Lub Koom Haum Kav Tos Liv Thaib lees saib xyuas fab ntsuj plig thiab kev noj qab nyob zoo rau cov neeg laus.
Hnub tim 17 lub 8 hli no, cov tub tseem hwv txheej siab ntawm lub pwm tsav kev noj qab haus huv NHSO nyob Thaib teb, tau mus tsham lub Koom Txoos lub tsev ua hauj lwm pab zej zog DISAC hauv lub nroog Warin Chamrap, kom tau soj ntsuam txog cov hauj lwm uas lub Koom Txoos ua hauv lub npe ‘Bung Mai Model.’
Cov hauj lwm no pib hauv xyoo 2021, los ntawm lub Koom Haum ua hauj lwm rau cov neeg laus nyob Thaib teb. Caritas Thailand thiab DISAC Ubon Ratchathani tau txais kev txhawb nqa los ntawm lub Koom Haum cov neeg laus nyob Zes Mas Nias teb (Caritas Germany) thiab lub Koom Haum kev txhim kho nyob Zes Mas Nias. Lub hom phiaj yog sib koom tes saib xyuas fab ntsuj plig raws cov Kav Tos Liv kom haum rau kev noj qab haus huv thiab zej zog, kom cov neeg laus nyob tau hauv lawv tej zej zog. Lub tsev no cov hauj lwm yog saib xyuas cov neeg laus uas sau npe tseg li ntawm 178 leej. Ib hnub muaj li ntawm 25 leeg tuaj sib sau nyob ua ke. Dhau no lawm pab neeg saib xyuas tseem mus saib xyuas cov neeg laus uas lawv tuaj tsis tau nyob hauv tsev li ntawm 138 leej thiab. Lawv tau txais kev txhawb nqa los ntawm cov neeg saib xyuas zej zog thiab cov tub ua hauj lwm 28 leej.
Lub Koom Haum no tseem npaj ib lub tsev rau cov neeg laus txom nyem uas lawv nyob twm zeej kom tau tuaj nyob ua ke, pab kom lawv tau nyob hauv lawv lub zos zoo dua yuav mus nyob hauv cov tsev kho mob kev saib xyuas. Txiv Plig Narathip Ngamwong tus thawj tswj lub tsev txhim kho zej zog hauv lub Cheeb Koom Txoos Ubon Ratchathani hais tias : “Cov hauj lwm no saib lub meej mom kev ua neeg yog qhov tseem ceeb, thiab kev muaj feem cuam hauv zej zog yog qhov ua ntej.”
Tus pog Duangthida Srisema fab kev noj qab haus huv hais tias : qhov chaw no tau ua dawb huv raws kev ntshiab huv, yog txoj kev mus txog kev lees txais ntawm NHSO. Hais txog tus pog Yin Khunsasan uas nws muaj 80 xyoo, mas cov hauj lwm no tau pub lub cev ntaj ntsug zoo thiab kev phooj ywg rov rau nws. Tom qab ntau xyoo uas nws yuav tsum nyob hauv tsev yog feem ntau, kom tau saib xyuas nws tej mob. Nws hais tias : “Kev tuaj ntawm no tas mus li hauv 2 xyoos tag los, yog kev txhawb nqa kuv lub siab. Kev muaj phooj ywg thiab muaj cov tub ua hauj lwm nyob ib sab saib xyuas, tau kev txhawb nqa kuv lub cev thiab tau tswj kuv lub siab.”
Yawg Atthaporn Limpanyalerd uas nws yog tus lwm thawj tswj tau hais lus qhuas cov hauj lwm no tias : yog tus piv txwv zoo ntawm kev sib koom siab nrog cov tseem hwv, nrog cov Koom Haum kev teev hawm thiab nrog cov neeg hauv zej zog. Kev saib xyuas cov neeg laus tsis yog yuav vam txog kev kho mob xwb. Nws hais txog qhov
tseem ceeb ntawm cov kev teev hawm thiab cov neeg hauv zej zog tej kev saib xyuas uas tsis yog nyob hauv tsev kho mob. Vim tsoom pej xeem Thaib cov muaj hnub nyoog laus coob zuj zus, Bung Mai Model thiaj ua kom pom tias ; Kav Tos Liv tej kev ua hauj lwm rau zej zog, kuj tuaj yeem txhab kev ua hauj lwm saib xyuas kev noj qab haus huv tau. Tsis tas li ntawd, kuj pab kom cov neeg laus tau kev ua lub neej muaj meej mom, muaj phooj ywg thiab yuav tau txais kev saib xyuas los ntawm cov neeg hauv lawv tej zej zog tau li cas.
