kwv tij sawv daws, thaum ras txog Ntawv Moo Zoo zaj no, ua rau kuv xav txog peb tus Vaj Qhia Francis, tus dua nra. Cov neeg ntseeg sawv daws tu siab uas nws tau tso peb pov tseg, tiam sis sawv daws paub tseeb lawm tias nws raws nraim nws tus Huab Tais lawm, nws mus nrog nws tus Huab Tais Yes Xus peb Ntuj lub ceeb tsheej. Peb cia siab tias tam sim no, nws nrog nws tus Huab Tais nyob kaj siab lug lawm tiag. Peb ntseeg thiab cia siab li ntawd, kuj vim rau qhov hais tias, thaum nws tseem muaj sia nyob, Vaj Qhia Francis mloog Yes Xus cov lus, nws taug kev raws li Huab Tais Yes Xus cov lus qhia. Nws tsis mus yuam kev vim tias Huab Tais Yes Xus cov lus qhia yog qhov tseeb, yog txoj kev, thiab pub txoj sia nyob mus li.
Ntawm peb mas, yus yuav tsum nug yus tus kheej tias yus puas muab siab mloog Tswv Ntuj Lo Lus, yus puas ua neej raws nraim Huab Tais Yes Xus? Thaum peb txais lub cim ntxuav lawm, peb yog neeg ntseeg lawm, Huab Tais Yes Xus paub peb ib leeg ib leeg lawm. Qhov peb yuav ua ntxiv mus yog tsis mus lwm txoj kev lawm. Mloog kom zoo lub suab twg yog Huab Tais Yes Xus lub suab, lub suab twg tsis yog Huab Tais Yes Xus li, peb thiaj tsis mus yuam kev. Thov kom peb rau siab mloog Tswv Ntuj Lo Lus hais rau peb txhua hnub los yog txhua hnub chiv kom zoo mog. Mloog zaj nthuav Ntawv Moo Zoo kom zoo thiab peb thiaj yuav to taub tiag tiag Tswv Ntuj Lo Lus hais rau peb. Thov Tswv Ntuj pab peb kom to taub txog Nws Lo Lus thiab thov Tswv Ntuj foom hmoov zoo rau peb txhua leeg txhua tus.
Nyob zoo!
