Tswv Qhia Liab Fis Lis Nes Lis hais tias “Yim xyoo tom ntej tsum tau ntau hom cia.”

Lub rooj Kev Tso Siab Tawm Rooj Fiv Ntuj Loj rub tau ntau txhiab tus neeg ntseeg kom tuaj sib sau ua ke nyob Pis Naas, Tswv Qhia Liab Fis Lis Nes Lis tus Thawj Tswj Roob Tswv Qhia nyob As Xias (FABC) tau hais txog qhov nws pom tias yuav muaj qab hau rau As Xias xeev ntuj thiab lub Koom Txoos lawv yav tom ntej.

Yawg Das Nias Laws tus hau saib lub tsev xov xwm hauv Ceeb Koom Txoos Pis Naas tau coj cov tub xov xwm ntsig nug cov coj lub Koom Txoos txog kev rhais ruam mus rau xyoo 2033 uas yog Xyoo Ntsiab txwm 2,000 xyoo Huab Tais Yes Xus taug thiab sawv rov los.

Ib lo lus qhia tas nrho txog Kev Tawm Rooj Fiv Ntuj: “Ntoj kev mus ua ke.”

Tswv Qhia Liab Fis Lis Nes Lis raug lawv nug txog Kev Tso Siab Tawm Rooj Fiv Ntuj Loj tias yog muab piv rau ib lo lus mas yuav yog lo lus twg, ces nws xav me ntsis mam teb lawv tias yog lo lus “Cov neeg ua tim khawv txog Huab Tais Yes Xus ntoj kev mus ua ke.”

Nws hais tias nws hais raws li nws pom thaum nws ua tus Thawj Tswj lub Rooj Tswv Qhia nyob As Xias thiab nws tau mus koom cov rooj sab laj ntau lub los. Nws hais li no “Kuv tau ib lub cib fim zoo mus tsham As Mes Lis Kas Naj, kom tau koom lub rooj sab laj ntawm cov Tuam Teb, thiab tau koom lub rooj sab laj SECAM nyob As Fis Kas. Tej no ua rau kuv ras txog As Xias Tuam Teb qhov tshwj xeeb.”

Nws hais tias qhov pom tseeb nyob As Xias teb mas yog kev sib txawv, tsis hais txoj kev teev hawm, txuj txoog, xeem lus, thiab kab lis kev cai. Yam sawv los twv lub Koom Txoos, mas yog As Xias tsoom neeg thiab cov txuj txooog lawv sib hwm thiab tsis muab hlob, lawv koom ntoj kev mus ua ke, nrog rau tej yam hu ua kev teev dab qhuas.”

“Qhov no yog qhov lub rooj tuav xam cov Leej Choj hais txog.” Nws txhab ntxiv, “Peb nrog lwm tus neeg nyob As Xias tawm rooj mus fiv Ntuj ua ke.”

Nws hais ntxiv tias kev ntoj kev mus li no vam txog tej yam loj dua kev sab laj los kev tshaj lus; tej yam ntawd mas yog tus cwj pwm tsis muab hlob hauv sab ntsuj plig, kev sib tham, thiab kev sib mloog uas muaj tus cag nyob hauv lub Moo Zoo thiab nyob hauv Huab Tais Yes Xus lub neej. “Peb raug hu los tsis yog kom tau tshaj txog lub Moo Zoo xwb, tab sis peb raug hu los kom tau nrog tsoom sid mus kev ua ke thiab, mas peb thiaj li ua tau tim khawv txog Leej Pleev kev nyiam rau cov nrog peb taug kev mus ua ke.”

Lub Rooj Sab Laj thawj zaug: Ua cas thiaj ncua tau ntev xyoo.

Cov tub xov xwm nug txog lub Rooj Sab Laj zaum tim ib nyob hauv xyoo 2006 tias ua cas thiaj li tseg tau nees nkaum xyoo, mam li rov muaj tuaj ua zaum tim ob no, thiab zaum txuas yuav muaj thaum twg.

Tswv Qhia Liab Fis Lis Nes Lis teb tias “Kuv tsis muaj peev xwm yuav teb tau tias ua cas thiaj ncua tau ntev npaum li no. Zaum no yog thawj xyoo kuv tau ua tus Thawj Tswj, thiab kuv tus Lwm Tswj los kuj tib yam.”

Qhov nws hais tau mas yog xyoo 2006 uas yog tsa lub Rooj Sab Laj nyob Tsheej Maim, Thaib teb, mas yog lub Rooj Tswv Qhia nyob As Xias fab kev tshaj lub Moo Zoo ua tus pib thiab muab siab rau kom muaj. “Lub Rooj Tswv Qhia nyob As Xias muaj ntau lub tsev lis hauj lwm, thiab yog lub tsev lis hauj lwm tshaj lub Moo Zoo lub zim txwv ntawd pom zoo kom muaj.”

