Kev Tawm Rooj Fiv Ntuj Loj yog Pis Naas lub caij nyoog pub rau lub Koom Txoos nyob As Xias
Lub rooj sau siab Kev Tso Siab Tawm Rooj Fiv Ntuj Loj (the Great Pilgrimage of Hope) yog yuav tsa nyob hauv lub 11 hlis no tim 27-30 nyob rau Pis Naas, Mas Les Xias teb. Lub rooj sau siab no yog tsa los txhib lub Koom Txoos nyob As Xias kom koom siab ntoj kev mus ua ke nyob hauv lub siab ntseeg raws li lub hau lus tias “Tsoom pej xeem nyob As Xias lawv ntoj kev mus ua ke.”
Lub rooj sau siab no tseem yog ib lub sij hawm tseem ceeb rau lub Koom Txoos nyob As Xias thiab, vim tias yuav muaj ntau pua tus Tswv Qhia, Leej Choj, Leej Qee, Tub Tsob Hwb, cov txwj laus Leej Nrog tuaj rau Pis Naas kom tau koom lub rooj Kev Tso Siab Tawm Rooj Fiv Ntuj Loj, uas yog lub rooj sab laj kom tau txua lub Koom Txoos kev ua neej, kev sib faib, thiab ua hmoov txog lub Moo Zoo tias yuav mus zoo li cas nyob hauv nruab nrab As Xias lub sawm fem thiab As Xias lub tswv yim.
Tsoom pej xeem nyob As Xias lawv ntoj kev mus ua ke.
Tus tsa Kev Tso Siab Tawm Rooj Fiv Ntuj yog lub Rooj Tswv Qhia nyob As Xias (FABC), muaj Ceeb Koom Txoos Pis Naas ua tus tswv cuab. Lub rooj no nqua hu cov suab nyob tas As Xias teb, tsis hais lawv txawv haiv, txawv lus, txawv txuj txawv txoog, kom tau tawm rooj fiv Ntuj, uas yog kev rhais ruam nyob hauv lub siab ntseeg kom tau puag qhov sib txawv cia thiab kauj ruam mus lawm tom ntej ua ke. Lub nroog Pis Naas thiaj li caw lub Koom Txoos kom ua lub neej thiab sib faib Huab Tais Yes Xus zaj kwv huam dua tshiab nyob hauv lub ntiaj teb muaj kev sib cais sib tawg, kev sib txuas, thiab ua ntau txhais ntau ceg dua yav tas los.
Cov tuaj hais lus rau sawv daws mloog, mas muaj Tswv Qhia Liab Lus Is Tuam Tas Nkes, Tswv Qhia Liab Paj Lug Vaws Ntsis Los Das Vis, Tuam Tswv Qhia Xis Moos Pos, Yawg Hlob Mas Las Fais Tas Tis, Tuam Tswv Qhia Khes Tos Faws Plhaus, Yawg Kas Lis Kas Mis As Nos, thiab lwm tus ntxiv. Lawv sawv daws yuav hais txog kev plhis dua tshiab, kev rov haum xeeb, thiab kev tsim thwj tim nyob hauv lub caij tom qab kab mob sib kis thiab lub zim txwv ntiaj teb tsav vam.
Tos lub rooj sau siab zaum no xaiv lub hau lus tias ‘Tsoom pej xeem nyob As Xias lawv ntoj kev mus ua ke’, vim yog tau txais kev txhawb siab los ntawm zaj cov kws hnub qub tawm hawm tus me nyuam Yes Xus tas, ces lawv nyias rov mus nyias tsev, Mas Tais sau nyob hauv nws phau ntawv Moo Zoo tias “Lawv taug dua ib txog kev rov mus lawv teb chaws” (MT 2: 12). Lub hau lus no tsom kom pom tias tab txawm yuav dhau mus 2000 xyoo lawm, lub Koom Txoos tseem nrhiav tej txoj kev tshiab tshiab kom tau nrog tsoom pej xeem nyob As Xias tuav rawv lawv cov txuj txoog thiab lub siab ntseeg tshais ruam mus ua ke.
Muaj feem sib txuam nrog As Xias hauv lub zim txwv no.
