Nws hais tias : “Kuv nyiam pab kev phais me nyuam, vim kev ua nws yog zoo ib yam.” Ob tug kws kho mob uas tau mus kawm nyob Lav Xias teb, yog ob tug tuav xam tseem ceeb. Nws yog qhov pab tau kuv ntau kawg, vim kuv tuaj yeem nug thiab nkawd piav txhua yam rau kuv kom ua siab ntev mloog. Zim txwv no kev ua hauj lwm ntawm lub tsev kho mob ntxhov kawg. Lub tsev kho mob muaj 108 lub txaj pw, muaj cov neeg ua hauj lwm 250 leej thiab 130 tus kws kho mob. Kuv txoj hauj lwm yog ua kom ntseeg tau tias cov neeg ua hauj lwm tau txais nyiaj hli xwm yeem thiab lawv ua hauj lwm zoo. Kev siv nyiaj yog qhov nyuab kawg hauv kev ua hauj lwm hauv lub tsev kho mob. “Peb tsis tuaj yeem ua hauj lwm rau cov neeg pluag txom nyem tau, vim peb tsis muaj ib lub Koom Haum twg txhawb nqa peev nyiaj txiag kom peb saib xyuas tau lawv.”
Lub tsev kho mob koom tes nrog Caritas thiab ntau lub Koom Haum pab dawb nyob Xis Lias teb, uas tau txais kev txhawb nqa ntawm txawv teb chaws. Hauv ntau xyoo dhau los no, lub tsev kho mob kuj tau txais kev pab ntau kawg los ntawm Vas Tis Kas lub tsev kho mob, uas muaj Vaj Qhia ua tus coj. Tswv Qhia Mario Zenari hais tias : “Vim tej kev txhawb nqa no, ib tsoom neeg thiaj tau txais kev phais cawm txoj sia, tsis hais hauv tej xwm txheej maj ceev huv tib si.”
Tej yam tsis meej tseeb uas muaj txhab ntxiv.
Raws li Leej Phauj Judita hais ; mas cov zej zog nyob Xis Lias teb hloov pauv mus ntau kawg txij thaum muaj tsov rog xyoo 2011 los. Coob leej yuav tsum ua 2 txoj hauj lwm kom nyob tau. Dhau no lawm tseem muaj kev tsiv teb tsaws chaw loj ntawm cov neeg muaj kev kawm, tshwj xeeb tshaj yog cov neeg ntseeg thiab cov haiv neeg tsawg. Lawv tau khiav mus rau Aws Los Pas, As Mes Lis Kas thiab Aus Thas Lias teb.
Nws hais tias : “Cov uas lawv tseem nyob, yog cov tsis muaj caij khiav tawm mus.” Kev chim siab hauv xeev ntuj ua rau kev tsis ruaj khov muaj txhab ntxiv. Kev pov hoob pob thiab kev tua hoob pob hluav taws kuj yog ib feem hauv lub neej niaj hnub.
Ib zaug ntawm kev sib tua uas nyob rawv hauv nws siab, yog tom qab kev caws hoob pob rau lub tsev teev Ntuj Os Thos Dos thiab muaj neeg tuag coob leej. Cov neeg raug mob feem coob raug xa mus rau lub tsev kho mob Fab Kis.
“Peb kho lawv li ntawm 80 feem pua.”
Cov neeg raug mob coob leej yog cov tub ntxhais hluas. Peb nug lawv tias tom qab phais tas peb yuav pab lawv li cas ntxiv. Yuav luag txhua teb tib lo lus tias :
“Lawv xav khiav mus txawv teb chaws.”
