Tus neeg saib xyuas cov hauj lwm tiv thaiv kev ua luam neeg ntawm Talitha Kum

Tus neeg saib xyuas cov hauj lwm tiv thaiv kev ua luam neeg ntawm Talitha Kum thiab kev thaj yeeb ‘yog pib nyob hauv neeg lub meej mom.’

Hauv lub caij uas lub Koom Txoos npaj hnub thov Ntuj thiab nco txog hnub tawm tsam kev ua luam neeg nyob ntiaj teb. Leej Phauj Abby Avelino tus saib xyuas cov hauj lwm hauv Talitha Kum ntawm cov teb chaws, tau hais txog kev txhawj xeeb thiab qhov tseem ceeb zim txwv no hauv kev tawm tsam kev ua luam neeg. Kev ua luam neeg tseem yog ib tug qauv phem uas nthuav dav thiab zim txwv no tas ntiaj teb ntsia tsis pom. Ua kev kub ntxhov rau ntau plhom leej neeg nyob thoob plaws xeev ntuj, thiab kev nyiag ua kom haum nrog tej Technology tshiab tshiab hauv kev ua neeg thoj nam thiab kev tsis sib luag nyob thoob ntiaj teb. Txhua txhua xyoo hnub thov Ntuj thiab hnub tawm tsam kev ua luam neeg nyob ntiaj teb, mas nws maj mam muab tej kev ua luam neeg zais ntshis no thau tawm los rau sawv daws paub.

Lub lis piam ntawm kev sau siab.

Txij hnub tim 4 txog hnub tim 8 lub 2 hlis no, Los Mas tau ua tswv cuab tsa lub rooj sau siab hauv kev thov Ntuj thiab txhua yam hauj lwm rau ib tsoom neeg. Kom tau nco txog hnub tawm tsam kev ua luam neeg nyob ntiaj teb zaum tim 12. Lub lis piam sau siab no yog cov Koom Haum uas muab siab rau daws teeb meem kev ua luam neeg ua tus npaj. Nrog rau lub Koom Haum Talitha Kum uas hais txog kev rov xav txog, kev tiv thaiv thiab kev ua hauj lwm kom muaj qab hau hauv lub ntsiab lus tias :

“Kev thaj yeeb yog pib ntawm neeg lub meej mom.”

Ib tug nyob hauv kev ua cov hauj lwm no, yog Leej Phauj Abby Avelino uas nyob hauv lub Koom Haum Maryknoll Sister thiab yog tus saib xyuas cov hauj lwm thoob ntiaj teb ntawm Talitha Kum. Talitha Kum yog lub Koom Haum nyob thoob ntiaj teb uas cov Leej Phauj Kav Tos Liv ua hauj lwm los tawm tsam kev ua luam neeg.

Leej Phauj Abby Avelino tau ua kom pom tias kev ua luam neeg tab tom pauv ntxeev li cas ? Vim li cas kev tiv thaiv thiaj yog qhov tseem ceeb dua, thiab tib neeg lub meej mom thiaj yog qhov tseem ceeb ntawm kev ua neeg thoj nam thiab kev nrhiav txiaj ntsim qab hau ?

Leej Phauj Abby yug nyob Fis Lis Pees teb thiab tau loj hlob nyob As Mes Lis Kas teb, tom qab nws tsev neeg tsiv mus nyob As Mes Lis Kas teb. Nws hais tias :

“Kuv lub siab yog neeg Fis Lis Pees, tab sis kuv swm rau kev ua lub neej hauv ob yam kab lis kev cai.” Nws txoj hauj lwm qhia kev ntseeg nyob Zis Pees teb, yog qhov pib muaj feem cuam tawm tsam kev ua luam neeg. Tshwj xeeb tshaj yog kev pab cov neeg thoj nam thiab cov tsiv teb tsaws chaw, uas feem coob yog cov poj niam thiab cov me nyuam. Raws li nws hnov lawv piav, mas nws hais tias : “Kuv pib ntsia pom tias kev tsiv teb tsaws chaw thiab kev ua luam neeg yog sib xyaws ua ke.” Tej yam tau hnov ntawd ua rau nws tau mus txog lub Koom Haum Talitha Kum. Yog lub Koom Haum uas zim txwv no muaj nyob hauv 100 tawm lub teb chaws thoob ntiaj teb. Tab txawm tias kev paub txog kev ua luam neeg yuav txhab ntxiv, tsis kav nws tseem pom tias cov teeb meem no loj hlob ua ntu zus. Zim txwv no muaj coob leej neeg pom tias kev ua luam neeg, yog kev hla tib neeg lub meej mom. Tab sis muaj ntau zaus raug zais tseg thiab tus zauv uas ntsia tsis pom tsis tau qhia txog txhua yam kom meej tseeb. Nws piav tias kev ua luam neeg tau pauv ntxeev mus ntau heev. Tsis yog cov neeg pluag txom nyem los yog cov neeg muaj kev txawj ntse tsawg xwb thiaj yog lub hom phiaj yav tom ntej. Zim txwv no cov neeg ua luam neeg tig mus rau cov tub ntxhais hluas uas muaj kev txawj ntse thiab hais tau ntau xeem lus ntau dua. Kev sib yaum sib txw kheev kheev tshwm sim nyob hauv Online. Hauv tej lus ntxias uas saib zoo li yog tiag thiab yog neeg txawj ntse. Cov neeg raug ntxias coob leej ntseeg tias : “Qhov ntawd yog lawv tab tom sau npe ua hauj lwm tiag tiag.” Leej Phauj Abby piav tias :

