Lo lus pub txoj sia, lub 10 hli 2024.
Leej twg xav ua tus loj nyob hauv nej, nws yuav ua nej tus tub txib. Thiab leej twg xav ua tus ntaus thawj hauv nej, nws yuav ua sawv daws tus qhev. (MK 10 : 34-44).
Nov yog zaum peb uas Yes Xus mus hauv lub nroog Yes Lus Xas Les. Thaum lawv tab tom mus kev, Yes Xus qhia nws cov Thwj Tim kom lawv npaj tos txais txhua yam teeb meem yuav tshwm sim. Ntawd yog kev raug tsim txom thiab yog Yes Xus txoj kev tuag. Tab sis nov yog yam uas cov raws Yes Xus thiab nyob ze Yes Xus lawv txais tsis tau. Qhov loj tshaj ntawd, yog Yes Xus cov Thwj Tim sib tawg tas. Yas Kos thiab Zam nkawd thov kom ib tug zaum sab laug thiab ib tug zaum sab xis nyob hauv Yes Xus lub hwj chim, ces 10 tus Thwj Tim tsis txaus siab. Li ntawd, thiaj ua rau cov Thwj Tim sib tawg tas. Yes Xus ua siab ntev, nws hu cov Thwj Tim los nws rov hais rau lawv tias : “Yam tshiab uas Yes Xus coj tuaj, txawv yam uas lawv tau pom tag los.”
Leej twg xav ua tus loj nyob hauv nej, nws yuav ua nej tus tub txib. Thiab leej twg xav ua tus ntaus thawj hauv nej, nws yuav ua sawv daws tus qhev.
Lo lus no yog nyob hauv Mas Kos ntawv Moo Zoo. Peb yuav pom txog qhov tseeb ntawm kev ua tub txib mus txog kev ua qhev. Yes Xus ua kom peb pom tias nws tau pab luag tej thiab muab nws tus kheej ua sawv daws tub txib. Qhov no yog yam tshiab thiab yam peb yuav xav txog neeg lub hwj chim nyob hauv kev kav. Nov puas yog kev nyiam kev hlub mus raws kev ntseeg ?
Muaj ib lo lus nyob hauv Ntawv Ntshiab uas peb tsis tshua quav ntsej txog, yog lo lus tub txib txij puag txheej thaud los lawm. Lo lus no qhia txog lub meej mom ntawm tus pub thiab tus txais. Tab sis tas cov Ntawv Ntshiab yog xaus rau kev nyiam kev hlub. Kev nyiam kev hlub yog kev ua tub txib.
Yes Xus tsis yog tuaj kom tau ua tus tswv, tab sis nws tuaj kom tau ua tub txib. Kev ib leeg pab ib leeg yog kev ntseeg. Yog qhov sawv daws tuaj yeem ua tau. Leej twg kuj xij, yog nws ua lub neej xwm yeem kuj zoo ib yam li nws coj raws lub Moo Zoo. Thiab thaum nws coj raws lub Moo Zoo lawm, yam no yuav tsis xaus li no. Vim thaum peb yog ib tug neeg ntseeg uas muaj sia, peb lub neej neeg ntseeg yuav nthuav tawm mus sai heev cuag li hluav taws kub hnyiab.
Leej twg xav ua tus loj nyob hauv nej, nws yuav ua nej tus tub txib. Thiab leej twg xav ua tus ntaus thawj hauv nej, nws yuav ua sawv daws tus qhev.
Kev tau ntsib Yes Xus hauv Tswv Ntuj lo lus, yuav pab qhib peb qhov muag, zoo ib yam li qhib tus neeg dig muag lub qhov muag. Nws yuav pab kom peb tau dim ntawm lub ntuj nqaim, pab kom peb ntsia pom Tswv Ntuj lub ntuj loj dav, ces peb yuav nkag siab txog lub ntuj tshiab thiab Tswv Ntuj daim av tshiab. Qhov uas Yes Xus ntxuav cov Thwj Tim ko taw, ua rau peb ntsia pom qhov sib txawv ntawm kev ua tseem hwv tub txib thiab qee zaus kuj yog nyob hauv kev ntseeg. Kev ua tub txib yog cov hauj lwm ntawm cov neeg txheej qis nyob hauv zej zog. Tab sis kev ua tub txib raws cov neeg ntseeg, yog kev xyaum raws li Yes Xus tus piv txwv. Xyaum ua raws li Yes Xus nyob hauv kev ua zej zog tshiab. Qhov ntawd yog qhov tias sawv daws yog peb kwv peb tij, tsis hais nws yuav nyob rau txheej twg thiab muaj kev cai li cas kuj xij.
Raws li Zam Anziani ntawm lub Koom Txoos Methodist hais tias :
“Yog peb lees txais nrog peb txoj kev tso siab thiab kev cia siab hauv Yes Xus tus uas yog neeg tus tub txib. Tswv Ntuj lo lus hu kom peb ua qhov tsis sib haum xeeb ntawm lub ntiaj teb no nyob hauv tus tsim kev thaj yeeb thiab kev ncaj ncees. Ua tus choj txuas nrog sawv daws kom rov sib haum xeeb nyob hauv ib zeej tsoom neeg.”
Yawg Igino Giordani uas nws yog ib tug kws kos duab, kws sau ntawv xov xwm, tub tseev tsim thiab yog ib tug txiv tsev. Nws vam meej nyob hauv lub caij txoj cai koom tshaj kav, nws tau sau tej yam nws pom tias :
“Kev tseev tsim yog yam muaj meej mom heev, yog tias peb yog tub tseev tsim raws kev ntseeg, mas peb yuav ua tub txib tsis yog ua tus tswv. Peb yuav tsis siv kev tseev tsim yuam kev, tsis kav los yog siv txoj cai nruj. Nov yog lub meej mom ntawm kev ua zej zog tub txib, yog kev nyiam kev hlub nyob hauv cov hauj lwm yus ua, yog tus yam ntxwv ntawm kev nyiam kev hlub rau zej zog thiab rau lub teb chaws.”
Los ntawm kev ua tim khawv txog nws txoj sia, Yes Xus thiaj tsim txoj kev tshiab, yog kev tsis ua lub neej kom tus kheej vam meej los yog nrhiav koob meej rau tus kheej. Tab sis yuav vam meej vim lwm tus, lees paub lwm tus tej kev ntxhov siab, koom nrog luag txom nyem thiab nrog lwm tus neeg sib faib kev zoo siab.
Peb txhua tus nyias muaj nyias hauj lwm sib txawv, tsis hais kev tseev tsim, zej zog, hauv lub cuab yim neej, hauv tsev kawm ntawv los yog kev teev hawm hauv zej zog. Peb yuav siv peb lub meej mom nyob hauv kev ua tub txib, ua yam zoo rau sawv daws thiab sib pab tsim kev sib raug zoo uas ncaj ncees thiab ua ib tug.
Sau los ntawm Leticia Magri thiab pab neeg lo lus pub txoj sia.
