Zaj nyeem hnub tim 1 lub 2 hlis 2026
Hnub Chiv, Lis Piam 4 caij Nyob Nruab Xyoo
Cov lus nyob hauv Mas Tais Ntawv Moo Zoo (MT 5: 1-12)
Kwv tij zoo nyiam sawv daws, hnub no yog Hnub Chiv lis piam 4 caij Nyob Nruab xyoo. Huab Tais Yes Xus nce mus saum lub roob thiab qhia txog txoj Hmoov Zoo. Txoj hmoov zoo no tsis yog kab lis kev cai tiam sis yog lub neej uas tau pom Tswv Ntuj lub Ceeb Tsheej lawm. Zoo yam li Huab Tais Yes Xus tau hais tseg: cov tau txoj hmoov zoo yog cov pluag hauv nruab siab, vim Ntuj lub Ceeb Tsheej yog lawv li. Cov tau txais txoj hmoov zoo yog cov siab zoo, vim lawv yuav txais lub ntiaj teb los ua lawv tug. Thiab lwm yam uas peb tau mloog hauv lub Moo Zoo hnub no. Huab Tais Yes Xus hais meej tshaj, to taub yooj yim tshaj thiab. Ntawm peb, mas peb yuav tsum nug yus tus kheej thiab. Peb ua neeg zoo li cas? Peb puas yog cov pluag hauv nruab siab, cov siab zoo, cov hlub luag tej, cov tsim kev thaj yeeb, cov raug luag hiam vim txoj kev ncaj, cov siab huv, thiab cov tshaib thiab nqhis txoj kev ncaj zoo yam li Huab Tais Yes Xus hais? Yog tseem tsis yog cov ntawd, kuj thov kom peb nquag thov Ntuj kom pab peb thiab rau siab ua neeg zoo li Huab Tais Yes Xus hais. Peb thov Ntuj thiab ua raws thiaj ua tau. Ua li no, ces peb yuav nyob ze Tswv Ntuj lub Ceeb Tsheej lawm os.
Nyob zoo sawv daws.