“Lawv pom daim Visa ua hauj lwm thiab tej lus meej tseeb, ces lawv ntseeg.

Tab sis raws li Talitha Kum paub, mas tus zauv ntawm kev sib yaum sib txw nce siab kawg nyob hauv qee thaj tsam Africa thiab As Xias nrog rau Fis Lis Pees teb.”

Cov raug ntxias qee leej poob hauv kev quab yuam nyob Online. Tej yam no kheev kheev tshwm sim nyob Mias Mas, Khas Phus Chas thiab Thaib ciam teb. Lawv tau txais tej lo lus teb tias ; lawv yuav tau ua hauj lwm nyob Thaib teb. Tab sis qhov kawg lawv raug kaw nyob hauv cov yeej kaw neeg. Thaum lawv mus txog ntawd lawm, lawv tawm mus qhov twg tsis tau. Qee leej raug quab yuam kom ua hauj lwm them cov nqi nrhiav hauj lwm thiab nqi kev. Lawv tau txais kev qhuab qhia, tau txais txoj hauj lwm thiab raug yuam kom ua cov hauj lwm tau nyiaj zoo. Nov yog qhov uas pab neeg ua txhaum cai teeb tseg, thiab yog ib yam kev ua qhev tshiab.

Kev pab daws tso tseem yog qhov nyuab kawg. Tshwj xeeb tshaj yog cov cheeb tsam uas tau txais kev kub ntxhov los ntawm kev tsis sib haum xeeb. Qhov yuav nkag mus txog cov thaj tsam ntawd nws ntom heev. Leej Phauj Abby piav tias : “Ntau zaus uas kev pab cuam mus txog, mas yog thaum muaj neeg mus txog ntawm ciam teb xwb.”

Talitha Kum ua hauj lwm nrog cov neeg ua hauj lwm nyob ntawm cov ciam teb no. Lawv txaus siab yuav pab cov neeg uas tuaj yeem nyiag kev khiav. Vim li no kev tiv thaiv thiaj yog qhov tseem ceeb ntawm cov Koom Haum. Peb xav cheem kev ua luam neeg ua ntej teeb meem yuav tshwm sim. Kev kawm thiab kev xav txog yog qhov tseem ceeb. Tshwj xeeb tshaj yog hais txog kev thoj nam nyab xeeb. Kev thoj nam yog tib neeg kev ncaj ncees, tab sis tib neeg yuav tsum paub txog txoj cai thiab kev pom txog yam yuav tshwm sim. Nws piav txog ib qho xwm txheej uas tus Txiv Plig nws paub, thov kom nws pab soj ntsuam cov lus hais txog cov tsev neeg uas tab tom yuav tshais chaw. Hauv peb lub Koom Haum, peb pom tias lub Koom Haum ntawd tsis muaj tseeb. Thiab kev soj ntsuam yooj yim ntawd pab tiv thaiv tau tej xwm txheej uas txaus ntshai.

Leej Phauj Abby hais tias : “Cov raug ntxias dag coob leej tsis paub tias lawv tab tom ua luam neeg, vim feem ntau cov ua luam muag neeg yog cov neeg uas lawv cia siab.” Qee leej nyiag kev khiav dim hais rau peb tias ; lawv tsis xav tias lawv cov kwv tij los yog cov neeg lawv paub yuav ua saib tsis taus lawv. Qee zaus cov raug ntxias raug quab yuam kom lawv yaum lwm tus neeg nkag los, kom tau ua qhov sib pauv ntawm tus kheej txoj kev dim. Cov dab neeg uas cov khiav dim raug ntawd ntev heev. Kev ua luam neeg ua kom muaj qhov txhab tob kawg. Nws ua kev kub ntxhov rau lub meej mom thiab kev ruaj ntseg ntawm tib neeg. Kev yuav kho kom rov zoo tau yuav tsum siv sij hawm ntev hauv kev saib xyuas thiab kev muaj hauj lwm ruaj khov ua. Yog tsis muaj kev lag luam ruaj khov, mas tsoom pej xeem yuav txom nyem ntxiv mus. Txawm li ntawd tsis kav cov khiav dim qee leej kuj xav piav txog yam lawv raug rau ib zeej tsoom neeg paub. Lawv xav tiv thaiv kom lwm tus txhob raug kev txom nyem zoo li lawv.