Niaj hnub no As Xias teb tab tom sawv nyob ntawm txoj kev tshuam. As Xias teb yog lub tsev rau npoj tub ntxhais hluas coob tshaj plaws nyob qab ntuj no thiab yog lub zos huam vam sai tshaj plaws, txawm li ntawd, As Xias teb pheej tseem ntsib teeb meem vaj huam tsis sib luag, teeb meem cheeb tsam, kev tsis sib haum vim txoj kev teev hawm. Nyob hauv As Xias xeev ntuj, cov Kav Tos Liv yog cov tsawg dua cov, ces lawv ua neej ntsiag ntsiag raws nraim lub siab ntseeg nyob nruab nrab ntau txoj kev teev hawm, txawm li ntawd, cov Kav Tos Liv kuj tseem ua tim khawv txog lawv txoj lawv txoj kev ntseeg raws li cov lus qhia kom ua sawv daws tub txib ntxhais txuas, muaj siab hlub khuv leej, thiab tsim kev thaj yeeb.
Yog zoo li ntawd, Kev Tso Siab Tawm Rooj Fiv Ntuj Loj thiaj tsis yog lub rooj cia tawm tswv yim, tab sis yog kev txav kev nti kom tau plhis dua tshiab raws li Vaj Qhia Fas Ntshis Kus lub zeem muag hais txog Koom Txoos lub rooj sab laj; xws li sib mloog hais, sib tuav xam, thiab sib koom rhais ruam mus ua ke. Lub rooj sau siab zaum no thiaj xav kom sawv daws nrhiav tau ‘kev sib tham peb txheej’ (triple dialogue) raws li lub Rooj Tswv Qhia nyob As Xias tau xub pib los ua ntej. Kev sib tham peb txheej yog muaj li no: nrog cov neeg pluag sib tham, nrog cov txuj txoog sib tham, thiab nrog kev teev hawm sib tham.
Nyob rau lub caij As Xias teb ib cheeb tsam tab tom ntsib kev pauv hloov tsis hais cov txuj tshiab (technological), kev tsiv teb (migration), thiab kev tsim txiaj tsis meej (moral uncertainty), lub Koom Txoos thiaj tsum tau ua tus kwv luag txaus ntseeg siab, lub Koom Txoos thiaj tsum tau ua tus mloog ua ntej yuav ntuas, ua tus tsob hwb ua ntej yuav qhia, ua tus tsis muab hlob nyob hauv txhua leej neeg.
Pis Naas lub caij nyoog pub rau lub Koom Txoos nyob As Xias.
Sawv daws paub tias Pis Naas yog lub tswv yim tus plig hais txog ntau tsav yam txuj txoog sib txawv, thiab kev ntseeg sib txawv nyob ua ke yam sib haum xeeb, yog lub chaw muaj qauv tseem ceeb; yam li muaj cov tsev teev Ntuj qub, muaj hauj sam cov tsev txoos, muaj Mawv Xim Lis cov tsev teev hawm nyob sib xyaw ua ke. Tej yam li no yog ua pov thawj txog kev sib tham sib txuas lus los ntev. Yog vim Pis Naas muaj tej zoo li hais los no, Kev Tso Siab Tawm Rooj Fiv Ntuj thiaj li rais los ua daim duab tsom thiab taw kev rau lub Koom Txoos nyob As Xias kom tau chaw so, chaw thov Ntuj, thiab chaw sib ntxiv tswv yim khawb txoj kev lawm tom ntej.
Yog muab ntsia mus rau lub Xyoo Ntshiab 2033 uas yog txwm 2000 xyoo Leej Pleev sawv rov los, mas lub rooj sau siab no yog qhov chaw caw cov ntseeg sawv daws koom siab rhais ruam mus ua ke nyob hauv kev tso siab, kom lub Koom Txoos nyob As Xias tau plhis dua tshiab thiab nrhiav tau lub Moo Zoo qhov xyiv fab nyob hauv As Xias cov xeem lus, cov paj nruag, thiab cov kwv huam.
Nyob hauv thaj tsam muaj kev sib txawv ntau yam, nyob ntawm kev nplua nuj thiab kev pluag muaj, nyob ntawm lub siab ntseeg thiab lub siab ua xyem xyav, nyob ntawm kev tso siab thiab kev nyuaj siab, tej zaus Kev Tso Siab Tawm Rooj Fiv Ntuj Loj no yuav ua chaw thim rov rau sawv daws; yam li ua chaw nco qab tias nyob hauv As Xias lub plawv, Leej Pleev lub Moo Zoo tseem cog cag ruaj mus li, tsis yog vim kev tswj hwm, tab sis vim kev hlub; tsis yog vim tig rov qab, tab sis vim xaiv dua ib txog kev mus.
