Kev sib sau ntawm cov neeg Kav Tos Liv tseem ua ntxiv mus hauv kev tsis tiaj tus nyob Thaib qab teb.
Kev sib sau nyob ntawm tus niam dej Sungai Kolok tau coj cov neeg ntseeg Kav Tos Liv hauv cov zej zog thiab cov tawm rooj fiv Ntuj 20 leej tuaj ntawm lub tsev teev Ntuj hwm Niam Mab Liab Fas Tis Mas hauv lub nroog Kota Bharu uas nyob Mas Les Xias teb tuaj ua ke. Muaj Leej Phauj Angela ntawm lub Koom Haum Franciscan Missionaries of Mary ua tus coj. Kev sib koom ua thaj txi Ntuj tshwm sim nyob hauv kev phem rov sawv dua ib zaug nyob qab teb. Tom qab kev caws hoob pob thiab hlawv tsev nyob hauv ntau lub nroog nyob qab teb. Cov tseem hwv Thaib tau txwv kev tawm hmo ntuj nyob hauv lub xeev Narathiwat, kom tsoom pej xeem tau kev nyob nyab xeeb. Muaj Tswv Qhia Trairong Multree ntawm lub Cheeb Koom Txoos Surat Thani ua tus coj lub Txoos. Hauv lub Txoos muaj cov Txiv Plig, cov Leej Phauj thiab cov neeg ntseeg tuaj koom ua ke. Hauv Tswv Qhia cov lus nthuav ntawv Moo Zoo, nws tau txhawb dej siab rau cov Kav Tos Liv kom tuav kev ntseeg khov kho thiab txhob tag kev cia siab hauv lub caij raug kev kub ntxhov. Nws muab Leej Ntshiab Mos Nis Kas thiab Leej Ntshiab Aus Nkus Tis Nus lub neej los hais ua piv txwv. Tswv Qhia hais tias : “Yes Xus tsis tau hais tias ; peb lub neej yuav nyob kaj siab lug. Peb yuav tsum kwv Ntoo Cuam thiab raws nws qab, tsis hais hauv lub caij txom nyem, peb yuav ua tiag nyiaj.” Nws tseem hais ntxiv tias ; kev ntseeg ntawm cov neeg ntseeg yuav ua tawm nyob hauv kev nyiam kev hlub thiab kev zam txim txhaum ntau dua cov lus hais. Lub thaj txi Ntuj xaus rau kev pe hawm Leej Ntshiab Fas Ntshis Kus cov pob txha, thiab kev thov Ntuj rau zej zog. Lub tsev teev Ntuj hwm Leej Ntshiab Mos Nis Kas thiab lub tsev teev Ntuj hwm Leej Ntshiab Aus Nkus Tis Nus nyob Sukhirin nyob sib ze. Ob lub tsev teev Ntuj no puav leej nyob hauv lub Koom Haum Salesians nyob Thaib teb kev saib xyuas.