Tom qab zaum ntawd tas, cov hauj lwm tiag mas yog soj ntsuam xyuas saib puas muaj tuaj raws li tau sib tuav xam. Tswv Qhia Liab Fis Lis Nes Lis hais ntxiv tias cov Ceeb Koom Txoos thiab lub Rooj tshaj Ntuj Lus tsis hais loj los me yuav tau pab txhawb kom mus raws li hais. “Xws li nyob Is Ntias, peb tsa kom muaj rooj sab laj hais txog kev tshaj Ntuj Lus nyob hauv cov Ceeb Koom Txoos thiab cheeb tsam Koom Txoos, thiab nce mus txog rau lub rooj sab laj hauv lub teb chaws.”

Tsis tas li no, nws tau hais lus qhuas txog Tswv Qhia Tsom Pas Lis Pas Las Npis, tus Tswj lub Rooj Tswv Qhia nyob As Xias fab kev tshaj lub Moo Zoo thiab nws cov tub ncig uas tsa kom muaj lub rooj Kev Tso Siab Tawm Rooj Fiv Ntuj zaum no. Nws tseem hais ntxiv tias “Peb tsum tau ua tsaug rau Vaj Qhia Fas Ntshis Kus tus peb hwm, nws tau muab lub suab hu nrov tseeb rau rooj tuav xam cov Leej Choj. Qhov ntawd, rub peb kom tau koom ntoj kev mus ua ke nyob hauv lub Ceeb Koom Txoos, lub teb chaws, thiab lub Tuam Teb. Xyoo no yog Xyoo Ntshiab muaj kev tso siab, thiab vim lub tswv yim hais txog xyoo 2033. Li ntawd, lub rooj zaum no thiaj yog phim rau lub caij nyoog.”

Ntsia lawm tom hauv ntej: Kev soj ntsuam xyuas yog tus yawm sij.

Txawm yuav hais txog qhov tseem ceeb hauv lub rooj no, tsis kav Tswv Qhia Liab Fis Lis Pos Nes Lis xav ntuas kom ras tias tsis tsim nyog yuav nquag tsa kom muaj cov rooj zoo xws tib yam no ntau thiab sai, nws hais tias “Cov hauj lwm li no tsum npaj txhij kom dav thiab ntau. Thiab tseem muaj yam tseem ceeb dua, mas yog soj raws saib lub rooj puas txi txiv zoo, tsis hais hauv lub teb chaws thiab cheeb tsam, Ceeb Koom Txoos, hauv Rooj Tswv Qhia, thiab cov teb chaws loj xws li Fis Lis Pees thiab Is Ntias.”

Nws hais tias lub rooj Kev Tso Siab Tawm Rooj Fiv Ntuj tawm los zoo los phem thiab txi txiv qab los qaub, mas tsis yog saib tias tsa tau zoo xwb, tseem soj txog qhov tias sawv daws puas muaj feem thiab puas coj mus siv raws. Yog li mas, nws thiaj hais tias “Cia yim xyoo tom ntej, mas peb mam tshuaj xyuas saib zoo li cas. Thaum ntawd, peb mam pom tias lub rooj zaum no puas deeg txog sawv daws.”

Tus tim khawv tsis muab hlob.

Nyob hauv Tswv Qhia Liab Fis Lis Nes Lis cov lus, nws hais ntau zaus txog ib qhov tseem ceeb, yog qhov tias lub Koom Txoos nyob As Xias tsum coj tus xeeb ceem tsis muab hlob, pab luag tej, thiab hwm neeg qhov sib txawv.

“Peb txhib nej kom ntoj kev mus ua ke. Tus neeg ua tus me los ua tim khawv txog Huab Tais Yes Xus, yog tus nrog luag lwm tus mus ua ke, nws kawm ntawm lawv, thiab nws faib lub Moo Zoo kom tau hloov lawv siab, tsis yog nws yuam kom lawv ntseeg. Qhov no yog peb txoj hauj lwm.”

Kev Tso Siab Tawm Rooj tseem muaj mus ntxiv nyob Pis Naas, tab sis Tswv Qhia Liab Fis Lis Nes Lis kuj tau hais lus los ntuas sawv daws tias lub Koom Txoos nyob As Xias lub neej lawm tom ntej tsis yog dai rau ib yam loj loj xeeb tuaj rau lub Koom Txoos xwb, tab sis yog dai rau lub siab ntseeg kev ntoj kev uas muaj lub siab ntev nyiaj, tsis muab hlob, thiab sib pab nres.