Leej Phauj Abby hais tias : “Cov khiav dim lawv tej lus tseem ceeb kawg. Tshwj xeeb tshaj rau cov tub ntxhais hluas.” Nws piav txog thaum xub thawj uas tau ntsib cov neeg khiav dim, mas lawv tsis kam qhia txog qhov lawv poob hauv kev ua luam neeg. Coob leej hais tias : “Kuv tsis paub tias nov yog kev ua luam neeg.”

Tab sis tom qab uas lawv pib nkag siab txog txoj cai thiab yam uas lawv raug, mas lawv mam xav txog qhov uas tshwm sim rau lawv. Qhov paub tsis txog no, ua kom kev tiv thaiv yog qhov maj dua. Vim li ntawd Talitha Kum thiaj saib kev qhuab qhia yog qhov tseem ceeb ntawm txhua txheej neeg.

Leej Phauj Abby hais tias : “Peb cov Leej Phauj ua hauj lwm nyob hauv tsev kawm ntawv, hauv tsev teev Ntuj thiab hauv zej zog. Peb pib hauv cov me nyuam ua ntej, vim kev paub yog xub pib thaum ntxov.” Nws xav tias cov tub ntxhais hluas pluag txom nyem muaj coob thiab lawv yog lub zog hauv kev pauv ntxeev. Thaum cov tub ntxhais hluas nkag siab txog yam tshwm sim, mas lawv txawj sib pab tiv thaiv.

Teeb meem tib neeg, tsis yog teeb meem hauv kev tseev tsim.

Thaum ua tib zoo xav txog ntiaj teb cov lus sib cav sib ceg zim txwv no lawm, hais txog kev tsiv teb tsaws chaw thiab txoj cai thoj nam kuj nruj zuj zus. Leej Phauj Abby hais tias tsim nyog yuav saib tib neeg yog qhov tseem ceeb, vim kev tsiv teb tsaws chaw kheev kheev xav tias yog teeb meem hauv kev tseev tsim. Tab sis qhov tseeb tiag yog teeb meem ntawm tib neeg ntiag tug. Nws hais txog tej kev ntshai uas cov neeg thoj nam feem coob xav txog zim txwv no, mas txoj cai txwv los yog kev rau txim haj yam ua kom neeg txom nyem tuaj. Txoj cai ntawd tsis tau daws qhov teeb meem ntawm kev ua neeg thoj nam thiab kev ua luam neeg. 

Hais txog Leej Phauj Abby, mas cov lus tseem ceeb hauv ntiaj teb hnub kev thaj yeeb xyoo no meej kawg. “Kev thaj yeeb yog pib nyob hauv neeg lub meej mom.” Nws hais ntxiv tias : “Yog lub meej mom tsis tau txais kev txuag pov hwm, mas kev thaj yeeb yuav nyob tsis ntev.” Kev ua luam neeg tsis tuaj yeem tshem tawm hauv ntiaj teb tej teeb meem tseem ceeb tau. Xws li kev pluag txom nyem, teeb meem huab cua, kev tsis sib haum xeeb thiab kev tsiv teb chaws uas yog raug quab yuam puav leej yog kev txom nyem. Tib neeg yuav tsis khiav tawm hauv lawv tej vaj tse mus yooj yim. Thaum lawv raug quab yuam kom tso vaj tse tseg, mas cov ua luam neeg kuj tau zoo khaws xyeem los yog dej hlob dov cav.

Li ntawd Talitha Kum cov hauj lwm thiaj dav dua qhov kev pab thiab kev qhuab qhia kom paub. Mus txog kev txhawb nqa thiab kev ua hauj lwm ua ke ntawm txhua txhia lub teb chaws. Lub Koom Haum thiaj ua hauj lwm nyob hauv zej zog thiab tseem sib txuas nrog ntau lub teb chaws, kom tau sib faib cov ntsiab lus thiab pab cov neeg nyob raws ciam teb. Nov tsis yog qhov uas ib pab neeg twg yuav ua tau kheej. Nws yuav tsum vam txog kev lees txais ua ke thiab kev sib koom tes ntawm cov Koom Haum, cov tseem hwv, cov zej zog thiab txhua tus neeg.

Kwv tij Hmoob sawv daws ! Hnub no peb tham txog kev ua luam neeg thiab neeg lub meej mom los xaus li no xwb. Thov Huab Tais Yes Xus Pleev txoj kev thaj yeeb los ntxoov nej, kom nej sawv daws tau kev ua lub neej nyab xeeb thiab sov siab mus li.

Lwm zaus peb mam sib ntsib dua, nej sawv daws nyob zoo !